Ratou Sotava na iTuvaki Rarawataki ia Ratou Vakila Tale na Marau

Au sega sara ga ni kila na itavi vakatama ni sucu na neirau ulumatua o Lauren. E va tale ga qori ena gauna e sucu kina na luvei keirau tagane o Michael. Niu se gone, rau dau veiba vakalevu na noqu itubutubu, rau tini veisere sara. Au vinakata meu dua na ulunivuvale vinaka, ia au sega ni kila na ka meu cakava.

Niu se itabagone, au bobula ena alakaolo kei na wainimategaga. Niu sa uabula, au se sega ga ni lewa vinaka na noqu bula. Au bobula tale ga ena veimauilavo, vakavuna meu sotava e levu tale na leqa. E sega ni vosota rawa o Kaye na torosobu ni noqu itovo, e mani biubiu kei rau na gone. Au rarawa sara ga.

Au tarogi Kaye se cava meu cakava me rawa ni lesu mai. Gauna qori sa vuli iVolatabu tiko kei Gloria e dua na iVakadinadina i Jiova, e kaya sara vei au o Kaye: “Vulica na iVolatabu.” Au sega ni via vulica na iVolatabu, ia au kila ni qori ga na sala ena lesuvi au mai kina. Au mani vakadonuya meu sotavi Gloria, kei na watina o Bill.

Veisau na Noqu Bula ena Neitou Veitalanoa

Ni rau gole mai vale o Bill kei Gloria, au qoroya na nodrau veivolekati vakaveiwatini. Au rogoca tale ga ni ratou vakayagataka vinaka tiko nodratou bula e tolu na luvedrau, keitou via yabaki vata ga. Qo se qai imatai ni gauna meu vakasamataka ni na rawa ni marau na neitou vuvale, ke keitou muria na ivakavuvuli vakaivolatabu.

Nodrau veisiko mai o Bill kei Gloria keitou veitalanoataka na ituvaki au sotava tiko. Rau wilika sara vei au na Kalatia 6:7: “Na ka kece e kaburaka e dua ena tamusuka tale ga.” Au vakasamataka, ‘Keu muria tiko na ivakavuvuli qori, au na sega ni sotava e levu na leqa!’

Toso na gauna, au raica ni yaga vakalevu noqu muria na ivakavuvuli vakaivolatabu. Keirau sa muduka kei Kaye na kana tavako, au muduka tale ga eso na ka au bobula tu kina. Ena 1985, e sucu na ikatolu ni luvei keirau tagane o David, e dau kacivi tale ga ena Davey. Au sa qai kila na ka meu cakava meu dua kina na tama vinaka.

Duavata ena Qaravi Jiova

Ni keirau vakavulici ratou na gone me baleti Jiova, keirau raica kei Kaye ni vakavolekati keirau tale ga vua. E yaga tale ga vei keirau na ivola vakaivolatabu, me vaka na Vakarorogo Vua na Qasenivuli Levu! Era ivakaraitaki vinaka tale ga vei keitou o ira na vuvale ena ivavakoso.

Toso na gauna, ratou painia kece na gone. Ena itekitekivu ni 2004, sa lewena o Lauren na ivavakoso vosa vakaSipeni. E biubiu mai Peceli o Michael me rau vakamau kei Diana, rau toki sara i Guam me rau veivuke ena cakacaka vakavunau. O Davey sa yabaki 19, e veiqaravi tiko vakatabakidua ena Dominican Republic.

Keirau marautaka kei Kaye na vakatulewa ratou cakava na gone. Keirau vakadinadinataka na ka e tukuni ena 3 Joni 4: “Sega tale ni dua na ka au marautaka vakalevu: niu rogoca nira muria tiko ga na ka dina na luvequ.” Ia keirau sega ni tadra ni na veisautaka na neirau bula e dua ga na qiri.

iTuvaki Rarawataki

Ena ika24 ni Epereli 2004, keirau gole kei na rua na veiwatini me keitou lai vayakavi ena dua na valenikana. E sivia ni 100 na kilomita na kena yawa, keitou mani vodo ena noqu motoka. Oti na vayakavi, keitou gole ena dua tale na valenikana me keitou lai kana vakalomavinaka. Au vaqara sara e dua na vanua me kele kina na motoka. E mani taqiri na noqu talevoni, qai vosa mai e dua noqu itokani. Au kila ena rorogo ni domona ni rarawa.

E kaya: “E sotava dua na vakacalaka o Davey.”

Dua na ka noqu rere qai taroga: “E mavoa levu?”

E dredre sara ga me sauma noqu taro. Oti e qai kaya ni sa mate o Davey.

Oti neirau veivosaki au masuti Jiova me vakaukauataki au. Au gole i valenikana qai kaya vei ratou na kena vo niu sega ni bula vinaka tiko, me keitou sa lesu tale i vale. Au vinakata meu tukuna vei Kaye na ka me baleti Davey ni keirau tiko taurua ga.

Sa bau dredre sara ga vei au na neitou golegole lesu. E talanoataka tiko o Kaye vei ratou na veiwatini na nona nanamaki tiko ena nona gade mai vale o Davey. Gauna vata qori, e levu era sa vakau text mai ni veivakacegui ena noqu talevoni, ia e se bera ni kila tiko o Kaye ni sa mate o Davey.

Oti neirau biuti ratou mai na veiwatini, keirau lesu i vale. E raici au o Kaye qai kila ni dua na leqa e yaco. E taroga: “E vacava?” Au kila ni na vakararawataki koya na ka au na tukuna, me vaka ga na noqu rarawa ena rua na aua sa oti.

Vosota Neitou Lolosi

Levu na ka dredre keirau sa sotava kei Kaye, keirau kila tale ga ni o Jiova ena vukei keirau. (Aisea 41:10, 13) Ia e duatani sara na kena keirau sotava qo. Au vakasamataka tu ga, ‘E levu na ka sa cakava o Davey ena vuku i Jiova, e rawa vakacava ni yacovi koya qo? Cava e sega ni taqomaki koya kina o Jiova?’

Rau rarawa tale ga vakalevu o Lauren kei Michael. O Davey e vaka ga e luvei Lauren ena nodrau dau veivolekati, sa bau mositi rau dina na luvequ na nona mai takali na tacidrau. E rauta ni lima na yabaki nona sega ni tiko i vale o Michael, ia e marautaka ni raica nona toso o Davey me dua na tagane matua.

E totolo ga nodra vukei keitou na mataveitacini ena ivavakoso. Kena ivakaraitaki, dina ni sega tiko ga ni vakabauta o Kaye nona mate o Davey, ia era gole mai vale na mataveitacini mera veivakacegui qai veivuke. (Vosa Vakaibalebale 17:17) Au na sega vakadua ni guilecava na loloma era vakaraitaka!

Me rawa ni keirau vosota vakaveiwatini na neirau lolosi, keirau dau masu wasoma, vuli iVolatabu qai tiko ena soqoni vaKarisito. E sega ni seavu sara na neirau rarawa, ia keirau kila ni bibi me keirau cakava tiko ga na ka me keirau volekati Jiova kina.—Filipai 3:16.

Ena gauna qori, rau toki voleka mai vei keirau o Michael kei Diana. Keitou sa mai vavakoso vata tale ga kei Lauren. Na neitou veivolekati ena vica na yabaki e tarava, e vukei keitou me keitou vosota na neitou lolosi. Oti e vakamau o Lauren, e dau tokoni keitou tale ga vakalevu na watina o Justin.

Dua na iLakolako Dredre

Oti nona mate o Davey, keirau cakava e dua na ka e via dredre toka, ia e vukei keirau vakalevu. Ena talanoataka qori o Kaye.

“Ni tukuna vei au o watiqu ni sa mate o Davey, e vaka ga au lutu ena dua na qara buto, qai tu kina me dua na gauna balavu. E vusolo na lomaqu ena levu ni noqu rarawa, e sega ni rawa sara ga meu cakava noqu itavi e veisiga. Au sorova tu ga na tagi. Meu tukuna na ka dina, eso na gauna au dau cudruvi Jiova kei ira eso tale. E cala tale ga na noqu rai.

“Au via lako i Dominican Republic. Au vinakata meu lai tiko ena vanua e veiqaravi kina o Davey ni bera nona mate. Ia au se rarawa tiko ga, e sega tale ga vei au na kaukaua meu gole.

“E tukuna vei au e dua noqu itokani voleka nira lolosi tale tiko ga nona itokani o Davey ena Dominican Republic, era vinakata tale ga mera sotavi keitou na nona vuvale. Qori e vukei au sara ga meu lako.

“E yaga sara ga vei keitou vakavuvale na neitou gade qo. Keitou marau ni keitou rogoca ni dau vakaliuca o Davey nona veika vakayalo. E kaya e dua na qase ni ivavakoso ni dau nuitaki o Davey ena itavi e soli vua.

“Ni keitou gole ena vanua a tiko kina o Davey, era gole mai eso mera tukuna na veika vinaka e cakava vei ira. Au kila ni dauyalololoma, ia e tarai au sara ga na veika au rogoca qo ni vinakata o koya me muria voleka na we ni yava i Jisu.

“Keitou sotava tale ga e dua na turaga e vuli iVolatabu kei Davey. E tiko ena dua na vale lailai, sa davo tu ga vakadua ena loga ena vuku ni tauvimate. E dravudravua, ia era kaya na mataveitacini ni dau lomani koya o Davey, e dokai koya tale ga. Dua na ka noqu marau qai sakitaki koya!

“Sega ni rawarawa noqu gole ena Dominican Republic. Ia e yaga vakalevu na neitou lai wasea vei ira na itokani nei Davey na neitou lolosi, keimami veivakacegui tale ga. Qori e vakaseavutaka vakalailai na mosi keitou vakila.”

Veiuqeti na iVakaraitaki i Davey

E tabaki ena Yadra! ni Janueri 8, 2005, na italanoa ni nona mate o Davey, kei na nona veiqaravi ena Dominican Republic. Gauna ya, keitou sega sara tu ga ni kila ni na yaga vakalevu na kena italanoa vei ira eso tale. Kena ivakaraitaki, ena Me 2019, e qiriti keirau mai e dua na tacida tagane o Nick. Qo na ka e tukuna:

“Ena icavacava ni 2004, au vuli tiko ena sekeneri qai sega na noqu isausau vakayalo. Au sega sara ga ni marau. Au masuti Jiova me vukei au meu kua ni vakasabusabutaka noqu bula vakaitabagone. Oti ga vakalailai qori, au wilika na italanoa kei Davey ena Yadra! E saumi sara ga kina na noqu masu!

“Oti ga noqu vuli, au tekivu painia. Au cakava na noqu isausau meu vulica na vosa vakaSipeni, qai toki ena vanua e vinakati kina na veivuke. Toso na gauna, au lai veiqaravi e Nicaragua. Keirau tiko tale ga kei watiqu ena Koronivuli ni iTalatala ni Matanitu. Niu tarogi se cava e uqeti au meu painia, au dau tukuna na ivakaraitaki nei Davey.”

Keirau sotava tale ga e dua na tacida yalewa o Abi, a veiqaravi tiko ena otela keirau a tiko kina ena Soqo ni Veimatanitu ni 2019, e Buenos Aires, e Argentina. Keirau qoroya vakalevu kei Kaye nona veikauaitaki, kei na nona loloma. Keirau raica tale ga ni tautauvata na nona itovo kei Davey.

Dua na siga ni keirau lesu ena otela, keirau vakauta vua na link ni Yadra! me baleti Davey. Oti ga e vica na miniti, e kaya mai ni via vosa vei keirau. Keitou tuvanaka me keitou sota ena vanua ni wawa. E tonawanawa na matana qai tukuna vei keirau ni uqeti koya me painia na italanoa kei Davey. E tekivu painia sara ena Seviteba 2011, e veiqaravi tale ga ena yalava ribayawa. E kaya: “Keu vakila ni dredre na noqu ilesilesi, au dau wilika tale na kena italanoa.” E tiko tale ga vua e dua na kena ilavelave tabaki!

Keirau vulica ena ka keirau sotava qori, nida lewena e dua na vuvale e vuravura raraba. E sega tale ga ni dua na ka e uasivia noda duavata na tamata i Jiova!

E vakacegui keirau vakaveiwatini ni uqeti ira e levu na nona ivakaraitaki o Davey. E veiuqeti tale ga vei ira na itabagone mera yalorawarawa ni qaravi Jiova ena nodra vinaka taucoko. Rairai era sega ni kila ni yaga vakalevu vei ira eso tale na nodra gugumatua. Na nodra ivakaraitaki tale ga e uqeti ira e levu mera solia nodra vinaka kece vei Jiova.

“Vei Koya Era se Bula tu Ga”

E kaya o Jisu ena Luke 20:37, e vakatokai o Jiova me “Kalou i Eparama, na Kalou i Aisake, kei na Kalou i Jekope.” E sega ni kaya o Jiova ni nodra Kalou ga ena gauna era bula kina, ia e nodra Kalou ena veigauna kece ga! Na vuna? E kaya o Jisu ena tikina e 38: “Vei koya era se bula tu ga.”

Io, mai na nona rai o Jiova era se bula tu ga na nona dauveiqaravi yalodina. Qori e vakaraitaka ni vinakata sara ga me vakaturi ira! (Jope 14:15; Joni 5:28, 29) Au vakadeitaka ni qori tale ga na ka ena cakava o Jiova vei Davey, kei ira tale ga na nona dauveiqaravi era sa mate.

Au via raici Davey tale, vakabibi na nodrau sota tale kei Kaye. Sa bau mosimosi dina vua nona mai takali o Davey. E uqeti au vakalevu na ka e tukuni ena Luke 7:15: “E duri na cauravou qai vosa, mani soli koya sara o Jisu vei tinana.”

Ena Seviteba 2005, au tomani Kaye ena painia. Au marautaka niu painia vata kei watiqu, o rau na luvequ kei na watidrau. Ni keitou dua ga na vuvale, keitou dau veitokoni qai rai vakanamata ena vuravura vou me keitou sotavi Davey tale kina.