Na Rai ni iVolatabu

Me Vakayagataki Beka na iVakatakarakara ena Sokalou?

“Au a vakavulici niu na volekata na Kalou ena noqu vakayagataka na ivakatakarakara.”​—Mack.

“Dau levu tu ena neitou vale na matakau ni sokalou. Keitou nanuma ni na vakamarautaka na Kalou.”​—Herta.

“Keitou dau cuva ina so na ivakatakarakara. Keitou sega ni kauaitaka na rai ni Kalou.”​—Sandra.

NA CAVA nomu rai me baleta na veika e tukuni ya? Era vakabauta e levu nira na volekata na Kalou ke ra vakayagataka na ivakatakarakara vakalotu. E donu beka na rai qori? Ia o koya e bibi sara, oya na cava na rai ni Kalou? Vakasamataka mada na veika e volai tu ena nona Vosa na iVolatabu.

Na Rai ni Kalou me Baleta na iVakatakarakara Vakalotu

Na ivakatakarakara vakalotu kei na matakau era ivakatakilakila ni dua na ka e vakayagataki me caka kina na sokalou. Era wili kina na kauveilatai, na matakau, itaba, se dua na ka e vakatakarakarataka na veika mai lomalagi se i vuravura.a Na kuila tale ga e dau ivakatakarakara me sokaloutaki tiko.

E se tekivu sara mai na vica na udolu na yabaki sa oti na vakayagataki ni ivakatakarakara ena sokalou. Ni se qai tauyavutaki ga na matanitu vou o Isireli ena 1513 B.S.K., a vakamatatataki ena iVunau e Tini na rai ni Kalou me baleta na vakayagataki ni ivakatakarakara vakalotu. E kaya: “Mo kakua ni cakava vei iko e dua na matakau ceuceu; se dua nai vakatakarakara ni ka mai lomalagi ecake, se dua na ka e tu e vuravura era, se dua na ka e na wasawasa e na yasa i vuravura: mo kakua ni cuva vei ira, se qaravi ira: ni’u sa Kalou vuvu [“vinakata meu qaravi vakatabakidua,” NW], koi au ko Jiova na nomu Kalou.”​—Lako Yani 20:4, 5.

Vakasamataka na rua na ka e vakatabuya na Kalou: iMatai, mera kua ni ceuta na matakau mera sokalou kina, kena ikarua, mera kua ni “cuva” se qaravi ira. Na cava e vakatabuya kina na Kalou na ceuti ni matakau? Dua na vuna oya ni se “sega e dua na tamata sa raica na Kalou ena dua na gauna.” E sega ni yago vakatamata o Jiova, ia e ibulibuli vakayalo qai bula tiko mai lomalagi. (Joni 1:18; 4:24) Dua tale na vuna e vakatabui kina na ceuti ni dua na ivakatakarakara oya ni “vinakata” na Kalou me “qaravi vakatabakidua.” E kaya: “Na vakarokoroko me caka vei au ka’u na sega ni solia vua e dua tani; se na vakavinavinaka me caka vei au ki na matakau ceuceu.” (Aisea 42:8) E cala gona na kena sokaloutaki na ivakatakarakara. A cudru vakalevu o Jiova ena gauna a cakava kina e dua na ivakatakarakara e dua na iliuliu e Isireli o Eroni.​—Lako Yani 32:4-10.

Cava Meda Kua ni Cuva Kina?

E kaya na iVolatabu me baleta na matakau: “Era sa vakagusuna, ia era sa sega ni vosa rawa; era sa vakamatana, ia era sa sega ni rai rawa; era sa vakadaligana, ia era sa sega ni rogo rawa.” E salamuria na ivakasala bibi qo: “O ira era cakava era sa tautauvata kei ira”—era sega ni vakila tu e dua na ka!​—Same 115:4-8.

E ivakaraitaki tale ga ni cakacaka vakatawadodonu na sokaloutaki ni matakau. Vakasamataka mada qo, ‘Ena vakacava noqu rai keu solia vua na luvequ e dua na iloloma saulevu, oti qai lai vakavinavinaka vua e dua tale, se dua na ka e sega ni bula tu?’ O na rawa ni kila e keri na nona rai na Dauveibuli se o Koya na Dausoli Bula ena gauna eda sokalou se qarava kina e dua tale—okati kina na matakau era sega ni vakila tu e dua na ka. Macala vinaka ni dodonu me caka ga vua na sokalou qori.​—Vakatakila 4:11.

Eda buli meda ucuya na Kalou, ia sa bau dua dina na ka lolovira meda qai sokaloutaka tale e dua na ivakatakarakara e sega tu ni vakilai koya! (Vakatekivu 1:27) E tukuna na parofita o Aisea me baleti ira na dauqaravi matakau: “Era sa cuva ki na cakacaka ni ligadra, ki na ka sa cakava nai qaqalo ni ligadra: A sa cuva kina na tamata wale, ka sa vakamalumalumutaki koya na tamata turaga: ia [kemuni Jiova] mo ni kakua ni vosoti ira.”—Aisea 2:8, 9.

Na vuna e sa qai cata ga kina vakalevu na Kalou na sokalou va ya baleta nira qaravi sara tiko ga kina na timoni era meca ni Kalou. Na gauna era biuti Jiova kina na Isireli mera sokaloutaka na matakau, “era soro ki na tevoro eso, ka sega vua na Kalou,” e kaya na Vakarua 32:17.

Era sokaloutaka beka na imuri i Jisu ena gauna e liu na ivakatakarakara se ra vakayagataka me ivukevuke ina nodra sokalou? E sega! A vola na yapositolo i Jisu o Joni: “Oi kemudou na gone lomani, maroroi kemudou mai na veimatakau.” (1 Joni 5:21) E kaya na ivola Early Church History to the Death of Constantine, (Mai na iTekivu ni iVolatukutuku ni Lotu ina Mate i Constantine): “Era cata sara ga na tisaipeli ena gauna e liu na qaravi matakau.”

Na Sokalou e Vakadonui

E kaya o Jisu: “Sa qai yaco mai, era na lotu vakayalo ka vakaidina vei Tamada ko ira sa lotu dina; ni sa qara ko Tamada me vakaoqo ko ira sa lotu vua.” (Joni 4:23) E vinakata na Kalou meda kilai koya vakavinaka—na ka e taleitaka kei na ka e sega ni taleitaka, nona ivakatagedegede, vaka kina nona inaki me baleti keda. (Joni 17:3) Qori na vuna e uqeta kina na volai ni iVolatabu. (2 Timoci 3:16) Na Kalou tale ga e ‘sega ni yawa vei keda yadua.’ Eda rawa ni masuti koya ena vanua cava ga eda tu kina, se gauna ga eda digia, sega ni gadrevi tale kina na veivuke ni matakau.—Cakacaka 17:27.

“Au sega ni raica e dua na ivakatakarakara ni sokalou niu curuma na nodra Kingdom Hall na iVakadinadina i Jiova,” e kaya o Sandra, a tukuni taumada. “Era vakavulici au ena iVolatabu meu kila kina na itovo ni Kalou kei na ka e vinakata. Au vulica kina meu masu me rogoca na Kalou. Au sa qai kila tu qo na veika dina me baleta na Dauveibuli, au volekati koya tale ga.” E vulica o Sandra ni veiuqeti qai veisereki na veika dina ena iVolatabu. (Joni 8:32) O rawa tale ga ni vulica qori.

[iVakamacala e ra]

BAU VAKASAMATAKA?

◼ Na cava meda kua ni sokaloutaka kina na ka e okati me matakau?​—Same 115:4-8; 1 Joni 5:21.

◼ Me sokaloutaki vakacava na Kalou?​—Joni 4:24.

◼ O na kila vakacava na ka dina baleta na Kalou? Ena yaga vakacava?​—Joni 8:32; 17:3.