Meda Yalomatua ni sa Voleka na iCavacava
1 E dau tukuna na Vosa ni Kalou ni siga i Jiova ena lako mai “me vaka na daubutako”—e lako lo mai vakidacala, vakasauri tale ga. (1 Ces. 5:2; Maciu 24:43; 2 Pita 3:10; Vkta. 3:3; 16:15) Oqori na vuna e kaya kina o Jisu: “Mo dou qai vakarau tu, koi kemudou talega: ni sa lako mai na Luve ni tamata e na tiki-ni-siga dou sa sega ni nanuma kina.” (Maciu 24:44) Ena sala cava eda na vakarau tu kina vakayalo ni sa voleka mai na icavacava? Dua na tikina yaga e vakavotui ena veivakadreti uqeti vakalou oqo: “Dou yalomatua.”—1 Pita 4:7.
2 O koya e yalomatua e tu vua na rai i Jiova. (Efeso 5:17) Ena rawarawa kina vua me wiliki koya me “kai tani ka tu vakavulagi” ena vuravura makawa oqo. (1 Pita 2:11, VV) Ena siqema rawa na veika e bibi cake, na veika me vakaliuci, ena lewa vinaka tale ga kina na ka me cakava.—Fpai. 1:10.
3 Me So na Noda iSausau Vakayalo: Dua na ka e rawa ni vukei keda meda yalomatua na noda navuca e so na isausau vakayalo da qai saga meda sauva. Sa tiko beka e so na nomu isausau vakayalo? O dau tovolea mo wilika e veisiga na iVolatabu, lakova na soqoni kece, wilika na lavelave kece ni Vale ni Vakatawa kei na Yadra!, se vakaitavi cake vakalevu ena cakacaka vakavunau? Ke o navuca na isausau e ganiti iko vinaka, o saga deivaki mo rawata oqori, o qai kerei Jiova me vakalougatataka na nomu sasaga, o na kurabuitaka dina na ka o na rawata kina.
4 E dua na qase e taroga na nodrau isausau vakayalo e dua na veiwatini gone. Rau lialiaci sara ena taro oya, rau qai siqema ni rawa ni rau painia ke rau bula ga vakarawarawa rau qai bokoca kece na dinau e so erau vakaicolacola tu kina. Rau lewa sara me sa nodrau isausau oya. Erau gumatuataka na saumi lesu ni dinau, qai biu tani vakamalua na veika tawayaga erau dau vakaoti gauna tu kina e liu. Rau rawata nodrau isausau ni oti vinaka e dua na yabaki. Cava na kena itinitini? E kaya o tagane: “Ke a sega na isausau, ke a sega ni keirau yacova na vanua keirau sa mai tu kina qo. Keirau sa qai marau ga vakalevu. E tosocake na vinaka ni neirau bula, e malumu tale ga. Sa qai vakainaki dina.”
5 Meda vakarau tu mada ga vakayalo nida waraka na siga i Jiova, ena noda lewa vakayalomatua noda bula, da qai kua ni gole tani mai na noda cakava tiko ga na loma ni Kalou.—Taito 2:11-13.