O Dau Mamadua Beka?
1 E sega ni ka vou na noda dau raica e dua na gone ni vuni tiko ena daku i tinana se i tamana qai vakairovi keda tiko mai. E dau kena ivakarau ga meda dau mamadua nida se gone. Ia e so era se mamadua ga ena gauna era sa tamatabula kina. Ke vakataotaka na nomu vakaitavi ena cakacaka vakaitalatala na mamadua, na cava o rawa ni cakava?
2 iWali ni Mamadua: E bibi mo dikeva vinaka mada “na yalo sa tabogo.” (1 Pita 3:4, VV) Vaqaqacotaka na nomu lomani Jiova kei ira na tani. Vakadeitaka mai vu ni lomamu ni dua vei ira na sala uasivi duadua mo vakaraitaka kina na loloma dina, oya na nomu vakaitavi ena cakacaka vakavunau a lesi vei keda. Mo gumatua ni muria e dua na ivakarau ni nomu vuli vakataki iko, kei na nomu tiko ena soqoni. Masuta vakawasoma, vakadodonu tale ga na nona veivuke o Jiova. Na qaqaco ni noda vakabauti koya kei na noda nuitaki koya ena vakaukauataki keda meda ‘doudou cake kina meda tukuna na Vosa ni Kalou, eda na sega ni rere.’—Fpai. 1:14.
3 Saga mo kua ni dau beci iko tu ga. E kena irairai ni oqo tale ga na ka a saga o Timoci. A uqeti Timoci o Paula ‘me kakua ni beci koya e dua ni se cauravou,’ qai tokaruataka vua ni “sa sega ni solia mai vei keda na Kalou na yalo ni rere: a yalo ni kaukauwa ga.” (1 Tim. 4:12; 2 Tim. 1:7) A liganicakacaka vinaka i Jiova o Timoci, ena vakayagataki iko tale ga ke o saga mo toso, mo qai vakanuinui vakatabakidua vua.—Same 56:11.
4 E dau mamadua e dua na tacida yalewa, e lai vakavuna kina me rerevaki watina ena nona dauveitusaqati, ia e vukei koya na nona vakasamataka na tikinivolatabu, me vaka na Maciu 10:37. Ni sega ni soro koso, e yaco me rawarawa sara vua na cakacaka vakaitalatala, eratou mani ciqoma tale ga na ka dina o watina tagane, o tinana, kei iratou na ganena!
5 E Bibi Mo Dau Vakavakarau: Ena vukea na nomu lomanuidei ke o dau vakavakarau vakavinaka ena cakacaka vakaitalatala. Digitaka e dua vei ira na iwalewale rawarawa ni vosa ena ivola na Reasoning, se ena itabataba makawa ni Noda Cakacaka Vakaitalatala ni Matanitu, vulica vinaka, qai vakatovotovotaka. Ena tawayaga ke o lomataqaya, tovolea mo dau vakasamataka na ka ena nuidei kina na lomamu. Ena vakaukauataki iko tale ga ke o cakacaka vata kei ira na so. Kua ni guilecava ni levu o na sotava ena veimatanikatuba era mamadua vakataki iko ga. E vinakati mera rogoca na tamata kece ga na itukutuku ni Matanitu ni Kalou.
6 Ke o dau mamadua, kua ni yalolailai. Ke o saga mo cakacaka kina, ena vukei iko o Jiova mo dua e laulau na nomu vunautaka na itukutuku vinaka. O na marautaka tale ga kina na nomu cakacaka vakaitalatala.—Vkai. 10:22.