Cava e Vaka vu Veisei Kina na ka Vakapolitiki?—Cava e Kaya na iVolatabu?

E vakilai e veiyasa i vuravura na veisei vakapolitiki. A caka ena 2022 e dua na vakadidike ena vanua ni vakadidike na Pew Research Center, qai laurai ni “65 na pasede na uabula ena 19 na vanua era kaya ni sega ni vakilai na duavata vei ira na tokona na duidui isoqosoqo vakapolitiki ena nodra vanua.”

Vakacava e vakilai tiko ena nomu vanua na veisei vakapolitiki? Cava e yaco kina qori? E tiko na kena iwali? Dikeva mada na ka e kaya na iVolatabu.

iTovo e vakavuna na veisei

E parofisaitaka na iVolatabu na gauna eda donuya tiko qo me “iotioti ni veisiga.” E levu era na vakaraitaka na itovo e dredre me vakilai kina na duavata.

• “Ni na duatani sara na iotioti ni veisiga, ena vakilai kina e levu na ka dredre. Nira na dau lomani ira ga na tamata, . . . era na sega ni via okati ena dua na veiyalayalati.”—2 Timoci 3:1-3.

Se mani vacava na nodra sasaga e levu, ena sega ga ni duavata na matanitu. Ena dredre vei ira e duatani na nodra rai mera cakacaka vata me wali na leqa. Sa tukuna tu mai na iVolatabu na ka ena yacovi ira.

• ’Ni veiliutaki na tamata e tini ga ina leqa.’—Dauvunau 8:9.

Ia e tukuna tale ga na iVolatabu na kena iwali, ya ni na veiliutaki e dua ena vakaotia na leqa e vakavuna na noda rarawa.

Lesi e dua na iliuliu e dau veikauaitaki

E tukuna na iVolatabu e dua na liuliu e vinaka duadua, ya o Jisu Karisito. E tu vua na kaukaua, lewa, e vinakata tale ga meda duavata kece na kawatamata qai vakila na vakacegu.

• “Ena nona siga era na buroro na yalododonu, ena qai vakilai na sautu.”—Same 72:7.

• “Era na qaravi koya.  . . na veimatanitu kece.”—Same 72:11.

O Jisu na iliuliu vinaka ni kauaitaki keda, e vinakata tale ga me vukei keda vakabibi o ira na vakalolomataki.

• “Na vakabula o koya na dravudravua e tagi ni kere veivuke, o koya tale ga na vakaloloma kei koya e sega ni vukei. Ena lomani ira na vakaloloma kei na dravudravua, ena vakabula tale ga na dravudravua. Ena vakabulai ira mai na veivakasaurarataki kei na ivalavala kaukaua.”—Same 72:12-14.

Saga mo kila eso tale na ka me baleta na Matanitu ni Kalou ena liutaka o Jisu. Raica na sala ena yaga kina vei iko, qai tokona na kena veiliutaki.

• Sarava na vidio Na Cava na Matanitu ni Kalou?

• Wilika na ulutaga “Matanitu Sega ni Cakacaka Vakailawaki.”