IVAKASALA INA VUVALE
Vukei Luvemu me Vakavinakataka na Nona Cakacaka ni Vuli
E sega ni kauaitaka na vuli o luvemu, sega ni dau cakava tale ga nona lesoni se me vulica. Cava kena itinitini? E sega ni pasi vinaka, e qai ca ga nona ivakarau. O na vukei koya gona vakacava me vakavinakataka nona cakacaka ni vuli?
Ka mo kila
Vakalevutaka na leqa ke ra vakaukauataki. Ni o vakaukauataki luvemu me cakava na ka, ena vakavuna me lomaocaoca e koronivuli vaka kina e vale! Ena rawa ni lasu, vunitaka ni lailai na kena maka ni veitarogi, duatani e saini ena nona ripote ni veitarogi, se dau vakalutu vuli, me kua kina ni lomaocaoca. Ena ca ga vakalevu na leqa qori.
Rawa ni veivakaleqai ni vakaicovitaki. E kaya e dua na tama o Andrew: “Ke pasi vinaka o luvei keirau ena vakaicovitaki ni keirau nanuma ni na uqeti koya qori. Ia e vakavuna tale me kauaitaka vakalevu na icocovi. Ke sega ni pasi vinaka, ena rarawataka nona sega ni vakaicovitaki, sega ni kena maka.”
Ena sega ni yaga ke beitaki o qasenivuli. Ena rawa ni nanuma o luvemu ni sega ni vinakati na sasaga me rawata vinaka nona ka ni vuli. Ena rairai beitaka tale e dua ena nona cala, se namaka mera vukei koya eso tale. Sa rawa sara ga ni vakawalena kina na ka bibi me cakava ni sa uabula, oya me colata na vua ni nona ivalavala.
Ka o rawa ni cakava
Lewa vinaka na lomamu. Ke o cudru, vakadaroya nomudrau veivosakitaka kei luvemu na macala ni nona veitarogi. E kaya e dua na tama o Brett: “Ni keirau yalovinaka tu qai vakaraitaka na loloma vakaveiwatini ena vinaka kina na veivosaki.”
iVakavuvuli vakaivolatabu: “Me totolo ni vakarorogo na tamata yadua, me berabera ni vosa, me berabera ni cudru.”—Jemesa 1:19.
Kila na vu dina ni leqa. E vakavuna vakalevu nodra dau sega ni rawata na maka vinaka na gonevuli, oya nira dau veivakasagai na nodra icaba, veisau nodra koronivuli, lomaleqataka nodra veitarogi, sega ni moce vinaka, sega nodra ituvatuva dei, rawarawa tale ga nodra vakamuai. Kua gona ni totolo mo nanuma ni vucesa o luvemu.
iVakavuvuli vakaivolatabu: “O koya e yalomatuataka na ka ena kunea na ka vinaka.”—Vosa Vakaibalebale 16:20.
Me tiko na vanua vinaka ni vuli. Me tiko na ituvatuva ni caka lesoni kei na vuli. Me dua na vanua e rawa ni cakava kina nona lesoni me kua tale ni dua na ka e vakasosani koya tiko (okati kina na tivi kei na mobail). Wasewasea na nona lesoni mera leleka tale ga, me kua kina ni ciri nona vakasama. E kaya e dua na tama mai Jamani o Hector: “Ke vakarau veitarogi o luvequ, keirau na railesuva vata eso nona lesoni e veisiga, me kua ga ni caka ni sa voleka na siga ni veitarogi.”
iVakavuvuli vakaivolatabu: “E vagauna na ka kece ga.”—Dauvunau 3:1.
Uqeti koya me dau vulica nona lesoni. Na nona kila vinaka o luvemu ni yaga vua na vuli lesoni ena gauna qo, ena uqeti koya me vuli. Kena ivakaraitaki, na lesoni ni fika ena vukei koya me wasewasea vinaka na ilavo e soli vua me vakayagataka.
iVakavuvuli vakaivolatabu: “Mo rawata na vuku, mo rawata na yalomatua . . . Mo mareqeta vinaka.”—Vosa Vakaibalebale 4:5, 8.
Vakatutu: Vukei luvemu ena nona lesoni, kua ga ni cakava vua. E kaya o Andrew: “Dau vinakata o luvei keirau me keirau cakava nona lesoni, e sega ni via cakava ga vakataki koya.” Mo vakavulici luvemu gona me cakava ga nona lesoni.