iVakatakarakara

Era sokaloutaka na ivakatakarakara na Jiu yalodina ena gauna vakaivolatabu?

“Mo kakua ni cakava vei iko e dua na matakau ceuceu; se dua nai vakatakarakara ni ka mai lomalagi ecake, se dua na ka e tu e vuravura era, se dua na ka e na wasawasa e na yasa i vuravura: Mo kakua ni cuva vei ira, se qaravi ira.”—Lako Yani 20:4, 5.

Na sokaloutaki ni ivakatakarakara e vakacalai ena iVolatabu vakaIperiu se Veiyalayalati Makawa

KA ERA TUKUNA ESO

E tukuna na New Catholic Encyclopedia, nira dau sokaloutaka na Jiu na ivakatakarakara “era doka qai vakarokorokotaka.” E tomana ni laurai ena rusarusa ni valenisoro e Jerusalemi na vatu ceuti ni kauvuata, senikau, kei na manumanu.—1 Tui 6:18; 7:36.

KA MO KILA

Era sega ni sokaloutaka na Jiu yalodina e dua na ka e ceuti ena valenisoro, me vaka e tukuna na New Catholic Encyclopedia. E sega mada ga ni dua na vanua ena iVolatabu e tukuni nira vakayagataka na Isireli yalodina na ivakatakarakara ena nodra sokalou.

KA E KAYA NA IVOLATABU

Na Kalou a uqeta na parofita o Aisea me kaya, “na vakarokoroko me caka vei au ka’u na sega ni solia vua e dua tani; se na vakavinavinaka me caka vei au ki na matakau ceuceu [ivakatakarakara, NW].”—Aisea 42:8.

Era bau vakayagataka na lotu vaKarisito taumada na ivakatakarakara?

“E duavata tale ga vakacava na valenisoro ni Kalou kei na matakau? . . . Ni kua ni tara tiko na ka e sega ni savasava.” —2 Korinica 6:16, 17.

“Era na rairai ririkotaka na lotu vaKarisito taumada ke tukuni me biu ena nodra valenilotu na ivakatakarakara, era na vakatauvatana ina qaravi matakau na nodra cuva se masu kina.” —Na ivola History of the Christian Church.

KA ERA TUKUNA ESO

E kaya na ivola na New Catholic Encyclopedia, “Meda kua ni totolo ni vakatitiqataka na nodra vakayagataka na lotu vaKarisito taumada na ivakatakarakara ena sokalou. E laurai ena nodra ibulubulu qaravatu na lotu vaKarisito taumada na droini. . . . E robota tale ga na kena loqi tabu na ivakatakarakara ni veika lasu.”a

KA MO KILA

Na droini makawa e laurai ena ibulubulu qaravatu qo e vakadinadinataki ni a caka ena ikatolu ni senitiuri. Ia se mate sara o Jisu ena 200 na yabaki yani e liu. Kena ibalebale, na veika e tukuni ena ivola sa cavuti oti mai me baleta na nodra ivakarau ni sokalou na lotu vaKarisito taumada, e sega ni nodra ivakarau dina ni sokalou na lotu vaKarisito e liu sara—era muria na lotu vaKarisito ena imatai ni senitiuri me vaka e vakamacalataki ena iVolatabu vaKirisi vaKarisito. Na droini era laurai ena ibulubulu qaravatu e matata kina ni so na lotu vaKarisito ena ikatolu ni senitiuri era vakamuria na nodra ivakarau ni sokalou na lotu butobuto ena kena vakayagataki na ivakatakarakara, kena irairai me rawa e levu mera tavuki.b

KA E KAYA NA IVOLATABU

“Ni dro tani mai na qaravi matakau.”—1 Korinica 10:14.

Me vakayagataki na ivakatakarakara me ivukevuke ena sokalou?

“Ni qarauna na qaravi matakau.”—1 Joni 5:21.

E sega ni tokona na iVolatabu na sokaloutaki ni ivakatakarakara. Era sega gona ni sokaloutaka na ivakatakarakara na iVakadinadina i Jiova, se biuta ena nodra vale se nodra vanua ni sokalou

KA ERA TUKUNA ESO

E kaya na ivola New Catholic Encyclopedia: “Na sokaloutaki ni ivakatakarakara sa qaravi sara tiko ga kina o koya e kena ivakatakarakara qori, e rawa gona ni vakayagataki na ivakatakarakara me sokaloutaki kina e dua.”

KA MO KILA

Ni vakavulici ratou nona imuri o Jisu ena ivakarau ni masu, a sega ni tukuna me ratou vakayagataka na ivakatakarakara. E sega gona ni volai ena iVolatabu vaKirisi vaKarisito me vakayagataki na ivakatakarakara me sokaloutaki kina na Kalou dina.

KA E KAYA NA IVOLATABU

“E dodonu mo sokalou vei Jiova na nomu Kalou, mo qaravi koya duadua ga.”—Maciu 4:10.