**Rawa ni Vakaduavatataki Keda na Sotasota ni Olympic?—⁠Cava e Kaya na iVolatabu?**

Donuya na sotasota ni qito na Summer Olympic 2024, e rauta ni lima na bilioni era saravi ira na dauqito era vakaitavi kina mai na 206 na vanua. E kaya o Thomas Bach na peresitedi ni isoqosoqo ni Olympic: “Qo e dua na soqo e vakaduavatataki keda e veiyasa i vuravura me vakilai kina na vakacegu. Meda marautaka ena duavata na qito qo, dina ga ni duidui na vanua eda cavutu mai kina.”

Vakacava e laurai dina qori ena sotasota ni Olympic? E vakilai kina na vakacegu kei na duavata?

**Vakacava e vakilai na vakacegu kei na duavata ena Olympic?**

Na Olympic ni yabaki qo sa sega ni baleta ga na qito. Sa lai vakabibitaki tale kina na veika vakapolitiki kei na sasaga vakatamata qai vakavuna na veisei. Qori e okati kina na dodonu ni lewenivanua, veivakaduiduitaki, na veivakasaurarataki, kei na veivakaduiduitaki vakalotu.

E dau caka na veivakamarautaki ena sotasota ni qito lelevu me vaka na Olympic. Ia sa laurai tale ga kina ni uqeta na yalo ni veisei, qai sega ni vakilai kina na vakacegu kei na duavata.

E parofisaitaka na iVolatabu na nodra itovo na tamata ena vakadredretaka me vakilai na duavata. (2 Timoci 3:1-5) Mo kila eso tale na ka e parofisaitaka na iVolatabu, wilika na ulutaga “Vakacava sa Parofisaitaki tu na Nodra iTovo e Levu Nikua?”

iNuinui dina ni vakacegu kei na duavata

E tukuni ena iVolatabu na inuinui dina me baleta na vakacegu, kei na duavata e veiyasa i vuravura. E yalataka tale ga nira na duavata kece na lewenivanua ena veiliutaki ni matanitu vakalomalagi, e vakatokai “na Matanitu ni Kalou.”—Luke 4:43; Maciu 6:10.

O Jisu Karisito na Tui ni Matanitu ni Kalou, ena kauta mai na vakacegu e vuravura taucoko. E kaya na iVolatabu:

“Era na buroro na yalododonu, ena qai vakilai na sautu.”—Same 72:7.
“Ni na vakabula o koya na dravudravua e tagi ni kere veivuke . . . Ena vakabulai ira mai na veivakasaurarataki kei na ivalavala kaukaua.”—Same 72:12, 14.

Nikua, sa vakaduavatataki ira e vica vata na milioni na ivakavuvuli i Jisu ena 239 na vanua. Era sa vulica na iVakadinadina i Jiova e veiyasa i vuravura na sala mera veiyaloni kina. E rawa vakacava qori? Wilika na Vale ni Vakatawa “Sala ena Oti Kina na Veicati.”