Veivutunitaka na cauravou na ka e tukuna, ia sa bera

RA TAROGA NA ITABAGONE

Na Cava e Dau Cala Kina na ka au Kaya?

“Ena so na gauna au dau lewa vinaka na ka au kaya, ia so tale na gauna e berabera noqu vakasama, e totolo noqu vosa!”—James.

“Keu taqaya tiko, au na sega ni vakasamataka vinaka na ka au kaya, ia niu sega ni taqaya ena sivia tale na ka au kaya. Sa cala tu ga ena veigauna.”—Marie.

E kaya na iVolatabu: “Na yame . . . e bukawaqa” qai “rawa ni yameca na veikau levu na yameyame lailai!” (Jemesa 3:5, 6) Vakacava e dau vakaleqai iko ena so na gauna na ka o kaya? Ke yaco qori, ena rawa ni yaga vei iko na ulutaga qo.

Cava e dau cala kina na ka au kaya?

Nida sega ni uasivi. E kaya na iVolatabu: “Eda dau tarabe kece. Ke dua e sega ni tarabe ena vosa, e uasivi o koya.” (Jemesa 3:2) Nida sega ni uasivi e dau rawarawa noda tarabe, e cala tale ga na ka eda kaya.

“Ni sega ni uasivi noqu vakasama kei na yamequ, ena ka vakalialia meu kaya niu dau lewai rau vinaka.”—Ana.

Karakivosa. E kaya na iVolatabu: “Ni levu na vosa, ena sega ni tarovi rawa na cala.” (Vosa Vakaibalebale 10:19) O ira na karakivosa ra qai sega ni dau vakarorogo, ena rawa sara ga ni tau cala na ka era kaya, qai veivakacudrui.

“Ena so na gauna era sega ni dau vosa vakalevu na tamata vuku. O Jisu mada ga na turaga vuku duadua e vuravura qo, ia e tiko na gauna e galu kina.”—Julia.

Vosa ni veivakanini. E kaya na iVolatabu: “Na vosa vakalialia e vaka na isua ni iseleiwau.” (Vosa Vakaibalebale 12:18) Dua na ivakaraitaki ni vosa vakalialia na veivakanini, qori na vosa gaga ni veibeci. O ira na dau vosa va qori era na rairai kaya, “Seti, au veiwali ga!” Ia e sega ni dodonu meda dredrevaka nona vosa beci e dua. E kaya na iVolatabu meda muduka na “vosavakacaca kei na ka ca kece va ya.”—Efeso 4:31.

“Au taleitaka na vakalutuvosa kei na vakalasalasa, e tini ga ena veivakanini. Ia levu na gauna au leqa tale kina.”—Oksana.

Saga tiko e dua na cauravou me tawana lesu na wainimate ni barasi bati ena kena itawatawa — Ni o sa cavuta e dua na ka, ena dredre mo veisautaka, e vaka ga ni o saga mo tawana lesu na wainimate ni barasi bati ena kena itawatawa

Lewa vinaka na ka o tukuna

E sega ni rawarawa nomu saga mo lewa vinaka na ka o kaya, ia e rawa ni veivuke na ivakavuvuli vakaivolatabu. Kena ivakaraitaki, vakasamataka mada qo:

“Me tu lo ga e lomamuni na ka oni via tukuna . . . moni galu ga.”—Same 4:4.

Eso na gauna e vinaka meda galu ga. E kaya e dua na goneyalewa o Laura: “E duidui na ivakarau ni lomaqu ena gauna au cudru kina, e duidui tale ga ni malumu noqu cudru. Ni oti qori, au dau marau niu sega ni kaya e dua na ka.” Ni o cegu mada ga vakalailai o na sega kina ni vosa vere.

“Vakacava e sega ni vakatovolea na vosa na daliga me vaka ni tovolea na kakana na yame?”—Jope 12:11.

Mo kua ni vakila na rarawa, vakasamataka mada e vica na taro qo ni bera ni o vosa:

Vakacava e dina? E ka vakayalovinaka? E veiganiti?—Roma 14:19.
Na cava noqu rai ke dua e tukuna vei au qori?—Maciu 7:12.
Ena dokai kina na nona rai e dua tale?—Roma 12:10.
E vanua vinaka qo me tukuni kina qori?—Dauvunau 3:7.

“Moni yalomalumalumu ena nomuni okati ira na kena vo mera uasivi kemuni.”—Filipai 2:3.

Na ivakasala qori ena donu kina nomu rai baleti ira eso tale, ena vukei iko mo kua ni vosa vakariri, mo vakasama tale ga eliu ni bera ni o vosa. Kevaka mada ga o sa cavuta e dua na ka mosimosi, na yalomalumalumu ena uqeti iko mo kere veivosoti ena gauna totolo duadua! (Maciu 5:23, 24) Qai saga mo caka vinaka tiko ga ni o lewa vinaka na ka o kaya.

Ka era kaya nomu icaba

“Ni carubi tu na veitalanoa, au dau qai tukuna e dua na ka e sega ni dodonu meu kaya. Ia keu wawa vakalailai meu vakasamataka nodra rai eso tale se na yaga vakacava ina veivosaki e caka tiko, au na lewa vinaka kina na ka au kaya.”—Taylor.

“Ke dua e kaya na ka e vakacudrui iko, e vinaka mo kila mada se cava na vuna e vosa kina va ya. Levu na gauna e vosa tu ga vakalialia, rawa ni o guilecava qori. Eso tale na gauna ena sega ni vinaka vei iko, ia de tiko na kena yavu vinaka. Ena wali ga na leqa qori ena veivosaki vakadodonu, e caka tale ga ena yalomalua.”—Brandon.

“Ena rawarawa noda sega ni tukuna na ka mosimosi, ke da sega ga ni dau vakasamataka. Eso na gauna e bibi meda dikeva vinaka na noda rai me baleta na ka e yaco, vaka kina noda rai me baleti ira eso tale. Ke da cakava qori, eda na sega ni temaki rawarawa meda kaya na veika mosimosi.”—Jessica.