Na Cava na Parofisai?

Kena isau vakaivolatabu

Na parofisai e vosa uqeti ni Kalou, e vakatakilai kina na loma ni Kalou. E kaya na iVolatabu o ira na parofita era “tukuna . . . na ka e vinakata na Kalou ena veiuqeti ni yalo tabu.” (2 Pita 1:20, 21) Na parofita e dau ciqoma na itukutuku ni Kalou, qai vakasavuya vei ira eso tale.—Cakacaka 3:18.

Era ciqoma vakacava na parofita na itukutuku mai vua na Kalou?

E vakayagataka na Kalou e levu na iwalewale me vakasavuya kina nona vakasama vei ira nona parofita:

• Volai. E vakayagataka na Kalou na iwalewale qo ena nona solia vei Mosese na iVunau e Tini e volai.—Lako Yani 31:18.

• Era veivosaki kei na agilosi. Kena ivakaraitaki, na Kalou e vakayagataka na agilosi me kaya vei Mosese na itukutuku me lai vakasavuya vei Fero e Ijipita. (Lako Yani 3:2-4, 10) Ke bibi me volai na malanivosa yadua, ena vakayagataki ira na agilosi na Kalou mera vakadewataka nona itukutuku. A cakava qori vei Mosese ena nona kaya: “Mo vola na vosa qo, niu cakava tiko e dua na veiyalayalati kei iko kei ira na Isireli, me vaka ga na vosa qo.”—Lako Yani 34:27.a

• Raivotu. Ena so na gauna e dau vakaraitaki na raivotu nira yadra tiko na parofita ra qai kilai yalodra. (Aisea 1:1; Apakuki 1:1) Eso e matata tu vei ira nira vakaitavi sara tiko ga kina. (Luke 9:28-36; Vakatakila 1:10-17) Eso tale e dau yaco nira sega tu ni vakilai ira. (Cakacaka 10:10, 11; 22:17-21) E vakadewataka tale ga na Kalou nona itukutuku vei ira na parofita ena tadra nira moce tu.—Taniela 7:1; Cakacaka 16:9, 10.

• Dusimaki nodra vakasama. E dusimaka na Kalou nodra vakasama nona parofita mera vakasavuya nona itukutuku. Qo na ka e kaya na iVolatabu: “E vakavuna na Kalou na iVolatabu kece.” Na matavosa “vakavuna na Kalou” e rawa ni kena ibalebale tale ga, “ceguva na Kalou.” (2 Timoci 3:16; The Emphasised Bible) Na Kalou e vakayagataka na yalona tabu, se igu tawarairai, me “ceguva” nona nanuma vei ira nona dauveiqaravi. E nona na Kalou na itukutuku, ia era digia na parofita na vosa.—2 Samuela 23:1, 2.

Vakacava e vakaibalebaletaki ena parofisai ni Kalou na veika kece ena yaco ena gauna se bera mai?

Sega, na parofisai vakaivolatabu e sega ni yalani ga ena veika ena yaco ena gauna se bera mai. Ia ke sega mada ga ni laurai levu e se okati tiko ga e levu nona itukutuku na Kalou ena veigauna se bera mai. Kena ivakaraitaki, era veivakasalataki na parofita ni Kalou vei ira na Isireli ena nodra ivakarau ca. Na ivakaro qori e vakaibalebaletaka na veivakalougatataki era na vakila ena gauna se bera mai ke ra veisautaka nodra ivakarau. (Jeremaia 25:4-6) Ena vakatau sara ga nodra vakabulai ena ka era na cakava.—Vakarua 30:19, 20.

Parofisai e sega ni vakaibalebaletaki ina ka e se bera ni yaco

• Ena dua na gauna era kere veivuke na Isireli, mani tala na Kalou e dua na parofita me kaya vei ira ni na sega ni vukei ira na Kalou nira sega ni muria nona ivakaro.—Dauveilewai 6:6-10.

• Ni veivosaki tiko o Jisu kei na dua na yalewa ni Samaria, e kaya vua na ka e dau cakava ena gauna sa oti. E vakadeitaka sara ga na yalewa ni Samaria ni o Jisu na parofita, dina ga ni se sega ni tukuna rawa na veika se bera ni yaco.—Joni 4:17-19.

• Na gauna e lewai kina o Jisu, era ubia na matana na kena meca, mokulaki koya, ra qai kaya: “Parofisai mada. O cei e sabaki iko?” Era sega ni kaya tiko me tukuna o Jisu na veika ena yaco ena gauna se bera mai, ia me tukuna ga ena nona kaukaua o cei e mokuti koya.—Luke 22:63, 64.