Na Cava e Kaya na iVolatabu me Baleta na Tatu?

Kena iSau Vakaivolatabu

E tukuni ga vakadua ena iVolatabu na vosa tatu, e kaya na Vunau ni Soro 19:28: ‘Ni kua ni tatutaka na yagomuni.’ E veivakaroti na Kalou vei ira na Isireli me vakaduiduitaki ira gona mai na veimatanitu era tavalaka e yagodra na yaca se ivakatakilakila ni nodra Kalou. (Vakarua 14:2) E sega ni okati na lotu vaKarisito ena Lawa e soli vei ira na Isireli ia e bibi meda kauaitaka na ivakavuvuli ena lawa qo.

E dodonu me tatu se vakavola na yagona na lotu vaKarisito?

Dikeva mada e vica na tikinivolatabu qo, me saumi kina na taro:

• ‘Mera vakaisulutaki ira ena isulu matau na yalewa.’ (1 Timoci 2:9, Veiyalayalati Vou) Na ivakavuvuli qo e yaga ruarua vua na yalewa kei na tagane. E dodonu meda doka na nodra nanuma eso tale, meda kua ni nanumi keda ga.

• Eso era tatu mera vakatakilakilataka kina nira duatani, eso tale era cakava qori me vakaraitaka nira lewai ira ga. Ia e uqeti ira na lotu vaKarisito na iVolatabu: “Moni solia na yagomuni me isoro bula, e savasava, e vakadonuya na Kalou, oya me vakayagataki ena veiqaravi tabu na nomuni vakasama kei na yalomatua.” (Roma 12:1) Vakaraitaka na “yalomatua” ena nomu vakalewa vinaka na vuna mo tatutaka kina na yagomu. Ke o veimurimuri ga se mo vakaraitaka kina ni o lewe ni dua na ilawalawa, o na veivutunitaka. O na rawa ni vakatulewa vakavuku ke o vakasamataka vinaka na nomu inaki.—Vosa Vakaibalebale 4:7.

• “Na lalawa ni tamata gumatua ena tini vinaka ga, ia o ira kece era vakusakusa era na dravudravua.” (Vosa Vakaibalebale 21:5) Eso era dau vakatulewataka vakatotolo mera tatutaka na yagodra, ia e muri ena rawa ni vakaleqa na nodra cakacaka kei na nodra veimaliwai. E sau levu qai mosi ni sagai me boko. E laurai ena dua na vakadidike kei na bisinisi ni boko tatu ni levu era veivutunitaka nodra tatutaka na yagodra.