3. Cava Era Sotava Kina na Rarawa na Tamata Vinaka?
Vuna e Bibi Kina
E sega ni dodonu mera sotava na veika rarawa na tamata vinaka. Eso era kaya ni tawayaga noda caka vinaka nida sotava tiko na rarawa.
Vakasamataka Mada
Eso era vakabauta nida na mate, qai sucu tale. O ira na tamata vinaka era na sucu tale mera vakila na marau, ia o ira na caka ca era na sucu tale mera sotava na rarawa. Era vakabauta tale ga ni rawa ni sotava e dua na tamata vinaka na rarawa ena vuku ni nona “cala makawa.” Ia . . .
Ke sucu tale e dua, qai guilecava na ka sa oti, cava me sotava tale kina na rarawa?
Cava na vuna eda saga kina vagumatua meda qarauna noda bula, se tarova na vakacalaka ke sa lewai oti tu noda bula ena ka eda cakava ena gauna sa oti?
MO KILA ESO TALE NA KA
Sarava ena jw.org na vidio, Na Cava e Vakatara Tiko Kina na Kalou na Rarawa?
Ka e Kaya na iVolatabu
Na rarawa e sega ni itotogi ni Kalou.
Ia eso na gauna eda na sotava na rarawa nida tiko ena dua na vanua cala, kei na gauna cala.
“Nira sega ni qaqa tu ga ena veitau na yavatotolo, se ra qaqa tu ga ena ivalu o ira era kaukaua, se ra kana tu ga o ira na vuku, se ra vutuniyau tu ga o ira na ulukaukaua, se ra vakadonui tu ga o ira na kilaka, ni dau yacovi ira kece na gauna kei na ka e sega ni namaki.”—DAUVUNAU 9:11.
Eda sotava tale ga na rarawa ena vuku ni ivalavala ca.
Levu era vakaibalebaletaka na “ivalavala ca,” ina dua na ka ca e cakava e dua. Ia e kaya na iVolatabu ni qori na keda ituvaki e vinaka se ca eda sucukaya mai.
“Au beitaki ena cala niu sucu mai, qai valavala ca mai na gauna e kunekunetaki au kina o tinaqu.”—SAME 51:5, iVakamacala e ra.
E vakaleqai keda vakalevu na ivalavala ca.
Na ivalavala ca e vakaleqa noda veiwekani kei na Dauveibuli, eda sega tale ga ni veiyaloni kei koya. Qori na vuna eda sotava kina e levu na rarawa, keda yadua kei na kawatamata taucoko.
“Niu via cakava na ka e dodonu, e tiko ga vei au na ca.”—ROMA 7:21.
“Nira vutugu ra qai rarawa tu na kabuli kece me yacova mai qo.”—ROMA 8:22.