Ena Wali na Leqa kei Vuravura ena Kakana o Digia?—Cava e Kaya na iVolatabu?

Ena gauna qo, e levu e veiyasa i vuravura era taleitaka na ivakarau ni bula na vegan. Qori mera kania ga na kakana draudrau, sega ni lewenimanumanu, se dua na ka e caka mai kina.

•  “O ira na vegan era saga ena nodra vinaka taucoko mera kua ni vakayagataka na manumanu me kakana, me isulu se so tale na ka. Qori na ka era vakabauta qai laurai sara ga qori ena nodra ivakarau ni bula.”—mai na isoqosoqo The Vegan Society.

Eso tale era muria na ivakarau ni bula qori mera bulabula kina vakayago, me taqomaki kina na veika bula, se nodra vakabauta sara ga vakalotu.

•  “Na vegan e duatani mai na so tale na ivakarau ni kana musu, baleta e dau raici vakalevu me dua na mataqali vakabauta, digidigi, kei na sasaga me vakavinakataki kina na ituvaki ni vuravura.”—Britannica Academic.

Vakacava, qori sara ga na iwali ni leqa kei vuravura, na ivakarau ni bula na vegan? Cava e kaya na iVolatabu?

Nona rai na Dauveibuli me baleta tamata kei na manumanu

E kaya na iVolatabu ni o Jiova na Kalou e Dauveibuli.a E raici keda meda uasivi ira na manumanu, e lesi keda tale ga meda lewai ira. (Vakatekivu 1:27, 28) Toso na gauna, e vakadonuya na Kalou vua na tamata me kania na manumanu. (Vakatekivu 9:3) Ia e sega ni taleitaka meda vakalolomataki ira.—Vosa Vakaibalebale 12:10.

E kaya na iVolatabu meda dui vakatulewataka meda kana lewenimanumanu se sega.b Na noda digidigi qori e sega ni kena ibalebale nida na vinaka kina vei ira eso tale ena mata ni Kalou. (1 Korinica 8:8) E sega ni dodonu meda vakalewa e dua ena ka e digia me kania.—Roma 14:3.

Na iwali me vinaka kina na vuravura

E vakaraitaka na iVolatabu, ni ivakarau ni bula eda digia ena sega ni wali kina na leqa e vuravura. E levu na leqa qori e vu ena ka vakapolitiki, leqa ni veimaliwai kei na ka vakailavo. E sega ni dua vei keda ena walia rawa qori. E kaya na iVolatabu:

•  “Na ka e veve e sega ni vakadodonutaki rawa.”—Dauvunau 1:15.

Na Dauveibuli duadua ga ena walia na leqa kece e vuravura. Na iVolatabu e vakayagataka e dua na vosa vakatautauvata me vakamacalataka na ka ena vakarau cakava.

•  “Au qai raica na lomalagi vou kei na vuravura vou, ni sa takali na lomalagi kei na vuravura a tu e liu, sa sega tale ga na wasawasa.”—Vakatakila 21:1.

Na Kalou ena sosomitaka na matanitu vakatamata, ya na ‘lomalagi a tu e liu’ ina “lomalagi vou,” ya na nona Matanitu vakalomalagi. Na Matanitu qori ena kauta laivi “na vuravura a tu e liu,” ya o ira na tamata ca, ena qai lewa na “vuravura vou,” ya o ira na talairawarawa ena kena veiliutaki.

Na veiliutaki duadua ga ni Matanitu ni Kalou eda na qai kila kina na kawatamata na sala meda veiyaloni kina kei ira na manumanu, meda taqomaka tale ga na veika bula.—Aisea 11:6-9.