E Yaga na Soqoni Vei Ira na iTabagone

¹ E kaya e dua na goneyalewa itabagone: “Ena so na gauna au dau nanuma ni dredre duadua na bula vei keimami na itabagone. Ni keimami maliwai ira tu na dau veidauci, na dau vakayagataki wainimate gaga, na dau gunu tale ga.” E vakatale beka ga oya na nomu nanuma? Ke vaka kina, na cava ena vukei iko mo valuta na veika e rawa ni vakamuai iko cala? Ena yaga sara ke tiko vei iko na vakabauta, mo vakabauta dina ni dodonu na sala i Jiova, ke sega oya ena “dredre sara me da vinaka vua na Kalou.” (Iper. 11:6, VV) Ni o dau tiko ena soqoni ni ivavakoso ena vaqaqacotaka na nomu vakabauta vakarisito, o na dei tale ga ena nomu saga mo kua ni vakayacora na ca.

² E Levu na Ka e Rawa ni Vulici Ena Soqoni: Na cava e dau taleitaki kina na kanavata kei ira na noda itokani voleka? E sega li ni vinaka ni kakana kei na totoka ni veimaliwai, da qai kana ena vakacegu? E vaka sara tale ga kina na totoka ni ituvaki eda vakila ena noda soqoni, ia ena rai vakayalo.

³ E tarai keda cake na veika e rogoci ena soqoni, ni kovuti kina na leqa e sotavi ena bula ni veisiga ina kena vulici na parofisai vakasakiti ena iVolatabu. E talaucaki tale ga mai kina na sala yaga meda muria me vinaka kina na noda bula, kei na sala e rawa nida vorata kina na veika dredre cava ga eda sotava. Eda na kunei ira na itokani vinaka duadua ena soqoni, da qai karoni vinaka ena totoka ni bula vakayalo e vakilai kina. (Same 133:⁠1) Sa rauta me kaya e dua na itabagone: “Au tiko e koronivuli ena loma ni dua taucoko na siga, au sa dau oca dina. Ia na soqoni e vaka e dua na ivakavakacegu ena vanua dravuisiga, au lai vakabulabulataki mai kina meu tiko rawa tale ena siga ni vuli e tarava.” E kaya tale e dua: “Au vakila niu voleka sara vei Jiova keu veimaliwai voleka kei ira era lomani koya.”

⁴ Ke o lewena na Koronivuli ni Vuli iTalatala Liutaki Vakalou, o na vulica mo kumuni ira vata na itukutuku vakaivolatabu, mo vakarautaka kina e dua na vosa me qai lai taladrodro na nomu vakamacalataka vei ira na vakarorogo ena Kingdom Hall. Vakasamataka mada na yaga ni nomu vakavulici mo dua na qasenivuli maqosa ni ka dina e veivakabulai ena Vosa ni Kalou! E vei tale e rawa nira vulica kina na veika yaga vaka oqo na itabagone?

⁵ Na Sala me Yaga Kina na Soqoni: Me yaga na soqoni, e tolu na ka bibi e vauci kina. Na vakavakarau, na vakaitavi, kei na bulataki ni ivakavuvuli.

⁶ Vakavakarau Ina Soqoni: Tuvanaka na gauna mo vakavakarau wasoma kina ina soqoni. Kua ni laiva na nomu lesoni i koronivuli, na nomu cakacaka vagauna, se na ka ni veivakamarautaki me kania na gauna e dodonu mo vakarautaka kina na ulutaga ena veivosakitaki ena soqoni yadua. Ena vinaka me dua na nomu ituvatuva. Taumada, e bibi mo saga me salavata na nomu wili iVolatabu kei na kena e tuvanaki ena veimacawa me baleta na Koronivuli ni Vuli iTalatala Liutaki Vakalou. E taura e vica ga na miniti e veisiga mo wilika, mo vakananuma na wase ni iVolatabu e lesi me wiliki. Vakatikitikitaka na gauna mo vakavakarau kina ina Vulivola ni iVavakoso kei na Vuli Vale ni Vakatawa. E so era dau vakavakarau ni vo e dua se rua na siga ni soqoni. Saga mo cakava tale ga ina ulutaga e so e tuvanaki me baleta na Soqoni ni Cakacaka ena veimacawa.

⁷ Vakaitavi Ina Soqoni: E tukuna na iVolatabu ni a kune o Jisu ena valenisoro ni se qai yabaki 12 ni a vakarorogo, a vakatataro qai saumi taro tale ga. (Luke 2:46, 47) A vakaitavi sara tiko ga kina. Ena yaga sara tale ga vei iko na soqoni ke o saga mo vakaitavi kina.​—Vkai. 15:⁠23.

⁸ Ena gadrevi mo vakadirorogo vinaka ina ka e vakatavulici ena soqoni. Ena so na gauna e rawarawa cake meda vakaitavi mai na buturara mai na noda dabe meda vakarorogo. Na cava na vuna? Ni rawa ni ciriyawa na noda vakasama ke dua tani e vosa tiko. Mo walia vakacava oqo? Vola vakaleleka e so na ka o rogoca. Toqa na veitikina bibi o na via vakayagataka e muri. Ni o vola vakaleleka e so na ka ena sega ni ciri tani na nomu vakasama mai na porokaramu. Cega tale ga na iVolatabu, qai vakamuria toka ni wiliwili o koya e vunau.

⁹ Kuria oqo, tovolea mo sauva mo vakaitavi ena iwase kece ni soqoni era dau sureti mera vakaitavi kina na vakarorogo. Ena yaga sara vakalevu vei iko ke o dau vakasamataka rawa vakavinaka e liu na ka mo na kaya. E tukuna na Vosa Vakaibalebale 15:28: “A lomana na yalododonu sa daunanuma na ka me kaya.”

¹⁰ Bulataka na Ka O Vulica: Na iotioti ni kalawa oya mo vakadeitaka ni sa ‘cakacaka yaco tiko vei iko’ na ka o vulica. (1 Ces. 2:13) Ni o muria na veika vinaka o vulica ena soqoni yadua, o na voleka sara kina vua na Kalou o Jiova. Ena qai yaco me ka dina vei iko o Jiova, o na marau vakalevu kina, o na lomavakacegu tale ga ni o “muria [tiko] na dina,” ni o bulataka sara ga.​​—3 Joni 4.

¹¹ Vei kemuni na tacida cauravou kei na goneyalewa, oni na marautaka vakalevu cake na soqoni ke oni vakavakarau wasoma, oni vakaitavi kina, oni qai bulataka na veika oni vulica kina. Ni oni vakayacora oqo, ena yaga taumada sara ga vei kemuni. Ena qaqaco kina na nomuni vakabauta, vaka kina na nomuni vakadeitaka mo ni dina tiko ga vua na Tamamuni vakalomalagi, o Jiova.​—Same 145:18.