Cakacaka ena Marau
1 E kaya o Jisu ni gauna ni nona tiko tawarairai, e dua na iwiliwili levu era na “sega ni kauai,” me vaka ga ena gauna i Noa. (Maciu 24:37-39, NW) O koya gona, eda na namaka nira le levu era na bese ni rogoca na itukutuku vinaka ni Matanitu ni Kalou. Na cava ena vukei keda meda na reki tiko ga ena noda cakacaka vakaitalatala?—Same 100:2.
2 Kena imatai, e gadrevi meda nanuma matua ni noda itukutuku kei na itavi ni vunau e solia vei keda na Kalou. E dina nida solia kina na noda maqosa kece, ia era bese ga ni vakarorogo, oqori era sa besetaki Jiova tiko. Nida vakasamataka na nona vakadonuya ena marau o Jiova na noda yalodina ni vunau, ena vukei keda oqori meda reki, da marau tiko ga nida cakava na cakacaka ni Kalou.—Jeme. 1:25.
3 Kena ikarua, era tiko e so era na ciqoma na veivakabulai i Jiova. E dina ni levu era na sega ni kauai, era tiko o ira era vaka na sipi mera kumuni mai ena gauna sara ga ni ivakataotioti oqo. Meda vunau tiko ga, da lakova “na koro kei na koro lailai vakaaduaga” da qai “taroga se ko cei sa yaga kina.”—Maciu 10:11-13.
4 Donu Tiko Ga na Rai: Na irogorogo ca kei lotu lasu e vakayalolailaitaka e so. E so tale era “vakaleqai” ena veika ni ituvaki ni bula oqo, ra qai “biu wale tu.” (Maciu 9:36, VV) E levu era lomaleqataka na nodra sega tu ni cakacaka, nodra bula, kei na nodra taqomaki. Na noda kila oqo ena vukei keda meda dei tiko ga ena noda cakacaka. Saga mo tekivutaka na veivosaki ena ka era kauai kina vakalevu na lewenivanua ena noda yalava. Vukei ira mera raica ni Matanitu ni Kalou duadua ga ena walia na leqa. Wilika na tikinivolatabu kei na so na tikina bibi ena noda ivola vakaivolatabu me tara kina na lomadra na itukutuku vinaka.—Iper. 4:12.
5 O ira na cakava ena marau na vosa ni Kalou era nanuma tu ga na vosa oqo: “Ni sa vu ni [neimami] kaukauwa me marautaki Jiova.” (Niem. 8:10) E sega na betena meda rarawa. “Kevaka sa yaga na vale ko ya, me yaco kina na nomudou veivakacegui: ia kevaka sa sega ni yaga, me suka tale vei kemudou na nomudou veivakacegui.” (Maciu 10:13) Ena vakalevutaka tiko ga o Jiova na noda reki kei na noda kaukaua nida dei tiko ga ena nona cakacaka tabu, ena qai vakalougatataka na noda yalodina o koya.