Veivauqeti ena Cakacaka Vakavunau
1 Eda taleitaka kece meda uqeti, meda veivauqeti tale ga me vaka na “ka sa vosataki taudonu.” (Vkai. 25:11) Eda na veiuqeti vakacava nida veitomani kei na dua ena cakacaka vakavunau?
2 Veiuqeti: E veivauqeti ke da veitalanoataka na ka vakayalo nida lako tiko ena cakacaka vakavunau! (Same 37:30) Rawa nida veitalanoataka na tikina eda sa vakarautaka mai, se dua na ka vinaka eda se qai sotava ga ena cakacaka vakavunau. (Caka. 15:3) Da vulica beka e dua na tikina ena noda wili iVolatabu e veisiga, ka eda wilika ena ivoladraudrau, se ka eda rogoca ena soqoni. Rawa tale ga nida veitalanoataka na vunau soqovi levu eda se qai rogoca oti ga.
3 Ena vakayalolailaitaki keda beka noda sega ni sauma rawa na nona ile na itaukeinivale. Ni bera nida vosa ena vale e tarava e vinaka meda veitalanoataka kei koya eda cakacaka vata na ka eda rawa ni cakava ena gauna eda na sotava tale kina na ituvaki vaka oya. Rawa nida raica sara ga na ivola na Reasoning. Ke da marautaka na iwalewale ni nona vakamacala o koya eda cakacaka vata, meda vakavinavinakataki koya ni na uqeti koya sara ga.
4 Vakaliuliu: E tiko beka e so na tacida ena iwasewase ni vulivola eda se bera ni cakacaka vata? Noda liu sara ga ni sureti ira meda cakacaka vata eda na vakayaloqaqataki vata kina. (Roma 1:12) Era marautaka na painia tudei kei na painia veivuke meda tomani ira ena cakacaka vakavunau, vakabibi ena mataka lailai se yakavi sara, ni dau lewe lailai ga era cakacaka vakavunau kina. Noda tomani ira na painia ena cakacaka vakavunau e vakaraitaka noda veitokoni. E tiko beka e dua na dautukutuku tautauvimate e sa lailai na gauna e vakayagataka ena cakacaka vakavunau? Noda tuvanaka meda veitomani vata ena caka vuli iVolatabu ena yaga vua, vaka tale ga kina o keda.—Vkai. 27:17.
5 E veivauqeti noda vakavinavinakataka kei na noda vakacaucautaka na ka lalai e dau caka. Meda vakasamataka tiko na tikina qo nida veitomani kei na dua ena cakacaka vakavunau baleta nida vinakata meda ‘veivakatataki cake tiko ga vakai keda.’—1 Ces. 5:11.