Tikoyavavala Vakapolitiki—Cava e Kaya na iVolatabu?

Sa qai levu tiko ga nodra vakacacani na vakailesilesi vakamatanitu.

Cava e levu kina na tikoyavavala vakapolitiki? Vakacava ena rawa ni oti? Na cava e kaya na iVolatabu?

Parofisaitaki na veileqaleqati vakapolitiki

E parofisaitaka na iVolatabu nida donuya tu qo na gauna e vakatoka me “iotioti ni veisiga.” E levu gona era na vakaraitaka na itovo e vakavuna na itovo voravora kei na veileti.

• ‘Ni na duatani sara na iotioti ni veisiga, ena vakilai kina e levu na ka dredre. O ira na tamata era na sega ni . . . dau vakavinavinaka, era na sega ni yalodina, . . . era na sega ni via okati ena dua na veiyalayalati, . . . era na voravora, . . . era na dau veiliumuritaki, era na domoqa, era na dokadoka.’—2 Timoci 3:1-4.

E parofisaitaka tale ga ni na yaco vakalevu ena gauna qo na vakaduiduile kei na tikoyavavala. (Luke 21:9) Ia ena wali na leqa qori.

Ena oti na tikoyavavala vakapolitiki

E kaya na iVolatabu na Kalou sa vakarau sosomitaki ira kece na matanitu vakatamata ena nona matanitu.

• “Ena vakarautaka na Kalou ni lomalagi e dua na matanitu. . . ena vurumemeataka, ena vakawabokotaki ira na veimatanitu kece qori, ena tu ga me tawamudu.”—Taniela 2:44.

Ena vakaduavatataki keda na Matanitu ni Kalou qai tauyavutaka na bula sautu e vuravura taucoko.

• O Jisu Karisito na kena iLiuliu e vakatokai na “Turaga ni Sautu,” ena vakadeitaka tale ga ni na ‘vakilai tu ga na sautu.’—Aisea 9:6, 7.

• Ena gauna qo, o ira na vakarurugi ena Matanitu ni Kalou era sa vulica tiko na sala mera veiyaloni kina. E kaya kina na iVolatabu: “Era na tukitukia na nodra iseleiwau me batinisiviyara kei na nodra moto me isele ni sasamaki. Ena sega ni lave iseleiwau e dua na matanitu ina dua na matanitu era na sega ni vulica tale na ivalu.”—Aisea 2:3, 4.

Mo kila eso tale na ka wilika na ulutaga, “Na Cava ena Cakava na Matanitu ni Kalou?” qai sarava na vidio Na Cava na Matanitu ni Kalou?