Ganiti Ira Mera Tuberi ina iVurevure ni Wai Bula

“Ni na vakani ira na Lami . . . [e]na tuberi ira ki nai vurevure ni wai bula.”​—VKTA. 7:17.

1. Era vakatokai mera cava na lotu Vakarisito lumuti ena Vosa ni Kalou, kei na itavi cava e lesia vei ira o Jisu?

NA VOSA ni Kalou e tukuna ni o ira na lotu Vakarisito lumuti era vaka e dua na “dauveiqaravi yalo dina ka vuku,” e qarava tiko na veika kece e taukena o Karisito e vuravura. Ni mai dikevi koya na “dauveiqaravi” ena 1918 na Karisito, e raica nira yalodina na lumuti ena nodra vakarautaka tiko na “kakana e na kena gauna dodonu.” A marau gona na Turaga, o Jisu, me lesi ira mera “lewa na veika kece e tu vua.” (Wilika Maciu 24:​45-​47, VV) Oqo na sala era qaravi ira kina na dau sokaloutaki Jiova e vuravura o ira na lumuti, ni bera nira lai bula e lomalagi.

2. Vakamacalataka na ka e taukena o Jisu.

² Dau lewa na turaga na veika e nona, se na ka e taukena, ena vakayagataka tale ga ena sala e vinakata. Na ka e taukena o Jisu Karisito, na Tui e digitaka o Jiova, e vauci kina na ka kece me baleta na Matanitu ni Kalou e vuravura. E okati kina e “dua nai soqosoqo levu sara” a raivotutaka na yapositolo o Joni. E vakamacalataka o Joni me baleta na ilawalawa levu oqo: “Raica, sa dua nai soqosoqo levu sara, e sega e dua na tamata e wilika rawa, mai na veivanua kece, kei na veimataqali, kei na veimatanitu, kei na duivosavosa, era sa tu e na mata ni tikotiko-vakaturaga, kei na mata ni Lami, era vakaisulu e nai sulu vulavula, ka taura nai viu e na ligadra.”​—Vkta. 7:9.

3, 4. Na cava era kalougata kina vakalevu na ilawalawa levu?

³ E tukuni ira na ilawalawa levu oqo o Jisu nira ‘so tani tale na nona sipi.’ (Joni 10:16) Era nuitaka mera bula tawamudu ena parataisi e vuravura. Era nuidei ni o Jisu ena “tuberi ira ki nai vurevure ni wai bula,” ena qai “tavoya kecega na Kalou na wai ni mata mai na matadra.” Nira nuitaka na bula oya, “era sa sava nodrai sulu, ka vakavulavulataka e na dra ni Lami.” (Vkta. 7:​14, 17) Nira vakabauta na isoro i Jisu, e raica gona na Kalou ni ‘vulavula na nodra isulu.’ Era vakatokai mera yalododonu, era itokani ni Kalou me vakataki Eparama.

⁴ Kena ikuri, era vakatokai mera yalododonu ena mata ni Kalou na ilawalawa levu e tubu tiko ga na kedra iwiliwili, era nuitaka gona mera bulata na vakarusai ni ituvaki kei vuravura oqo ena veivakararawataki levu. (Jeme. 2:​23-​26, VV) E rawa nira toro voleka vei Jiova, ra qai nuitaka vakailawalawa mera bulata na Amaketoni. (Jeme. 4:8; Vkta. 7:​15) Era sega ni lewai ira ga, era tu vakarau mera muria na veidusimaki ni Tui vakalomalagi kei ira na tacina lumuti era bula tiko e vuravura.

5. Era tokoni ira vakacava na taci Karisito lumuti na ilawalawa levu?

⁵ E tusaqati ira vakaukaua na lotu Vakarisito lumuti na vuravura e lewa tu o Setani, ena sega tale ga ni cegu nodra tusaqati tiko. Ia, era tu vakarau nodra itokani na ilawalawa levu mera tokoni ira. Sa lailai sara na kedra iwiliwili na lotu Vakarisito lumuti, ia era tubu tiko ga e veiyabaki ena vica na drau na udolu na ilawalawa levu. Era sega ni rawa ni qaravi ira yadudua sara ga na rauta na 100,000 na ivavakoso lotu Vakarisito e veiyasa i vuravura na lumuti. O koya gona, dua na sala era tokoni ira kina na lumuti na so tani tale na sipi oya nira veiqaravi na tagane matua vakayalo mera qase ni ivavakoso. Era tokona na “dauveiqaravi yalo dina ka vuku” ena nodra qaravi e vica na milioni na lotu Vakarisito.

6. Na cava e parofisaitaki me baleta nodra tokoni ira na lotu Vakarisito lumuti o ira na so tani tale na sipi?

⁶ E parofisaitaka na parofita o Aisea na nodra tu vakarau na so tani tale na sipi mera tokoni ira na lotu Vakarisito lumuti. A vola: “Sa kaya vakaoqo ko Jiova, Nai yau [“daucakacaka sega ni saumi,” NW] kei Ijipita, kei na veivoli kei Iciopea, kei ira na kai Sipa, era tamata lelevu, ena lako mai vei iko, ia ena nomu ga: era na muri iko.” (Aisea 45:14) Vakaivakatakarakara, o ira na so tani tale na sipi era nuitaka na bula e vuravura era muri ira tiko na lumuti nikua kei na kena iLawalawa Dauvakatulewa, ra qai vakamalumalumu ina nodra veiliutaki. Nira “daucakacaka sega ni saumi,” era sega ni tu suka na so tani tale na sipi mera cuqena na cakacaka vakavunau e veiyasa i vuravura, ra vakayagataka tale ga na nodra iyau. Na cakacaka oqo a lesia na Karisito vei ira nona imuri lumuti e vuravura.​—Caka. 1:8; Vkta. 12:17.

7. Na cava era sa vakarautaki tiko kina na ilawalawa levu mera cakava?

⁷ Nira tokoni ira na tacidra lumuti na ilawalawa levu, era sa vakarautaki tiko mera isevu ni matatamata vou ni oti na Amaketoni. Mera dei qai kaukaua, mera tu vakarau tale ga na ilawalawa levu mera talairawarawa ina veidusimaki ni Turaga. Me vakaraitaka na lotu Vakarisito yadudua ni rawa ni vakayagataki ira na Tui, o Karisito Jisu. Ni vakaraitaka na vakabauta kei na yalodina ena gauna oqo, e vakaraitaka ni na tu vakarau me muria na veidusimaki ni Tui ena vuravura vou.

Era Vakadinadinataka na iLawalawa Levu na Nodra Vakabauta

8, 9. Era vakadinadinataka vakacava na ilawalawa levu na nodra vakabauta?

⁸ Era vakadinadinataka na nodra vakabauta ena sala e so, na so tani tale na sipi era tokoni ira tiko na ivavakoso lotu Vakarisito lumuti. Kena imatai, era tokoni ira na lumuti nira vunautaka na itukutuku vinaka ni Matanitu ni Kalou. (Maciu 24:14; 28:​19, 20) Kena ikarua, era tu vakarau na muria na veidusimaki ni iLawalawa Dauvakatulewa.​—Iper. 13:17; wilika Sakaraia 8:​23.

⁹ Kena ikatolu, era tokoni ira na tacidra lumuti ena nodra bulataka na ivakavuvuli dodonu i Jiova. Era gumatua mera vuataka na “loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, nai valavala malua.” (Kala. 5:​22, 23) Nikua e taleitaki cake vakalevu na “cakacaka ni tovo vakayago” mai na kena sagai me bulataki na itovo vivinaka oqori. Ia, era dei na ilawalawa levu mera kua ni ia na “dauveibutakoci, na daudara, nai valavala tawa-savasava, na daugarogaro, na dausoro ki na veimatakau, na daucakaisausau, na dauveicati, na dauveileti, na veiqati, na daucudrucudru, na dauveiba, na veisei vakavuravura, na veisei ni lotu, na dauvuvu, na daumateni, na daumarau vakalialia, kei na veika sa vakakina.”​—Kala. 5:​19-​21.

10. Na cava era saga matua na ilawalawa levu mera cakava?

¹⁰ Nida tamata ivalavala ca, e dau dredre meda vuataka na vua ni yalo tabu, meda kua ni cakava na itovo vakayago, kei na noda vorata tiko na idre ni vuravura e lewa tiko o Setani. Ia, eda sasaga matua me kua ni vakayalolailaitaki keda na noda malumalumu, na noda sikalutu ena so na gauna, se na noda malumalumu vakayago me luluqa kina noda vakabauta se na noda lomani Jiova. Eda kila ni na dina o Jiova ina nona vosa ni yalayala​—me vakabulai ira na ilawalawa levu ena veivakararawataki levu.

11. Na iwalewale cava e vakayagataka o Setani me vakamalumalumutaka kina na nodra vakabauta na lotu Vakarisito?

¹¹ Ia, eda qaqarauni tiko ena gauna kece nida kila ni sega ni dau soro na noda meca levu na Tevoro. (Wilika 1 Pita 5:8.) E vakayagataki ira na vukitani kei na so tale mera vakacalai keda ni cala na ivakavuvuli eda muria. Ia e levu na gauna eda sega ni rawai ena ivadi oqori. E vaka kina na veivakacacani, dina ni na vakataotaka na cakacaka vakavunau ena so na gauna, ia e vaqaqacotaka ga na nodra vakabauta na vakacacani. O koya gona, sa dau vakayagataka o Setani na iwalewale e nanuma ni na laulau sara me vakamalumalumutaka na noda vakabauta​—na yalolailai. Era vakadreti na lotu Vakarisito ena imatai ni senitiuri mera qarauna na leqa oqo, ni tukuni vei ira: “Ni vakasamataki koya [Karisito] mada ka a vosota na veivakacacani levu ka ra a cakava vua na i valavala ca!” Na vuna? Mera “kakua kina ni yalo lailai se datuvu koso.”​—Iper. 12:3, VV.

12. E vakaukauataki ira vakacava na yalolailai na ivakasala ni iVolatabu?

¹² Bau vakasamataka ena so na gauna mo soro koso na qaravi Jiova? O vakila ena so na gauna ni guce nomu sasaga? Ke vaka kina, mo kua ni vakamalumalumu vei Setani me temaki iko ena rai oqori me vakadredretaka kina na nomu qaravi Jiova. Ena vakaukauataki iko mo kua ni “datuvu koso” na nomu dau vulica vakatitobu na iVolatabu, masu vagumatua, soqoni wasoma kei na nomu veimaliwai kei ira na tacimu vakayalo. E yalataka tu o Jiova ni na vakaukauataki ira tiko na sokaloutaki koya, qai dau yaco na nona vosa ni yalayala. (Wilika Aisea 40:​30, 31.) Vakaogai iko ena cakacaka e vauca na Matanitu ni Kalou. Kua ni lai coko ena ka e vakalusi gauna, ia vakaogai iko ena nomu tuberi ira tale e so. O na vosota kina ni tuburi iko na yalolailai.​—Kala. 6:​1, 2.

Bulata na Veivakararawataki Levu Mera Bula ena Vuravura Vou

13. Na itavi cava e waraki ira tu na bulata na Amaketoni?

¹³ Ni oti na Amaketoni, era na vakavulici e levu na tawayalododonu era vakaturi mai mera kila na sala i Jiova. (Caka. 24:15) Mera na kila na isoro ni veivoli i Jisu; mera na vakavulici tale ga mera vakabauta, ra qai vakila na kena yaga. Dodonu mera vakanadakuya na nodra vakabauta cala ni lotu kei na nodra bula makawa. Mera na vulica mera bulataka na itovo vou e vakatakilakilataki ira na lotu Vakarisito dina. (Efeso 4:​22-​24; Kolo. 3:9, 10) O ira na so tani tale na sipi era bulata na Amaketoni ena levu sara ga nodra cakacaka. Ena marautaki dina meda cakava na itavi oqo vei Jiova, ni sa na sega na idre kei na veivakamuai ni vuravura ca oqo!

14, 15. Vakamacalataka na ka era na veitalanoataka o ira na bulata na veivakararawataki levu kei ira na yalododonu era vakaturi mai.

¹⁴ Ena levu tale ga na ka mera vulica o ira na dauqaravi Jiova era mate ni bera ni mai cakacaka vakaitalatala e vuravura o Jisu. Era na qai vulica se o cei na Mesaia yalataki, era nuitaka tu me a lako mai ia era sega ni raici koya. Era vakaraitaka ena nodra bula e liu nira vinakata me vakavulici ira o Jiova. Ena marautaki dina qai ka dokai meda tuberi ira​—me kena ivakaraitaki, mera vakamacalataka vei Taniela na kena vakavatukanataki na parofisai a vola ia a sega tu ni kila na kena ibalebale!​—Tani. 12:​8, 9.

¹⁵ Levu na ka eda na vakavulica vei ira na vakaturi, eda na vakatarogi ira tale ga ena levu na ka! Era na talanoataka na itukutuku ena iVolatabu a sega ni tukuni vakamatailalai. Vakasamataka mada noda na kila e so tale na itukutuku me baleti Jisu ni talanoataka o Joni na Dauveipapitaiso, ni rau veitatacini! Na ka eda vulica vei ira na ivakadinadina yalodina oqo eda na taleitaka sara kina vakalevu na Vosa ni Kalou. Era na vakaturi ena “tu cake tale e vinaka cake” na dausokalou yalodina i Jiova era sa mate yani, okati kina o ira na lewe ni ilawalawa levu era mate ena iotioti ni veisiga. Era a tekivu qaravi Jiova ena vuravura a lewa tu o Setani. Era na marautaka sara ga mera tomana nodra veiqaravi ena ituvaki e vinaka cake sara ena vuravura vou!​—Iper. 11:​35, VV; 1 Joni 5:​19.

16. Me salavata kei na parofisai, na cava ena yaco ena Siga ni Lewa?

¹⁶ Ni vakacagau tiko na Siga ni Lewa, ena qai tevuki e so na ivola. Era na qai dikevi vata kei na iVolatabu me yavu ni nodra lewai na tamata kece, me dikevi ke ganiti ira na bula tawamudu. (Wilika Vakatakila 20:​12, 13.) Ni cava na Siga ni Lewa, ena vakaraitaka na tamata yadua na nona tokona se sega na dodonu ni nona veiliutaki na Kalou ni lomalagi kei na vuravura. Ena vakamalumalumu beka ina Matanitu ni Kalou qai vakarorogo vua na Lami me tuberi koya ina “[i]vurevure ni wai bula”? Se na veivorati, me kua ni vakamalumalumu ina Matanitu ni Kalou? (Vkta. 7:​17; Aisea 65:20) Ena gauna oya, era na vakaraitaka na tamata kece e vuravura na nodra digidigi, nira sa galala mai na ivau ni ivalavala ca kei na ituvaki ca. Ena sega tale e dua me vakadiloya na dodonu ni nona sa na vakatauca o Jiova na iotioti ni nona lewa. Era na vakarusai ga o ira na valavala ca tiko.​—Vkta. 20:​14, 15.

17, 18. Na cava era sa vakanamata tu kina ina Siga ni Lewa o ira na lotu Vakarisito lumuti kei na so tani tale na sipi?

¹⁷ Ni ganiti ira na lotu Vakarisito lumuti nikua mera lewe ni Matanitu ni Kalou, era vakanamata gona mera veiliutaki ena Siga ni Lewa. Oqo na itavi dokai dina! Na inuinui oqo e uqeti ira mera muria na ivakasala i Pita vei ira na tacina vakayalo ena imatai ni senitiuri: “Dou gumatua cake kina, mo dou vakataudeitaka sara na nomudou kacivi kei na nomudou digitaki; ni dou na sega sara ni bale, kevaka dou sa kitaka na veika oqo: ni na soli vakayauyau vakakina me rawarawa vei kemudou me curu ki na matanitu tawa mudu ni noda Turaga kei nai Vakabula ko Jisu Karisito.”​—2 Pita 1:​10, 11.

¹⁸ Era marautaka na so tani tale na sipi na nodra inuinui na tacidra lumuti. Era nakita dei mera veitokoni. Nira itokani ni Kalou ena gauna oqo, era gumatua kina mera qaravi koya. Ena Siga ni Lewa, era na marautaka nodra tokona mai vu ni lomadra na ituvatuva ni Kalou, ni tuberi ira o Jisu ina ivurevure ni wai bula. Oti oya, sa na qai ganiti ira mera qaravi Jiova e vuravura me tawamudu!​—Roma 8:​20, 21; Vkta. 21:​1-7.

O se Nanuma?

• Na cava soti e taukena o Jisu?

• Era tokoni ira vakacava na tacidra lumuti o ira na ilawalawa levu?

• Na itavi dokai cava era lesi kina na ilawalawa levu, na cava era nuitaka tu ena veisiga se bera mai?

• Na cava na nomuni rai me baleta na Siga ni Lewa?

[iYaloyalo ena tabana e 25]

O ira na ilawalawa levu era sa savata na nodra isulu qai vakavulavulataka ena dra ni Lami

[iYaloyalo ena tabana e 27]

Na cava o na via taroga vei ira na yalodina era vakaturi mai?