Me Bula na Tamata Kece Ga
1. E vakatau ena cava na nona vakadonui keda na Kalou?
1 Na yalololoma ni Kalou e dolava na sala meda vakabulai kina. Io, e inaki i Jiova me “bula na tamata kecega, ka mai kila sara nai vakavuvuli dina.” (1 Tim. 2:3, 4) Ia, na nona vakadonui keda na Kalou e sega ni vakatau ena matatamata eda lewena, noda itutu vakavanua, noda rawaka, se na keda irairai e sau, e vakatau ga ena noda cakacakataka na isoro ni veivoli i Jisu. (Joni 3:16, 36) Nida cakacaka vata tiko kei na Kalou, e bibi meda kua ni dau veivakaduiduitaki, ni oqo e rawa ni vakaleqa na lomada meda cati ira kina na tamata e ciqoma o Jiova.
2, 3. Na rai cava me tiko vei keda meda kua kina ni raici ira vakatani e so ena vuku ga ni kedra irairai?
2 Me Kua Nida Raici Ira Vakatani: E raica o Jiova na loma ni tamata, e sega gona ni dau lomaca se veivakaduiduitaki. (1 Sam. 16:7) E raica tale ga na ka e rawa nira na cakava me baleta na nodra bula. Oya na vuna e dau raici ira kina na via vakamarautaki koya mera ka domoni. (Akeai 2:7) E vaka tale beka oqori noda rai?
3 Ena cakacaka vakavunau, e rawa nida rikou ena kedra irairai e so eda sotava. Ni sakulevu qai veivagarogaroi beka na nodra isulusulu, ra kumilevu, se vakasau tu na ucudra se na tebenigusudra. E so beka e sega tu na nodra vale. So tale era dau kurauti keda. Ia me kua nida raici ira kina vakatani, da qai nanuma ni o ira na mataqali tamata vaka oqo ena sega vakadua nira yaco mera dauveiqaravi i Jiova. Me tiko vei keda na rai dodonu, vakauasivi ni o keda mada ga eda ‘a lialia tu e liu, eda talaidredre, da vakacalai’ tale tu ga. (Taito 3:3) Ke da nanuma matua tiko oqori, eda na gumatua ni vunau vei ira na tamata kece ga, vaka kina o ira e rawa nira raici vakatani ena vuku ni kedra irairai.
4, 5. Na cava eda vulica ena nodrau ivakaraitaki o Jisu kei Paula?
4 iVakaraitaki ena iMatai ni Senitiuri: A tu vakarau o Jisu Karisito me vukei ira eda nanuma ni sega ni rawa vakadua mera na dauveiqaravi ni Kalou. (Luke 8:26-39) Dina ga ni vakacala o Jisu na vakayacori ni ka ca, e kila tale ga ni rawa ni coko na tamata ina dua na ivakarau ni bula torosobu. (Luke 7:37, 38, 44-48) E dauveinanumi gona o Jisu ni kila na ituvaki era tu kina na tamata, qai “lomani ira, ni ra sa vaka na sipi sa sega na nodrai vakatawa.” (Mari. 6:34) Rawa beka nida vakadamurimuria na nona ivakaraitaki?
5 Na yapositolo o Paula a vakaviriki, warolaki, qai bala i valeniveivesu. (Caka. 14:19; 16:22, 23) Ia, e yaloca beka ena veika rarawa e sotava, me nanuma kina ni tawayaga na gauna a vakayagataka vei ira e so na matatamata se ena so na vanua? Sega sara ga. E kila tu o Paula ni tiko na tamata lomadina ena veimatatamata, e vakadeitaka gona me vakasaqarai ira. E vaka beka oqori na noda raici ira na duikaikai era tiko ena noda yalava, e duidui tale ga na itovo ni nodra bula?
6. Ena cakayaco vakacava noda itovo ni rai vei ira era gole vou yani ina soqoni?
6 Meda Dau Veiciqomi Tale ga Niku:: Era marautaka e levu na tamata ni Kalou nodra a ciqomi ena ivavakoso era lewena na mataveitacini e sega ni yalani ga na nodra rai ena irairai e sau. Laurai oqo ena ka e yaco mai Jamani, ena nona a gole ina dua na Kingdom Hall e dua na turaga kumilevu, drauniulu balavu, qai duka na nona isulu. E kilailevu tale ga ni tamata ca. Ia, e ciqomi ena marau ena soqoni. E tarai koya sara ga oqori, mani lai tiko tale ena soqoni ena macawa e tarava. Ni oti ga e dua na gauna lekaleka, sa vakasavasavataki koya, muduka na kana tavako, rau vakamau sara kei na nona vakasuva. Sega ni dede, erau sa qaravi Jiova vakaveiwatini, ratou sa duavata sara tale ga kina kei rau na luvedrau erau drua tabua.
7. Rawa vakacava nida vakadamurimuria na noda Kalou e sega ni dau veivakaduiduitaki?
7 Nida vakadamurimuria na noda Kalou e sega ni dau veivakaduiduitaki, meda sureti ira gona na tamata kece ga me bau mai yaga tale ga vei ira na yalololoma ni Kalou.
[Blurb on page 3]
“Ni sega ni dau vakaduiduitaka na tamata na Kalou. Ia sa dau vinakati ira kece ga era dau vakarokorokotaki koya ka dau cakava na ka e dodonu.”—Caka. 10:34, 35, VV.