“Cakava na Ka Kecega e na Vuku ni Tukutuku-Vinaka”
1. Na cava ena cakava e dua na daukacivaka na Matanitu ni Kalou, cava na vuna?
1 E kila na yapositolo o Paula ni dodonu me vunautaka na itukutuku vinaka. (1 Kor. 9:16, 19, 23) O keda tale ga eda uqeti meda tukuna na itukutuku vinaka baleta nida kauaitaka nodra bula na tamata.
2. Na veiveisau cava o na cakava ni o lai vunau, cava na vuna?
2 Vunau ena Gauna Kece Ga: Na gonedau dina ena sega ni kolotaka vakaveitalia nona wanisiwa se lawa, ia ena vakasaqara na vanua e katoa vinaka kina na ika. De na vinakati tale ga vei keda na “gonedau ni tamata” eso na veiveisau meda na kunei ira kina na tiko ena yalava. E ka dokai qai marautaki nodra soqoni vata mai ni na vaka ga noda yavia na “veimataqali [ika] kecega.” (Maciu 4:19; 13:47) Eda na rawa beka ni sotavi ira na tamata ena nodra vale ena yakavi siga se nida vunau e salatu ena matakalailai? A nona isausau o Paula me “vunautaka vakavinaka sara na itukutuku vinaka,” e cakava qori ena gauna veiganiti kece.—Caka. 17:17; 20:20, 24, NW.
3, 4. Na cava eda rawa ni cakava nida lai cakacaka vakavunau, cava na kena yaga?
3 Me Ganiti Ira ena Yalava Nomu iVakamacala: O ira na gonedau era dau veisautaka na iwalewale ni nodra siwa se qoli mera tagava kina e dua ga na mataqali ika. Ena veiuqeti vakacava na itukutuku vinaka eda lai tukuna vei ira ena yalava? Me rogo matau na noda ivakamacala, meda kila vinaka na ka era kauai kina na tiko ena yalava, da qai vakarorogo matua ina nodra ivakamacala me baleta na ulutaga eda vosa kina. (Jeme. 1:19) Meda kila na nodra nanuma, ena vinaka meda taroga na taro vakavure vakasama. (Vkai. 20:5) Nida cakava qori ena rawarawa sara noda veisautaka na iwalewale ni noda tukuna na itukutuku vinaka me yaga ina nodra bula. A yaco o Paula me ‘ka kece ga vei ira kece ga na tamata.’ (1 Kor. 9:22) Mera uqeti na itaukeinivale, e vinakati meda dau veisautaka na noda ivakamacala.
4 E ka marautaki dina meda vakarogoya “nai rogorogo vinaka ni ka vinaka”! (Aisea 52:7) Meda “cakava na ka kecega e na vuku ni tukutuku-vinaka” me rawa ni levu era rogoca.—1 Kor. 9:23.