Soqo ni Tikina ni iVakadinadina i Jiova ena 2008
1. (a) Na cava e bibi kina vei keda nikua nona ivakasala o Paula vei ira na lotu Vakarisito Iperiu? (Wilika Iperiu 10:24, 25.) (b) Na gauna cava sa voleka mai meda vakayagataka kina na ivakasala i Paula?
1 Na yapositolo o Paula a uqeti ira na lotu Vakarisito Iperiu mera dau soqoni vata qai veivakayaloqaqataki ‘nira raica’ ni sa voleka mai na siga. (Iper. 10:24, 25) E tu e levu na ivakadinadina ni “siga” a cavuta o Paula sa voleka sara! Koya gona, eda vakanamata ina gauna meda soqoni vata kina kei ira na tacida meda vakavulici vakayalo, qo ena vakaukauataki keda ena “iotioti ni veisiga” qo. (2 Tim. 3:1, NW) Ena vakarautaki na gauna ni soqo vata va qo ena soqo ni tikina ni 2008.
2. (a) Na cava e bibi kina meda tiko ena siga tolutolu ena soqo ni tikina? (b) Meda vakarautaki keda vakacava ena soqo qo?
2 Tiko ena Siga Tolutolu: Eda uqeti meda tiko ena siga tolutolu ni soqo qo. Nida saga “me da kakua ni biuta na vakasoqoni vata,” eda na sega ni calata na kakana vakayalo ena vakarautaki ena soqo ni tikina. (Iper. 10:25) Ena vinaka meda sa tekivu vakavakarau yani qo. Kerea rawa vei nomu boso mo vagalalataki ena siga ni soqo, me rawa ni tuva o koya e dua na ituvatuva veiganiti me kua ni vakaleqa na cakacaka ena siga oya. Ke donuya na gauna ni vuli, kerea rawa vei qasenivuli me vagalalataki na luvemu. Vakamacalataka vei ira ni porokaramu qo e tiki tale ga ni noda sokalou. Ni o vakayacora qori ena vakalougatataka o Jiova na nomu sasaga mo vakaliuca na Matanitu ni Kalou.—Maciu 6:33.
3. Eda na vakaraitaka vakacava na veinanumi?
3 Vukea e So Tale: A kerei ira na tacina o Paula mera ‘veivakauqeti ena loloma.’ (Iper. 10:24) E tiko beka e so ena noda Vulivola ni iVavakoso era na gadreva na veivuke mera tiko ena soqo ni tikina? Rawa beka nida kauti ira noda vuli iVolatabu ena soqo ni tikina, ke rawa mada ga nira tiko ena dua na siga? Nida vakamacalataka na soqo ni tikina qo vei ira na wekada kei ira tale na so era sega ni tiko ena dina, meda sureti ira sara ena soqo. Nomu ivakaraitaki ni yalololoma ena kauta mai na veivakalougatataki.
4. Eda na kila vakacava na siga, tikinisiga, kei na vanua ena vakayacori kina na soqo ni tikina?
4 Vakatataro: Levu era dau qiri ina valenivolavola ni tabana ena veiyabaki mera taroga na vanua kei na gauna ena vakayacori kina na soqo ni tikina. Ke o ni via kila na vanua ena vakayacori kina na soqo qo, moni qai raica Na Vale ni Vakatawa 1 Maji, 2008.
5. Na cava meda cakava ke da vinakata na ivakamacala me baleta na icili?
5 Ke o nanuma mo tiko ena dua tale na soqo ni tikina e sega ni lesi kina nomu ivavakoso o qai vinakata na icili, rawa ni o volavola ina tabana e qarava na soqo ni tikina, e volai tiko ena tabana e muri ni fomu Special Needs Room Request. Na fomu qo ena vakau yani vua na vunivola ni ivavakoso. Ke o ni via kila na kena macala, mo qai tawana vata mai kei na nomu ivola e dua tale na waqanivola sa saumi oti na kena sitaba, volai tu kina na nomu katonimeli.
6. Na cava me nanumi tiko me baleta na Special Needs Room Request fomu?
6 Veika e Gadrevi: Ke vinakata na veivuke e dua na dautukutuku me baleta nona icili, ena vakatulewataka na Komiti ni Cakacaka ni iVavakoso ke ganiti koya me vakalewena na fomu Special Needs Room Request. Ni bera ni vakauta na vunivola ni ivavakoso na fomu ena tabana ni veivakaicilitaki ni soqo ni tikina, me muri na idusidusi e tiko kina kei na idusidusi tale ga e tiko ena ivola ni 15 Tiseba 2007, a vakau yani vei ira na qase.
7. Ena sala cava eda na vakalagilagia kina na yaca i Jiova nida tiko ena soqo ni tikina?
7 Dakacaka Vinaka: Noda talairawarawa ina vakaro i Jiova ena noda sokalou ena duavata, ena uqeti keda meda “vinaka kina.” Kena e bibi duadua oya nida na vakalagilagia kina na yaca i Jiova. (Aisea 48:17) Noda “cakacaka vinaka” era na kauai kina e levu, ra qai dau vakacaucautaki keda.—1 Tim. 5:25, VV.
8. E vakabibitaka vakacava na Maciu 4:4 na yaga ni noda vakarorogo vinaka?
8 E kaya o Jisu ni vakatau noda bula ena noda rogoca na “vosa kecega sa lako mai na gusu ni Kalou.” (Maciu 4:4) Ena noda soqo ni tikina, e dau solia mai o Jiova na “kakana e na kena gauna dodonu,” e vakarautaka na “dauveiqaravi yalo dina ka vuku.” (Maciu 24:45, VV) E levu na ka e caka ena kena vakarautaki na magiti vakayalo qo. Meda vakavinavinakataka na yalololoma i Jiova ena noda tiko da qai vakarorogo vinaka ena porokaramu ni soqo.
[Kato ena tabana e 3]
Gauna ena Caka Kina na Soqo:
Vakaraubuka kei na Vakarauwai
9:20 a.m. - 4:55 p.m.
Sigatabu
9:20 a.m. - 4:00 p.m.