Rawa Beka ni O Moica Nomu iTuvatuva me Ganita na Yalava?
1. Na cava meda moica kina noda ituvatuva ni cakacaka vakavunau me ganita na yalava?
1 Nida sa mai lotu Vakarisito e vakaraitaka nida sa ciqoma na veisureti meda “gonedau ni tamata.” (Maciu 4:19) Me vakataki ira ga na gonedau, ena katoa na noda noke ke da tuvanaka vinaka na gauna meda vunau kina ena vanua era dau kune kina na tamata. E levu era dau tu e vale ena yakavi siga kei na yakavi bogi. Oqo na gauna era sega ni dau osooso kina, ra qai dau veiciqomi. Rawa beka nida vedisautaka noda ituvatuva meda cakacaka vakavunau ena gauna oqo?—1 Kor. 9:23.
2. Na gauna cava e rawa nida vunautaka kina na itukutuku vinaka vei ira e levu?
2 Vunau ena Yakavi: Ke da sa lalawataka rawa tu meda vunau ena yakavi bogi, eda na sotavi ira kina e levu na itaukeinivale. (Vkai. 21:5) O ira na itabagone e rawa nira vunau ni suka na vuli. E so tale e rawa nira vunau ni suka na cakacaka. Ia, e so na iwasewase ni vulivola e rawa nira tuvanaka e veimacawa me dua na aua nodra vunau ni bera nira lai vulivola.
3. Sala cava so eda rawa ni cakacaka vakavunau kina ena yakavi siga se yakavi bogi ena noda dui yalava?
3 Nida cakacaka vakavunau e veivale ena yakavi siga se yakavi bogi eda na sotavi ira kina na sega ni dau tu e vale ena siga. Ena so na vanua, na cakacaka vakavunau ena salatu se so tale na tabana ni cakacaka vakavunau e rawa sara ga ni caka ena yakavi bogi. Levu tale ga era raica ni oqo e gauna vinaka me caka kina na veisikovi lesu kei na vuli iVolatabu.
4. Na cava e bibi kina meda dau veinanumi da qai yalomatua nida cakacaka vakavunau ena yakavi bogi?
4 Bibi na Yalomatua: E bibi na yalomatua nida cakacaka vakavunau ena yakavi bogi. Ena vinaka meda cakacaka vakavunau ga ni se yakavi bogi, meda kua ni lako ena gauna sa ra vakarau moce kina na itaukeinivale. (Fpai. 4:5, NW) Nida tukituki ena matanikatuba, meda tu ena vanua rarama me rawa nira raici keda. Meda vakamacalataka vakamatata vei ira na inaki ni noda veisiko. Kevaka eda gole yani ena gauna sara ga era vakayakavi tiko kina, meda kerea meda qai lesuvi ira tale mai ena dua na siga. Meda dau veinanumi.—Maciu 7:12.
5. Eda na qarauni keda vakacava nida cakacaka vakavunau ni sa karobo na vanua?
5 E bibi tale ga meda qaqarauni. Kevaka eda vunau tiko ni sa karobo na vanua, meda kua ni lako taudua, meda lako yarurua se vakailawalawa. Cakacaka ga ena vanua e vakacina na kena gaunisala. Vunau ga ena vanua eda kila ni vinaka. Meda kua ga ni vunau ena vanua e dau yaco kina vakalevu na leqa.—Vkai. 22:3.
6. Na cava e dua tale na yaga ni noda cakacaka vakavunau ena yakavi siga se yakavi bogi?
6 Na cakacaka vakavunau ena yakavi siga kei na yakavi bogi e gauna vinaka meda cakacaka vata kina kei ira na painia veivuke vaka kina o ira na painia tudei. (Roma 1:12) Vakacava, e rawa beka nida moica noda ituvatuva meda cakacaka vakavunau ena yakavi bogi?