RA TAROGA NA DAUWILIWILI . . .

Na cava e sega ni volai kina eso na yaca ena iVolatabu?

A sega ni volai ena Ruci na yaca ni turaga a sega ni cakava na ka e vakaroti ena Lawa a soli vei Mosese. (Ruci 4:​1-12) E kena ibalebale beka qori nira tamata ca se tawayaga o ira e sega ni volai na yacadra ena iVolatabu?

Sega. Dikeva e dua tale na kena ivakaraitaki. A talai ratou nona tisaipeli o Jisu me ratou “lako ina koro, . . . [vua] e dua na tagane” me ratou lai vakarautaka ena nona vale na kanavata ni Lakosivia. (Maciu 26:18) Meda nanuma beka ni sega ni volai na yacana na “tagane” qori baleta ni tamata ca se tawayaga? Sega, o koya e dua na tisaipeli i Jisu. A sega ni gadrevi me volai na yacana ni sega ni vakabibitaki tiko ena tikinivolatabu qori.

Eso tale ga na tamata ca e volai na yacadra ena iVolatabu, qai sega ni volai na yacadra eso na tamata yalodina. Kena ivakaraitaki, eda kila kece na yacai Ivi, na imatai ni yalewa. Ia na nona nanumi koya ga kei na nona talaidredre e lai valavala ca tale ga kina o Atama, da qai mai vakila tu qo na kena ca. (Roma 5:12) Kena veibasai o wati Noa, a sega ni volai ena iVolatabu na yacana, ia e dauveikauaitaki, talairawarawa qai tokoni watina ena itavi bibi e lesi kina. Na kena sega ni volai na yacana ena iVolatabu, e sega ni kena ibalebale ni tawayaga se sega ni vakadonui koya na Kalou.

Eso sara mada ga era vakaitavi ena vakayacori ni inaki i Jiova e sega ni volai na yacadra ena iVolatabu. Vakasamataki koya mada na goneyalewa lailai ni Isireli a bobula ena vale nei Nemani, na turaganivalu ni Siria. A doudou ni tukuna vua na wati Nemani na veika me baleta na parofita i Jiova e Isireli. Na ka a cakava qori a vakabulai kina vakacakamana o Nemani. (2 Tui 5:​1-14) E ivakaraitaki vinaka tale ga na luvei Jefica yalewa. A bole me kua ni vakawati se vakaluveni me vakayacora kina na ka a bubuluitaka o tamana. (Dauveilewai 11:​30-40) A sega tale ga ni volai na yacadra e sivia e 40 na daunisame kei na parofita era yalodina ena nodra ilesilesi.​—1 Tui 20:​37-43.

Era ivakaraitaki vinaka tale ga na agilosi yalodina. E sega ni tukuni rawa na kedra iwiliwili, ia e rua ga e cavuti ena iVolatabu​—o Keperieli kei Maikeli. (Taniela 7:10; Luke 1:19; Juta 9) O ira na kena vo a sega ni volai na yacadra. Kena ivakaraitaki, a taroga e dua na agilosi o Manoa na tamai Samisoni: “Ko cei na yacamuni, me keirau vakarokoroko vei kemuni ni na yaco na nomuni vosa?” A tukuna vua na agilosi: “A cava ko sa taroga kina na yacaqu?” A besetaka na agilosi me caka vua na vakarokoroko e dodonu me caka ga vua na Kalou.​—Dauveilewai 13:​17, 18.

E sega ni tukuna na iVolatabu na vuna era volai kina eso na yaca, eso e sega. Ia eda rawa ni vulica e levu na ka vei ira na dauveiqaravi yalodina ni Kalou era sega ni vinakata mera dokai se rogo.

[iYaloyalo ena tabana e 10]