E VAKAYAGATAKI VAKACAVA NA NODA CAU

Taqomaki na Vale ni Soqoni ena Gauna ni COVID-19

OKOTOVA 1, 2022

“Sa vakatulewataka na iLawalawa Dauvakatulewa me tekivu ena imatai Epereli 1, mera uqeti na ivavakoso kece mera soqoni ena Vale ni Soqoni, vakavo ke tiko na vakatatabu ni matanitu.” Dua na ka nodra marautaka na iVakadinadina i Jiova e vuravura raraba na itukutuku qori e biu ena jw.org ena itekitekivu ni Maji 2022. Ia e se bera ni oti na matedewa na COVID-19.a Na veisau kei na iyaya cava e vinakati mera taqomaki kina na tiko ena Vale ni Soqoni? Sa oti tale ga e rua na yabaki na kena sega ni vakayagataki tu na Vale ni Soqoni, vakacava ena tu vinaka tu?

Io, sa ra vakavakarau tu na tacida me vica vata na vula ni bera ni caka tale na soqoni ena Vale ni Soqoni.

Duidui Vanua, Duidui na ka e Vinakati

Ni oti e dua na vula na kena tarovi tu na vakayagataki ni Vale ni Soqoni ena 2020, e tekivu dikeva na Tabana ni Tarataravaki e Veiyasa i Vuravura (WDC) na veisau ena kauta mai na COVID-19 ena vakayagataki ni Vale ni Soqoni, kei na ituvatuva mera taqomaki kina na tiko ena soqoni.

Na ka e vinakati ena dua yasa i vuravura e rawa ni duidui mai na ka e vinakati ena dua tale na vanua. E kaya o Matthew De Sanctis e veiqaravi ena WDC: “Ena so na yasa i vuravura, e lailai na vanua ni vuluvulu se sava ni liga. Ni sega na wai ena Vale ni Soqoni, ena vinakati me voli se kau mai na uciwai se toevu. Ena so na vanua, e tiko na lawa ni matanitu me baleta na vale e vakabatabatabataki, na cagi bulabula ena lomanivale, kei na ivakatakilakila ni tikobulabula kei na savasava.”

Era vakarautaka vakacava na tacida na ka e vinakati? E kaya o Matthew, “e yaga sara vakalevu na iwalewale e rawarawa qai sau lailai.” Kena ivakaraitaki mai Papua New Guinea, e vakarautaki na vokete e va gusu ni paipo me caka kina na vuluvulu. E rawa ni tawa kina e 20 na lita na wai. Na isau gona ni veika e vinakati ena dua na Vale ni Soqoni e 40 ga na dola na ilavo ni Merika. Ena Vale ni Soqoni e Aferika, e voli e sivia ni 6,000 na misini vinaka ni vuluvulu mai na dua na sitoa mai Esia.

iYaloyalo: 1. Na misini ni vuluvulu e vakayagataki kina na vokete kei na gusu ni paipo. 2. Erau savata na ligadrau na gonetagane qo kei na dua na tacida tagane ena misini ni vuluvulu. — Era ivakaraitaki vinaka na itubutubu vei luvedra ena tiko savasava

Eso tale na veisau e caka me vaka me biu se vakavinakataki na irinicagi kei na misini me solia na cagi bulabula ena Vale ni Soqoni. E levu na ivavakoso era volia na itautauri ni gusunivosa me kua kina ni veisoliyaki ena liga. E sagai me vakalailaitaki na vanua e tarai wasoma qai vakawainimate me tarova na dewa ni mate, me vaka na idoladola ni katuba kei na paipo. Eso na Vale ni Soqoni, era cobara ena vale ni vakacegu na paipo e porokaramutaki me dola ga vakataki koya ni dua e via vakayagataka. Mai Chile, na isau ni ka e vakarautaki ena Vale ni Soqoni yadua e rauta ni $1,400 na ilavo ni Merika.

E saumitaro tiko e dua na gonetagane ena Vale ni Soqoni ni vakayagataki na itautauri ni gusunivosa. E dara tiko o koya na mask kei ira na kena vo. — E sega ni veisoliyaki na gusunivosa ena liga

Era sega ni saga ga na tacida mera taqomaka vinaka na Vale ni Soqoni, ia era saga tale ga mera vakabula ilavo. Kena ivakaraitaki ena so na vanua, e sega ni lavaki na ivakacavacava ni misini ni vuluvulu kei na itautauri ni gusunivosa. Era vakayagataka vinaka qori na tacida. Era cakacaka vata na Valenivolavola ni Tabana mera vakabula ilavo nira volivoli ga vakaumauma. Era qai tuvanaka kei na noda Tabana Levu ni Volivoli (Global Purchasing) mera volivoli sara ga vei ira na buli iyaya, ni sau lailai qai dau yaco totolo yani.

E vakayagataka na tacida yalewa qo na misini ni vuluvulu ena Vale ni Soqoni. — Na misini ni vuluvulu

“Au Lomavakacegu Sara Ga”

Na ituvatuva e caka ena Vale ni Soqoni e taqomaki ira na gole yani, era lomavakacegu tale ga. E kaya o Dulcine, dua na tacida yalewa mai Peru ni a “rere vakalailai” ni tukuni meda sa lesu ina Vale ni Soqoni. E kaya, “Au a tauvi COVID-19 ni se qai tekivu ga na matedewa, au lomaleqa gona de qai tauvi au tale keu lako ina Vale ni Soqoni. Ia niu yaco yani ena Vale ni Soqoni, au raica na veika era sa vakarautaka tu na qase ni ivavakoso, me vaka na wainimate ni vuluvulu, na itautauri ni gusunivosa kei na ituvatuva me dau vakawainimate na Vale ni Soqoni ni bera na soqoni, ni oti tale ga. Au lomavakacegu sara ga.”b

Erau dara tiko na mask na tacida qo, erau vakawainimatetaka tiko na vanua e tarai wasoma ena Vale ni Soqoni. — Vakawainimatetaki na Vale ni Soqoni

E duidui na ituvaki e sotava o Sara, e dua na tacida yalewa mai Zambia. E kaya: “Ena vica na vula sa oti, e mate o watiqu ena COVID-19. Au lomaleqataka se na vakacava tu na imatai ni noqu soqoni ni sa yali o koya.” Ia na cava e qai yaco? E kaya: “Au vakadinadinataka ena noda soqoni ena Vale ni Soqoni ni tiko vata kei keda o Jiova. Au sa qai vakila ga vakalevu nodratou veivakayaloqaqataki, veivakacegui, kei na nodratou veitokoni na qase ni ivavakoso kei ira na vo ni tacida.”

Erau dara tu na mask na tacida yalewa qo, erau veimokomoko ena Vale ni Soqoni. Era laurai toka mai muri na tacida tagane kei na yalewa era va mask tale ga ra qai veimarautaki. — Marautaki na soqoni tale ena Vale ni Soqoni

Era vakavinavinakataka na tacida ena veiyasa i vuravura na nodra lesu ina Vale ni Soqoni. Oni vakavinavinataki vakalevu ena nomuni cau, e levu na cau qori e biu mai ena donate.jw.org. E rawa nira taqomaki vinaka kina na gole yani ena Vale ni Soqoni, ra qai lomavakacegu tale ga.

a Ena so na ituvaki, o ira e dredre mera tiko ena Vale ni Soqoni e rawa nira sema yani ni vakayagataki na internet se talevoni.

b Era uqeti tale ga o ira kece na tiko ena Vale ni Soqoni mera dara na mask.