Maqosa na Kemu iRairai

E TUKUNI iko na nomu isulusulu. E dina ni raica o Jiova na ka e tu e lomada, ia na tamata e dau “raica na ka esau.” (1 Sam. 16:7) O na dokai ni o savasava qai rakorako na nomu isulusulu, era na taleitaka tale ga na tani mera vakarogoci iko. Na nomu isulusulu rakorako tale ga ena rogo vinaka kina na isoqosoqo o matataka, ena rogo vinaka tale ga kina na Kalou o qarava.

Nomu iDusidusi. E sega ni virikotora na iVolatabu na lawa matailalai me baleta na keda irairai. E vakarautaka ga e so na ivakavuvuli yaga me vukei keda meda vakatulewa vakavinaka. Ia, na ivakavuvuli kece oqo era yavutaki ena noda ‘cakava na ka kece ga me vakarokorokotaki kina na Kalou.’ (1 Kor. 10:31) Na ivakavuvuli cava soti e rawa nida vakasamataka me baleta na keda irairai?

Kena imatai, e vakasalataki keda na iVolatabu me savasava na yagoda kei na noda isulu. A vakasalataki ira na Isireli taumada o Jiova mera savasava, me vaka e vola ena nona Lawa vei ira. Me kena ivakaraitaki, nira veiqaravi voli na bete, e tiko na gauna era vakaroti mera dau sili kina, mera savata tale ga na nodra isulu. (Vunau 16:4, 24, 26, 28) Eda sega ni vakarurugi na lotu Vakarisito ena Lawa i Mosese, ia na kena ivakavuvuli e se dina tiko ga vei keda nikua. (Joni 13:10; Vkta. 19:8) Vakauasivi nida lako ina vanua ni soqoni se cakacaka vakaitalatala, e dodonu me boi vinaka na yagoda, noda icegu, me savasava tale ga noda isulu, me vakarawarawataka nodra torovi keda mai na tani. Mera ivakaraitaki vinaka sara ga ena tikina oqo o ira era vakaitavi ena soqoni. Noda kauaitaka na keda irairai e vakaraitaka nida dokai Jiova, eda doka tale ga na nona isoqosoqo.

Kena ikarua, e vakadreti keda na iVolatabu meda lokomi, meda yalomatua. E uqeti ira na yalewa lotu Vakarisito na yapositolo o Paula mera vakaisulu ena “lokomi kei na yalomatua: me kakua ni vakoula, se vakamata-ni-civa, se vakai sulu talei: ia (me vaka ga sa kilikili kei ira na yalewa era kaya era sa lotu) e nai valavala vinaka.” (1 Tim. 2:9, 10) E bibi tale ga na lokomi kei na yalomatua vei ira na tagane ena ka e vauca nodra isulusulu kei na nodra sauni ira.

Na tamata e lokomi ena sega ni dau malewa na nona itovo, ena sega tale ga ni cakava e dua na ka me saravi kina. E dua e yalomatua ena dau vakasamataka vinaka na ka e cakava, qai maqosa na nona lewa. Na tamata e tiko ruarua vua na itovo oqo ena vinaka nona vakatulewa baleta ni doka na ivakatagedegede vakaivolatabu. Sega ni kena ibalebale oqo ni kevaka e tiko vei keda na itovo ruarua oqo, eda sa na sega ni dau sauni keda, ia ena vukei keda ga meda kauaitaka na keda irairai kei na noda isulusulu, ena yasana adua eda na qarauna na ikotikoti, isulusulu, kei na sasauni vakadomobula sa takalevu tu nikua. (1 Joni 2:16) Dodonu meda nanuma tiko na ivakavuvuli kece oqo nida lako ina soqoni, lako ina cakacaka vakaitalatala, se da qarava e so tale na itavi. Na noda isulu ni gade mada ga e dodonu me tukuni keda nida rakorako, eda yalomatua. So na gauna e rawa nida vakamacalataka noda vakabauta vei ira e koronivuli, se vanua ni cakacaka. O koya gona, e bibi me dau maqosa, savasava, qai rakorako tu ga na noda isulusulu, e dina nida na sega sara beka ni dara na isulu eda dau dara ena vanua ni soqoni, soqo ni tabacakacaka, se soqo ni tikina.

Ena duidui ga na noda isulusulu. Ena sega ni tautauvata na mataqali isulu eda dui taleitaka. Ia, e dodonu meda muria tu ga na ivakavuvuli mai na iVolatabu.

E vakaraitaka na yapositolo o Pita ni bibi cake sara mai na italitali ni ulu kei na isulu e sau na ‘ka vakayalo sa vuni.’ (1 Pita 3:3, 4) Ni sinai na lomada ena loloma, reki, vakacegu, yalovinaka, kei na vakabauta, sa rawa ni yaco oqo mera noda isulu vakayalo, qai vakarokorokotaki kina na Kalou.

Kena ikatolu, e vakasalataki keda na iVolatabu meda dau dikevi keda meda vakadeitaka ni sa dau kilikili tiko na noda isulusulu. A vosa tiko vei ira na yalewa o Paula ena nona cavuta ena 1 Timoci 2:9 “nai sulu e kilikili,” ia na ivakavuvuli ni tikinivolatabu oqo e yaga tale ga vei ira na tagane. E okati me kilikili na ka e rakorako qai maqosa. Eda vutuniyau se da dravudravua, e rawa ga ni kilikili na keda irairai.

Na drauniuluda e dua na ka e dau veisautaka vakalevu na keda irairai. O koya gona, e dodonu me savasava qai caka vakavinaka. E duidui na ikotikoti kei na icakacaka ni ulu ena duidui vanua e vuravura. A kauaitaka tale tiko ga na yapositolo o Paula na ka oqo ena nona ivakasala ena 1 Korinica 11:14, 15 me baleta na ulu. Ia, ni dua na tagane e vukica na irairai ni uluna ena nona vinakata me vaka na yalewa, se yalewa ena nona vinakata me vaka na tagane, oqo e sa veisaqasaqa kei na ivakavuvuli ena iVolatabu.—Vkru. 22:5.

Vei ira na tagane, na irairai e kilikili e okati tale ga kina nodra dau toro vinaka. Vei ira e matau vei ira na vakasominiwai, e dodonu me dau koti vakamaqosa tu ga.

Kena ikava, me kua ni laurai ena keda irairai nida lomani vuravura kei na veika vakavuravura. E veivakasalataki na yapositolo o Joni: “Dou kakua ni lomani vuravura, se na veika sa vakavuravura.” (1 Joni 2:15-17) Sa laurai levu sara tu ga ena gauna oqo na nodra lomani vuravura e levu ena ka era dau gadreva. E so na gagadre oqo a cavuta o Joni e wili kina na gagadre ca ni yago, kei na dokadokataki ni ka e taukeni. E tukuna tale ga na iVolatabu na yalo ni talaidredre se na saqati ni veiliutaki. (Vkai. 17:11; Efeso 2:2) Na gagadre kei na itovo vaka oqo era dau vakavotui ena isulusulu kei na sasauni. Tini kina me veivakamaduataki na kedra irairai e so, veivagaroi, sakasaka, yakusurasura, se sakulevu. Nida iVakadinadina i Jiova, eda qarauna me kua ni takavi keda na ivalavala sega ni vakarisito vaka oqo.

Kua ni vakatotomuri vuravura! E vinaka duadua mo vakatotomuria na nodra isulusulu kei na sasauni na tagane kei na yalewa lotu Vakarisito matua ena ivavakoso era ivakaraitaki vinaka. O ira na cauravou era na vinakata mera dau vunau ena buturara e rawa nira vuli mai na nodra isulusulu o ira era dau vakaitavi ena vunau soqovi levu. Ia, o keda kece e rawa nida vuli mai na nodra ivakaraitaki o ira sa ra yalodina vakabalavu tu mai ena cakacaka vakaitalatala.—1 Tim. 4:12; 1 Pita 5:2, 3.

Kena ikalima, nida vakalewa tiko se cava e kilikili, meda kua ni guilecava ni o “Karisito sara tale mada ga e a sega ni cakava na ka ga e vinaka vua.” (Roma 15:3, VV) E bibi duadua vei Jisu me cakava na loma ni Kalou. E bibi tale ga vua me dau vakaliuci ira na tani, qai muri na ka e baleti koya. Na cava gona meda cakava ke rawa ni vakaleqai ira eda sa mai qaravi ira tiko e so na noda isulusulu se ivakarau ni noda sauni keda? Eda rawa ni vakatulewa vakavinaka kevaka eda vakatotomuria na ivakaraitaki ni yalomalumalumu i Karisito. A cavuta tale ga na yapositolo o Paula na ivakavuvuli vinaka oqo: “Keitou sa sega ni vakatarabetaka e dua e na dua na ka.” (2 Kor. 6:3) O koya gona, eda na sega ni cakava na uluda ena kena icakacaka eda vinakata, se tokara na isulu eda na via tokara, kevaka ena vakavuna mera bese ni rogoci keda o ira ena noda yalava.

iDuriduri e Matau. Na maqosa ni keda irairai ena vakatau tale ga ena noda iduriduri nida vosa. Ena sega ni tautauvata ga na noda iduriduri. Ia, e macala mai na iVolatabu ni rakorako qai nuidei o koya e dau ta cake se duri vakadodonu. (Vunau 26:13; Luke 21:28) Ia, e so era sa na vakalairoro ga ena vuku ni bula vaqase se cakacaka vakaukaua e liu, era na dau vakaitoko se tataba ena dua na ka nira tucake. Vei keda na kena vo, e bibi meda dau duri vakadodonu nida vosa, me kua ni laurai ena noda iduriduri na madua se vakawelewele. E sega ni ca noda taura na itutunivunau ena so na gauna, me kua ga nida tataba kina.

Me Maqosa Qai Savasava na Noda iYaya. Sa da raica mai ni bibi meda savasava, ia me savasava tale ga qai maqosa na iyaya eda vakayagataka ena cakacaka vakaitalatala.

Raica mada na nomu iVolatabu. Meda saga me dua na noda iVolatabu vou ke sa makawa na kena eda vakayagataka tiko. Ia, se mani vakacava na dede ni kena tiko vei keda e dua na iVolatabu, e dodonu me laurai kina noda vakamareqeta.

Eda dui lewa na itawatawa ni noda iyaya ena noda kato, ia me tawa vakamaqosa. Vakacava, o dau raica nira lutu mai na nodra iVolatabu e so na tacida e so na tiki ni veva nira vakarau wilivolatabu e matanikatuba, se ra vunau tiko ena ivavakoso? O kauai ena ka e yaco oya se sega beka? Ke dau vakavu kauai na lulutu ni veva o dau vakaciqira ena loma ni nomu iVolatabu, de dua ena ivakaraitaki ni maqosa na nomu raica mera biu vakatikitiki ena dua tale na vanua. Kua tale ga ni guilecava ni ka beci ena so na vanua ke biu ena fuloa na iVolatabu se ivola vakalotu.

E dodonu meda kauaitaka me dau vinaka na keda irairai. Na ka tale ga era nanuma na tani me baleti keda e dau vakatau ena keda irairai. Ia, na kena e bibi duadua nida vinakata meda “vakarogovinakataka nai vakavuvuli ni Kalou na nodai Vakabula e na ka kecega.”—Taito 2:10.