Era Veisautaka na iVakadinadina i Jiova na iVolatabu me Ganita Nodra Vakabauta?
Sega. Keimami veisautaka ga neimami vakabauta ni sega ni salavata kei na ka e tukuna na iVolatabu.
Keimami sa dau dikeva tiko mai na iVolatabu ni bera ni tekivu tabaki na New World Translation of the Holy Scriptures ena 1950. Keimami dau vakayagataka na ivakadewa era sa tu me yavutaki kina na neimami vakabauta. Dikeva qo eso na ka keimami vakabauta, qai raica ke tautauvata kei na ka e tukuna na iVolatabu.
Ka keimami vakabauta: E sega ni dua na letoluvakalou. E tukuni ena itabataba ni Zion Watch Tower ni Julai, 1882: “Era kila na dauwiliwili ni keimami vakabauti Jiova, Jisu, kei na yalo tabu. Keimami cata na ivakavuvuli e sega ni vakaivolatabu, ya ni tolu na Kalou ratou qai lewe dua ga, se me vaka era kaya eso, na Duatolu Tabu.”
Ka e kaya na iVolatabu: “O Jiova na noda Kalou o Jiova e dua bau.” (Vakarua 6:4, The Holy Bible, ilavelave ni iVolatabu i Robert Young) “Ia vei keda e dua bau ga na Kalou, na Tamada e vu vei koya na ka kece, eda sa bula tiko ena vukuna. E dua bau ga na Turaga, o Jisu Karisito, e vu mai vei koya na ka kece ga, eda sa bula tiko ena vukuna.” (1 Korinica 8:6, American Bible Union Version) E vakamatatataka o Jisu: “E levu cake vei au o Tamaqu.”—Joni 14:28, Douay-Rheims Version.
Ka keimami vakabauta: E sega na veivakararawataki tawamudu i eli. E cavuti ena Roma 6:23 ni King James Version ena itabataba ni Zion Watch Tower ni June 1882, ena ulutaga The Wages of Sin Is Death: “E matata qai rawarawa na itukutuku qori. Ia ka ni rarawa e levu era okata na iVolatabu me Vosa ni Kalou, era vakacala qori. Ra qai vakabauta ni tukuna na iVolatabu ni isau ni ivalavala ca na vakararawataki tawamudu i eli.”
Ka e kaya na iVolatabu: “O koya e valavala ca ena mate.” (Isikeli 18:4, 20, King James Version) O ira na saqata na Kalou era na sega ni vakararawataki tawamudu, ia era na “vakarusai tawamudu” ga.—2 Cesalonaika 1:9, King James Version.
Ka keimami vakabauta: Na matanitu ni Kalou e dua dina na matanitu, e sega ni ivakarau ni lomana e dua. E tukuni ena itabataba ni Zion Watch Tower ni Tiseba 1881, me baleta na Matanitu ni Kalou: “Na tauyavu ni matanitu qori ena vakarusa kece na matanitu e vuravura.”
Ka e kaya na iVolatabu: “Ena nodra gauna na tui oya ena qai vakatura na Kalou ni lomalagi e dua na matanitu, ena sega sara ni vakarusai rawa. Na matanitu oya ena sega ni biu tu me nodra na tamata tani, ia ena vurumemeataka ga qai vakaotia na veimatanitu qori, ena tu ga ka sega ni mudu.”—Taniela 2:44, King James Version.
E vakatau ena Vakadewa ni Vuravura Vou na yavutaki ni nodra vakabauta?
Sega. Keimami se vakayagataka tiko ga e levu na ivakadewa ni iVolatabu ena neimami cakacaka vakavunau. Keimami solia na Vakadewa ni Vuravura Vou me caka kina na vuli iVolatabu e sega ni saumi. Keimami marautaka tale ga ni vakavulici ira na via vakayagataka eso tale na ivakadewa ni iVolatabu.