Rau Veisautaka Nodrau Bula me Vakainaki​—Vakacava O Kemuni?

A CAKACAKA tiko o Marc, e dua na tacida mai Kenada, ena dua na kabani ni buli misini vereverea era dau vakayagataka o ira na qarava na veika e vauca na maliwalala. E cakacaka ga kina vagauna, e painia tudei tale ga. A qai tukuna vua nona iliuliu ni cakacaka me vakasamataka nodratou sa via tosoya cake tiko nona itutu​—me cakacaka tudei ena kabani qai isau vinaka. Cava beka ena vakatulewataka o Marc?

Dua tale na tacida o Amy, mai na Yatu Filipaini, a painia tudei ena gauna e sa vakaotia tiko kina na nona vuli. Ia ni tuvaitutu oti ga a tukuni vua e dua na cakacaka tudei qai sau vinaka. Cava beka ena vakatulewataka?

Duidui nodrau vakatulewa o Marc kei Amy. Vakaraitaki ena nodrau vakatulewa na yaga ni ivakasala vuku era vakaroti kina na lotu Vakarisito e Korinica makawa. Vola na yapositolo o Paula: “Mera . . . vakayagataka na veika ni vuravura oqo, ia mera kua ga ni vakayagataka vakasivia.”​—1 Kor. 7:​29-​31, NW.

Vakayagataka na Veika ni Vuravura, Kua ga ni Vakayagataka Vakasivia

Ni bera nida dikeva na veika e qai yaco vei Marc kei Amy, de vinaka meda vakadeuca mada na ibalebale ni vosa “vuravura” (se, koʹsmos ena vosa vaKirisi), a tukuna o Paula vei ira mai Korinica. Ena tikinivolatabu oya, e vakaibalebaletaki tiko na koʹsmos ina ivakarau ni bula ena noda vuravura​—okati kina na kawatamata​—kei na veika e tiki ni noda bula e veisiga me vaka na vale, kakana kei na isulu.a Levu vei keda e cakacaka saumi me taukena na veika oqori. Sa da na vakayagataka ga kina na vuravura oqo meda qarava na noda itavi lesi vakalou ena kena vakarautaki na veika meda bula kina kei ira na lewe ni noda vuvale. (1 Tim. 5:8) Ia na gauna vata oqori eda sa kila tiko ni o “vuravura sa lako tani yani.” (1 Joni 2:​17) Bibi kina me vakarauta ga na noda vakayagataka na veika ni vuravura oqo, me kua ni “vakasivia” sara.​—1 Kor. 7:​31, NW.

Uqeti ira e levu na mataveitacini na ivakasala vakaivolatabu me vakarauta ga nodra vakayagataka na vuravura. Era vakadikeva vinaka tale na kedra ituvaki, ra vakalailaitaka na gauna ni nodra cakacaka, ra qai bula rawarawa ga. Era raica ni vakainaki kina nodra bula ni levu na gauna era sa dau tiko maliwai ira kina nodra lewe ni vuvale. Levu tale ga na gauna era qaravi Jiova kina. E uqeti ira nodra bula rawarawa mera kua ni vakararavi ena veika ni vuravura oqo, ia mera nuitaki Jiova ga vakalevu. O rawa beka ni vakamurimuri ira​—mo bula rawarawa ga me levu na gauna o vakayacora kina na veika e vauca na Matanitu ni Kalou?​—Maciu 6:​19-​24, 33.

“Keirau sa Qai Volekati Jiova Sara ga Kina”

O Marc, a tukuni taumada, e muria na ivakasala ena iVolatabu me kua ni vakayagataka vakasivia na vuravura. E vakasuka na cakacaka isau levu a tukuni vua. Oti ga e vica na siga sa baci uqeti koya tale ina cakacaka oya na nona iliuliu qai tukuna vua ni na vakalevutaki na kena isau. “Au vakatovolei sara ga kina,” e kaya o Marc, “ia au sega ga ni vakadonuya.” E vakamacalataka na vuna: “Keirau via qaravi Jiova ena neirau vinaka duadua kei na watiqu, o Paula. Oya na vuna keirau lalawataka kina me keirau bula rawarawa ga. Keirau kerea vei Jiova na vuku me keirau rawata kina na neirau isausau, bau tuvanaki sara mada ga na siga keirau sa rawa ni tekivu vakarabailevutaka kina neirau veiqaravi vua.”

E vakamacalataka o Paula: “Au vunivola tiko ni dua na valenibula, au dau cakacaka ena tolu na siga ena dua na macawa. E veirauti vinaka na kequ isau, au qai painia tudei tiko. Vakataki Marc ga, dua na ka noqu via qaravi Jiova ena vanua era gadrevi tu kina vakalevu na daukacivaka na itukutuku ni Matanitu ni Kalou. Niu sa solia na noqu ivola ni kere vakacegu, sa qai tukuna vei au na iliuliu ni cakacaka ni se qai lala sara ga e dua na cakacaka vakavunivola ena itutu sara e cake, e nanuma ni ganiti au na kena ivakatagedegede. Oqo na cakacaka vakavunivola isau vinaka duadua ena valenibula oya, ia au dei tiko ga ena noqu sa via cegu. Niu vakamacalataka vua na vu ni noqu vakasuka, e vakacaucautaki au ena vuku ni noqu vakabauta.”

Sega ni dede rau sa lesi sara me rau lai veiqaravi vakapainia lavotaki o Marc kei Paula ina dua na ivavakoso lailai ribayawa e Kenada. Kalougata cava rau vakila kina? Kaya o Marc: “Au nuiqawaqawa niu sa kere vakacegu mai na dua na cakacaka isau vinaka au a cakava voli mai ena dua na gauna balavu, ia e vakalougatataka o Jiova na neirau cakacaka vakaitalatala. Keirau vakila na marau levu ena neirau tuberi ira e so tale mera qaravi Jiova. Vaqaqacotaka tale ga neirau vakawati na cakacaka vakaitalatala vakatabakidua. Usutu tiko ga ni neirau veitalanoa na veika e bibi cake​—neirau veiqaravi vei Jiova. Keirau sa qai volekati Jiova sara ga kina.” (Caka. 20:35) Kuria o Paula: “Ni o biuta nomu cakacaka, kei na veika vinaka kece ena nomu vale, sa na gadrevi ga mo nuitaki Jiova vakatabakidua. E vakalougatataki keirau o Jiova ena neirau cakava qori. Keirau vakila ni keirau lomani qai nuitaki ena nodra veikauaitaki na mataveitacini. Na kaukaua kece au dau solia ina noqu cakacaka e liu, au sa vakayagataka tiko qo meu tuberi ira kina vakayalo na tamata nikua. Sega ni tukuni rawa na noqu marautaka na ilesilesi qo.”

‘Au Sega ni Marau, Dina Niu Vutuniyau’

Ena yasana adua, e duidui na vakatulewa i Amy, sa tukuni oti mai. Tukuni vua e dua na cakacaka sau vinaka, mani vakadonuya. E kaya: “Na imatai ga ni yabaki au se kauaitaka na cakacaka vakaitalatala, oti oya sa luluqa mai, au sa vakaliuca vakalevu na noqu itutu vakacakacaka. Levu tale na itutu sau vinaka e tukuni vei au. Lomaqu sara ga meu saga na ivakatagedegede ni cakacaka sara e cake. Ni levu gona na itavi e vakacolati vei au, sa lailai kina noqu gauna ni cakacaka vakaitalatala. Yaco na gauna meu sa sega sara ga ni qai cakacaka vakavunau.”

E kaya o Amy ni raica lesu na gauna oya: “Au vutuniyau. Levu na vanua au butuka, au qai marautaka vakalevu niu rogo ena noqu itutu. Ia, au sega ga ni marau. Au vakailavo ia sa qai levu tiko ga noqu leqa. Dua na ka noqu via kila na vu ni leqa oqori. Au qai liaca ni sa voleka ni ‘vakacala na noqu vakabauta’ na cakacaka sara ga au qara tiko ena vuravura qo. Dina sara ga kina na Vosa ni Kalou, niu cokai ‘vakalevu ena yaluma.’”​—1 Tim. 6:​10.

Cava e qai cakava o Amy? E kaya: “Au kerea nodratou veidusimaki na qase meu vakaukauataki tale kina vakayalo, au qai tekivu lakova na soqoni. Au tagi ena dua na gauna e laga kina na sere. Au nanuma lesu na noqu dau marautaka na cakacaka vakavunau ena gauna au painia voli kina me lima na yabaki, dina niu dravudravua tu. Au dikeva ni dodonu meu vakaliuca ga na cakacaka e vauca na Matanitu ni Kalou, meu sa kua ni vaqara ilavo tiko. Tosoi sobu kina noqu itutu vakacakacaka, qai musu e 50 na pasede ni kequ isau. Rawa kina niu cakacaka tale vakavunau.” Kaya ena marau o Amy: “Au marautaka noqu bau painia ena vica na yabaki. Au sa qai marautaka tu oqo na lomavakacegu au sega ni bau vakila ena noqu cakacaka saumi.”

Rawa beka ni o cakava e so na veisau, o qai saga mo bula rawarawa ga? Io, ena vakainaki dina na nomu bula ke o vakayagataka na gauna o sa galala kina mo vakatetea na itukutuku vinaka ni Matanitu ni Kalou.​—Vkai. 10:22.

[iVakamacala e ra]

[Tikina bibi ena tabana e 19]

Rawa beka ni o cakava e so na veiveisau qai bula rawarawa ga?

[Kato/​iYaloyalo ena tabana e 19]

“Au sa Taleitaka Tiko Qo!”

A via tokoni watina kei ratou na luvena ena cakacaka vakaitalatala vakatabakidua o David, e dua na qase ni ivavakoso mai Mereke. A veivosakitaka ena kabani e cakacaka tiko kina ke rawa ni cakacaka ga vagauna, oti sa qai painia tudei sara. A vakainaki beka nona bula ni cakava na veisau oqori? E vola o David vua e dua nona itokani ni oti e vica na vula: “Vakainaki dina na bula ni dua e qaravi Jiova tiko vakatabakidua kei na nona vuvale. Au nanuma ga ni na oti e dua na gauna balavu meu qai matau ena cakacaka vakapainia, ia au sa taleitaka sara tiko ga qo! Sa bau veivakacegui dina.”

[iYaloyalo ena tabana e 18]

Rau cakacaka vakavunau tiko o Marc kei Paula