Ganiti Ira Mera Veiliutaki ena Matanitu ni Kalou

“Oqo nai vakatakilakila ni lewa dodonu ni Kalou, mo dou vakabau kina mo dou yaga me rawata na matanitu ni Kalou.”​—2 CES. 1:5.

1, 2. Na cava sa lokuca tu na Kalou me baleta nodra lewai na kawatamata? O cei ena vakatauca na lewa oya?

A TIKO mai Aceni na yapositolo o Paula rauta na yabaki 50 S.K. E rarawa vakalevu ni raica ni sa robota tu na vanua na qaravi kalou lasu, mani tauca kina e dua na vunau momona. A vakavure vakasama dina na itinitini ni nona vosa vei ira ena nona kaya: “A sa vakarota [na Kalou] e na gauna edaidai vei ira na tamata kecega e na veivanua kecega me ra veivutuni; ni sa lokuca na siga, ena lewai vuravura kina e na lewa dodonu, vei koya na tamata sa lesia ko koya; a sa vakadinadina kina vei ira na tamata kecega, e na nona vakaturi koya cake tale mai na mate.”​—Caka. 17:​30, 31.

² E bibi meda vakasamataka nona sa lokuca tu na Kalou na siga me lewai kina na vuravura! A sega ni vakatakila o Paula vei ira mai Aceni na yaca i koya ena mai vakatauca na lewa, ia eda kila ni o Jisu Karisito​—sa vakaturi mai na mate. Ena macala ena nona vakataulewa o koya ena bula se rusa.

3. Na cava e veiyalayalati kina kei Eparama o Jiova, qai itavi bibi i cei na kena vakayacori?

³ Ena 1,000 na yabaki na Siga ni Lewa. Ena Tui ni Matanitu ni Kalou o Jisu qai veiliutaki kei ira e so tale ena yaca i Jiova. O ira na so tale oqori e digitaki ira o Jiova mai vuravura mera veiliutaki ra qai lewa vata kei Jisu me duanaudolu na yabaki. (Vakatauvatana Luke 22:​29, 30.) Tauyavutaka na Kalou na veika me baleta na nona Siga ni Lewa rauta na 4,000 na yabaki sa oti ni a veiyalayalati kei Eparama, na nona dausokalou yalodina. (Wilika Vakatekivu 22:​17, 18.) A tekivu vakayacori na veiyalayalati oqori ena 1943 B.S.K., a sega ni kila sara vakavinaka o Eparama na kena yaga vei keda na kawatamata. Ia nikua eda sa mai kila tu ena vuku ni veiyalayalati oya na itavi bibi e vakacolati kina na kawa i Eparama ena vakayacori ni inaki i Jiova, mera lewai kina na kawatamata.

4, 5. (a) O cei na imatai ni wase ni kawa i Eparama, na cava a kaya o koya baleta na veiliutaki ena Matanitu ni Kalou? (b) Gauna cava sa ra lumuti kina e so tale mera veiliutaki tale ga ena Matanitu ni Kalou?

⁴ Na imatai ni wase ni kawa i Eparama o Jisu na Mesaia, se Karisito​—a lumuti ena 29 S.K. (Kala. 3:​16) A vunautaka voli na Matanitu ni Kalou vei ira na Jiu me tolu veimama na yabaki. Ni vesu oti ga o Joni na Dauveipapitaiso, a vakaraitaka o Jisu ni so tale era na veiliutaki kei koya ena Matanitu ni Kalou. A kaya: “Mai na gauna i Joni na dauveipapitaiso ka yacova na siga oqo, sa rawa na matanitu vakalomalagi e na gugumatua, ia ko ira sa gumatua sara, era sa taukena.”​—Maciu 11:12.

⁵ Ia e vakavure vakasama na ka a cavuta o Jisu ni bera ni tukuni ira na “taukena” na Matanitu vakalomalagi: “Au sa kaya vakaidina vei kemudou, Sa sega ni tubu e dua vei ira sa sucu mai na yalewa me uasivi vei Joni na dauveipapitaiso; ia ko koya sa lailai sara e na matanitu vakalomalagi sa uasivi vei koya.” (Maciu 11:11) Na cava a tukuna kina oqori o Jisu? Ena Penitiko 33 S.K., sa ra qai tekivu nuitaka e so tale era yalodina mera lai veiliutaki tale ga ena Matanitu ni Kalou, nira lumuti ena yalo tabu. Gauna oya sa mate oti o Joni na Dauveipapitaiso.​—Caka. 2:​1-4.

Vakatokai me Yalododonu na Kawa i Eparama

6, 7. (a) Cava a tukuni kina nira na “vaka na kalokalo ni lomalagi” na kawa i Eparama? (b) Na kalougata cava e yaco vei Eparama kei ira na nona kawa?

⁶ A tukuni vei Eparama ni nona kawa ena “vaka na kalokalo ni lomalagi” kei na nuku ena matasawa. (Vkte. 13:16; 22:17) Cavuti oya ni a se sega tu ni kilai ena gauna i Eparama na kedra iwiliwili. E muri sa qai vakatakilai na kedra iwiliwili na lewena na Kawa vakayalo oqori​—o Jisu kei ira na 144,000.​—Vkta. 7:4; 14:1.

⁷ E kaya na Vosa ni Kalou me baleta na vakabauta i Eparama: “A sa vakabauti Jiova ko koya [Eparama]; a sa wilika vua ko koya me nonai valavala dodonu.” (Vkte. 15:​5, 6) E macala ni sega ni dua na tamata e uasivi ena ivalavala dodonu. (Jeme. 3:2) Ia, a dikevi Eparama o Jiova qai vakatokai koya me yalododonu, me nona itokani tale ga baleta ni vakasakiti na nona vakabauta. (Aisea 41:8) Era vakatokai tale ga mera yalododonu na ilala i Jisu ra lewe ni kawa vakayalo i Eparama. A vakalougatataki o Eparama ena nona vakatokai me yalododonu. Ia ena qai yaga sara vakalevu vei ira na nona kawa vakayalo na nodra sa vakatokai tale ga mera yalododonu.

8. Na itavi lagilagi cava era vakalougatataki kina na kawa i Eparama?

⁸ Era vakatokai mera yalododonu na lumuti baleta nira vakabauta na isoro ni veivoli i Jisu. (Roma 3:​24, 28) Ena rai i Jiova, e veiganiti mera lumuti ena yalo tabu mera luvena vakayalo, ra taci Jisu tale ga ni sa bokoci nodra ivalavala ca. (Joni 1:​12, 13) Sa ra mai okati kina ena veiyalayalati vou ra qai lewena e dua na matanitu vou, “na Isireli ni Kalou.” (Kala. 6:​16; Luke 22:20) Dua dina na itavi dokai oqori! Nona vakalougatataki ira oqori na Kalou, sa ra na sega kina ni bula tawamudu e vuravura. Sa sosomitaka oya na nodra ilesilesi e marautaki vakalevu mera tomani Jisu ena Siga ni Lewa, kei na itavi lagilagi ni veiliutaki kei koya mai lomalagi.​—Wilika Roma 8:​17.

9, 10. (a) Gauna cava era kilai kina na isevu ni lotu Vakarisito lumuti, ia na cava e gadrevi mera cakava? (b) Cava e vakayagataka o Jiova mera yalodina tiko ga kina na ilawalawa oqori?

⁹ A nodra inuinui e dua na ilawalawa yalodina ena Penitiko 33 S.K. mera na veiliutaki kei Jisu ena Siga ni Lewa. Ra papitaiso kina ena yalo tabu e 120 na tisaipeli i Jisu, ra qai isevu ni lotu Vakarisito lumuti. Ia, oqo e itekitekivu ga ni nodra na lai rawata na bula tawamudu e lomalagi. Tekivu mai na gauna oya, a gadrevi mera yalodina tiko vei Jiova, dina ni na vakatovolei ira sara vakalevu o Setani. Ena qai nodra ga na isala ni bula e lomalagi ke ra yalodina me yacova nodra mate.​—Vkta. 2:​10.

¹⁰ Oqori na vuna e vakayagataka kina o Jiova na nona Vosa kei na ivavakoso vakarisito me vakadreti ira na lumuti, me vakayaloqaqataki ira tale ga. Kena ivakaraitaki, a vola o Paula vei ira na lotu Vakarisito lumuti e Cesalonaika: “Keitou sa vakarota vei kemudou ka vakamasuti kemudou ka vakadreti kemudou yadua, me vaka na tamana vei ira na luvena, mo dou ia nai valavala sa kilikili kei ira sa nona na Kalou, o koya sa kacivi kemudou ki na nona matanitu kei na vanua vakaiukuuku.”​—1 Ces. 2:​11, 12.

11. Na cava a uqeta o Jiova me volai vei ira “na Isireli ni Kalou”?

¹¹ Ena sivia na 60 na yabaki mai na nodra digitaki na isevu ni ivavakoso ni lotu Vakarisito lumuti, a uqeta o Jiova na kena volaitukutukutaki na cakacaka vakavunau i Jisu e vuravura, na veika e cakava vei ira na lotu Vakarisito lumuti ena imatai ni senitiuri, kei na nona vakasalataki ira. Uqeta gona o Jiova na volai ni iVolatabu vaKirisi me ikuri ni iVolatabu vakaIperiu. A volai taumada vua na matanitu o Isireli na iVolatabu vakaIperiu nira se veivolekati kei na Kalou. Ena yasana adua, a volai vakatabakidua na iVolatabu vaKirisi Vakarisito me baleti ira na lumuti era taci Jisu, era luve vakayalo tale ga ni Kalou​—“na Isireli ni Kalou.” Ia, sega ni kena ibalebale oqo ni na yaga ga vei ira na Jiu na vulici ni iVolatabu vakaIperiu. Ena yaga tale ga vua e dua na lotu Vakarisito e sega ni lumuti na nona vulica kei na nona bulataka na ivakasala ni iVolatabu vaKirisi Vakarisito.​—Wilika 2 Timoci 3:​15-​17.

12. Na veivakadreti cava a tukuna o Paula vei ira na lotu Vakarisito lumuti?

¹² Era a vakatokai na lotu Vakarisito ena imatai ni senitiuri mera yalododonu, ra qai lumuti ena yalo tabu, me nodra kina na icovi ni bula i lomalagi. Nodra lumuti e sega ni kena ibalebale nira sa tui, mera sa tekivu lewai ira na tacidra lotu Vakarisito lumuti era se bula vata tiko e vuravura. Ia, e so na lotu Vakarisito taumada era a vakawalena na tikina oqo, nira a vakalevulevui ira ena loma ni ivavakoso. Tarogi ira kina o Paula: “E vakaevei e sa tu kece li oqori vei kemuni na veika e ganita na nomuni bula? Ko ni sa vutuniyau li? Au diva mada ga mo ni sa tui dina sara, me rawa ni keitou bau laki wili tale tu ga yani vaka tui vata kei kemuni!” (1 Kor. 4:8, VV) Mani vakadreti ira na lumuti ena gauna oya: “Ni kua ni nanuma ni keitou sa vialewa tiko ga yani na nomuni vakabauta, ka ni ko ni sa tudei tu e na nomuni vakabauta. Ia keitou via veivuke ga vei kemuni e na ka mo ni reki kina.”​—2 Kor. 1:​24, VV.

Vakacavari na iWiliwili

13. A tomani vakacava na nodra digitaki na lotu Vakarisito lumuti ni oti na 33 S.K.?

¹³ Era sega ni digitaki kece na lotu Vakarisito lumuti era le 144,000 ena imatai ni senitiuri. Era digitaki ena gauna era bula tiko kina na yapositolo, vaka kina ena veisenitiuri e tarava me yacova sara mai na noda gauna. (Maciu 28:20) Sega ni dede sa vakayacora sara na veika e baleti ira o Jisu ena gauna e tekivu veiliutaki kina ena 1914.

14, 15. Na cava a yaco ena noda gauna me baleta na nodra digitaki na lumuti?

¹⁴ Taumada, a vakasavasavataka na lomalagi o Jisu ena nona kolotaki ira tani kece mai vuravura na saqata tiko na veiliutaki ni Kalou. (Wilika Vakatakila 12:​10, 12.) Oti, sa qai kumuni ira vata na ivovo ni lumuti era na veiliutaki tale ga ena Matanitu ni Kalou, me vakacavari kina na iwiliwili ni 144,000. Ena veiyabaki ni 1930, sa voleka sara kina ni cava nodra kumuni na ilala oqori, ni levu ga vei ira na taleitaka na itukutuku vinaka ena gauna oya e sega ni nodra inuinui mera lai bula i lomalagi. A sega ni vakaraitaka vei ira na yalo tabu nira luve ni Kalou. (Vakatauvatana Roma 8:​16.) Ia era vakadinata ga ni nodra inuinui na bula tawamudu ena parataisi e vuravura, nira lewe ni ‘so tani tale na sipi.’ (Joni 10:16) O koya gona, ni oti na 1935 a vakabibitaki ena cakacaka vakavunau na nodra kumuni “nai soqosoqo levu” a raivotutaka na yapositolo o Joni nira vakabulai mai “na veivakararawataki levu.”​—Vkta. 7:​9, 10, 14.

¹⁵ Se sega ni mudu na nodra digitaki e so mera lai bula i lomalagi ni oti na veiyabaki ni 1930. Baleta? De dua, era a sega ni yalodina e so na lumuti, ra qai veisosomitaki o ira oqori. (Vakatauvatana Vakatakila 3:​16.) O Paula mada ga a tukuni so na nona itokani lumuti era sa biuta na sokalou dina. (Fpai. 3:​17-​19) O cei so e digitaka o Jiova mera veisosomitaki? E vakatau sara ga vua. Macala tu ga ni na sega ni digitaki ira na lotu Vakarisito vou. Ia era digitaki ga na sa vakadinadinataka nodra yalodina, me vakataki ira na tisaipeli a vosa vei ira o Jisu ena gauna e tauyavutaki kina na soqo ni iVakananumi.a​—Luke 22:28.

16. Na cava eda marautaka baleti ira na lumuti, na cava eda vakabauta ena nuidei?

¹⁶ Ia kena irairai nira sega kece ni veisosomitaki o ira na qai digitaki mai na veiyabaki ni 1930, mera nuitaka na bula e lomalagi. E vakadeitaka ga o Jiova nira na maliwai keda tiko e so na lotu Vakarisito lumuti ena otioti ni veisiga ni ituvaki ca oqo me yacova na nona vakarusai o “Papiloni na Ka Levu.”b (Vkta. 17:5) Eda nuidei tale ga ni na vakacavara o Jiova na kedra iwiliwili na 144,000 ena nona gauna lokuci, era na qai veiliutaki kece ena Matanitu ni Kalou. Eda vakabauta tale ga na ka e kaya na nona Vosa ni parofisai baleta na isoqosoqo levu e tubu tiko ga na kedra iwiliwili​—nira na yalodina tiko vakailawalawa. Sa voleka na gauna mera na “lako mai na veivakararawataki levu” ena vakilai ena vuravura i Setani. Oti oya, sa ra na qai bula yani ena vuravura e vakavoutaka na Kalou.

Sa ra Voleka ni Veiliutaki Kece na Lewe ni Matanitu Vakalomalagi ni Kalou!

17. Na cava e kaya na 1 Cesalonaika 4:​15-​17 kei na Vakatakila 6:​9-​11, nira sa rawata na lotu Vakarisito lumuti era yalodina me yacova na mate?

¹⁷ Me tekivu mai na 33 S.K sa ra vakadinadinataka e tini vakacaca na udolu na lumuti na dei ni nodra vakabauta kei na nodra vosota ena yalodina me yacova nodra mate. Sa vakadinadinataki kina ni ganiti ira mera lewe ni Matanitu ni Kalou, ra qai tekivu vakalougatataki ena nodra icovi ni bula i lomalagi ni tekivu tiko tawarairai o Karisito.​—Wilika 1 Cesalonaika 4:​15-​17; Vakatakila 6:​9-​11.

18. (a) Na cava era nuidei kina na ivovo ni lumuti era se bula tiko e vuravura? (b) Cava era nanuma na so tani tale na sipi me baleti ira na lumuti yalodina?

¹⁸ Era nuidei na vo ni lumuti era se bula tiko e vuravura nira na rawata tale ga na icovi ni bula e lomalagi ke ra yalodina tiko ga. Nira dau vakasamataka na vica na milioni na so tani tale na sipi na nodra yalodina tiko na lumuti, era duavata ga kei na ka e tukuna na yapositolo o Paula vei ira na lumuti e Cesalonaika: “Keitou sa vakacaucautaki kemudou vei ira na veisoqosoqo lewe ni lotu ni Kalou, e na vuku ni nomudou lomadei kei na vakabauta e na nomudou vakacacani kecega, kei na vakararawataki dou sa vosota: oqo nai vakatakilakila ni lewa dodonu ni Kalou, mo dou vakabau kina mo dou yaga me rawata na matanitu ni Kalou, o koya dou sa vakararawataki talega kina.” (2 Ces. 1:​3-5) Era na qai veiliutaki kece na lewe ni Matanitu Vakalomalagi ena gauna sa na mate kina na iotioti ni lumuti e bula tiko e vuravura. Sa na wacava na marau mai lomalagi vaka kina e vuravura!

[iVakamacala e ra]

Vakamacalataka Mada?

• A vakatakila vei Eparama o Jiova e dua na ka ena tini vakayacori kina na inaki i Jiova me baleta na Siga ni Lewa. Na cava oya?

• Na cava e vakatokai kina o Eparama me yalododonu?

• Na cava era na rawata na kawa i Eparama nira vakatokai mera yalododonu?

• Na cava era nuitaka na lotu Vakarisito kece?

[iYaloyalo ena tabana e 20]

E vakayaloqaqataki ira nona imuri o Jisu mera gumatua mera taukena na Matanitu ni Kalou

[iYaloyalo ena tabana e 21]

O Jiova a tekivu digitaki ira na lewe ni ikarua ni wase ni kawa i Eparama ena Penitiko 33 S.K.

[iYaloyalo ena tabana e 23]

Era marau na so tani tale na sipi nira maliwai ira tiko na lotu Vakarisito lumuti ena otioti ni veisiga