Vakaraitaka ni O Kauai Dina ena Nomu Tu Vakarau Mo Veisau
1 E ivakaraitaki vinaka na yapositolo o Paula ena nona dau tu vakarau ni veisautaka na iwalewale ni nona vakamacalataka na itukutuku vinaka, me ganita na nodra ivakarau ni bula kei na itovo ni nodra rai na vakarorogo. (1 Kor. 9:19-23) Meda saga tale ga meda cakava vaka kina. Nida dau vakasama gona e liu, eda na rawa ni veisautaka na vakatutu e dau tabaki ena Noda Cakacaka Vakaitalatala me ganiti ira na tiko ena yalava. Nida voleka yani ena dua na katuba, eda rawa ni raica sara ga na veika e kauaitaka na itaukeinivale, da qai okata oqori ena noda ivakamacala. Ia e tiko tale e dua na sala eda rawa ni tu vakarau kina meda veisau ena cakacaka vakavunau.
2 Yavutaka Nomu Vosa ena Nona iSaunitaro: Nida dau cakacaka vakavunau, eda dau tarogi ira vakalevu na itaukeinivale da qai waraka mera sauma. Eda dau raica vakacava na nodra isaunitaro? Eda dau vakavinavinakataka beka na nodra isaunitaro da qai tomana tiko ga na ivakamacala eda vakarautaka mai? Se na ka eda tukuna e vakaraitaka nida kauaitaka na ka era kaya na itaukeinivale? Ke da kauaitaka dina na ka era kaya na itaukeinivale, eda na rawa ni taroga e so tale na taro meda kila vinaka kina na ka e tiko e lomadra. (Vkai. 20:5) E rawa nida tukuna na itukutuku vinaka e ganita sara ga na ka era kauai kina se tukuna na itaukeinivale.
3 Oqo ena gadrevi kina meda tu vakarau meda veisautaka na noda ivakamacala ina so na ulutaga eda sega ni vakarautaka mai. Ke da tekivuna noda ivakamacala ena dua na leqa a tabaki se kacivaki, ia qai tukuna mai o itaukeinivale na nona leqa se dua na leqa ena nona yasayasa, eda na veisautaka na noda ivakamacala e yavutaki ena iVolatabu ina veika e ganiti ira. Oqo e vakaraitaka na noda kauaitaki ira dina.—Fpai. 2:4.
4 Me Ganiti Koya Nomu Vosa: Ni taroga e dua na taro o itaukeinivale, ena vinaka me qai saumi na taro oqori ena dua tale na gauna me rawa kina nida lai vakekeli. E rawa tale ga nida solia na ivola e vakamacalataka vinaka sara ga na ka e kauai kina. Oqo e vakaraitaka na noda kauaitaka dina noda vukei ira e so tale mera mai kilai Jiova.—2 Kor. 2:17.