Vosa ena Nuidei

O KOYA e vosa ena nuidei e kilai ni vakabauta dina na ka e tukuna. Na mataqali nuidei vaka oqo a laurai vei Paula ena nona cakacaka vakaitalatala. E vola o koya vei ira na lotu Vakarisito mai Cesalonaika: “Ni keitou a sega ni kauta yani vei kemuni na i Tukutuku Vinaka e na vosa wale ga,” ia “na neitou sa vakadinadinataka e na vu ni yalo i keitou ni sa i tukutuku dina.” (1 Ces. 1:5, VV) E vakaraitaka na nuidei oqo o Paula ena ka e tukuna kei na ka e cakava. E dodonu tale ga me laurai nida vakabauta na ka dina mai na iVolatabu eda vakamacalataka.

E dua e nuidei e sega ni kena ibalebale ni yalodua, dokadoka, se qaciqacia. O koya e nuidei ni vosa e tukuna na ka ga e tiko ena Vosa ni Kalou, qai vakaraitaka ena nona vosa na kaukaua ni nona vakabauta.—Iper. 11:1.

Gauna e Bibi Kina Meda Vosa ena Nuidei. E bibi meda vosa ena nuidei ena noda cakacaka vakaitalatala. O ira na rogoci keda era sega ni kauaitaka wale ga na ka eda tukuna, era dau kauaitaka tale ga na kena itukutukuni. Era na kila se tarai iko na ka o tukuna tiko se sega. Ena kilai vinaka ena nomu nuidei ni tiko vei iko e dua na itukutuku bibi qai yaga o na vinakata sara ga mo wasea.

E bibi tale ga me raici noda nuidei nida vosa tiko vei ira na tacida vakayalo ena ivavakoso. E vola na imatai ni nona ivola na yapositolo o Pita me ‘veivakayaloqaqataki, me vakadinadinataka tale ga na loloma dina ni Kalou.’ Sa qai vakadreti ira na mataveitacini e kea mera “tu dei.” (1 Pita 5:12, VV) E yaga dina ina ivavakoso mai Roma na veika e vola vei ira o Paula baleta ni vola ena nuidei. A vola o koya: “Ni’u sa kila vakaidina, ni na sega ni rawata na mate, se na bula, se ko ira na agilose, se ko ira sa liu, se ko ira sa kaukauwa, se na veika sa yaco edaidai, se na veika ena yaco emuri, se na ka cecere, se na ka titobu, se dua tani na ka, me tawasei keda mai na loloma ni Kalou, sa yaco e na vuku i Karisito Jisu na noda Turaga.” (Roma 8:38, 39) Na veivakauqeti i Paula me baleta na bibi ni cakacaka vakavunau kei na nona gugumatua sara mada ga o koya ena cakacaka oqo e vakadinadinataka ni a sega ni vakabekataka o koya na kena bibi. (Caka. 20:18-21; Roma 10:9, 13-15) Na nuidei vaka oqo e dodonu tale ga mera vakaraitaka na qase ni ivavakoso ena gauna oqo nira vakavulica tiko na Vosa ni Kalou.

E dodonu mera vosa ena nuidei na itubutubu nira vakamacalataka na veika vakayalo ena gauna ni vuli vakavuvale kei na veigauna tale e so. Ia, ena vinakati mera saga mada me vu mai lomadra nodra lomana na Kalou kei na nona ivalavala. Sa na qai rawa nira vosa ena nuidei, vu tale ga mai lomadra nodra vosa vei ira na luvedra baleta ‘ni dau vosataka ga na gusuda na ka e sinai e lomada.’ (Luke 6:45, VV; Vkru. 6:5-7) Na nodra dau vosa vaka oqo na itubutubu, lakovata kei na nodra ivakaraitaki, era na raica kina na gone ni tu vei ira na “vakabauta dina sara.”—2 Tim. 1:5.

E bibi mo dau vosa ena nuidei ni tarogi na ka o vakabauta. Ena kidroa beka e dua nomu icaba e koronivuli, nomu qasenivuli, se dua drau cakacaka vata ni o sega ni tomani ira ena so na soqo ni marau. Na isaunitaro e momona qai tau ena nuidei e rawa ni tarai koya me doka kina nomu vakabauta yavutaki vakaivolatabu. Vakacava ke dua e temaki iko mo cakava e dua na ka ca—mo lawaki, mo vakayagataka na wainimate gaga, se mo veidauci? E bibi mo na vakamatatataka ni o na sega ni vakaitavi ena ka vaka oya, e sega tale ga ni dua na ka ena veisautaka na nomu vakasama. Ni o sabaya na veitemaki, vosa sara ga ena nuidei. A kaya ena nuidei o Josefa ni sabaya na veitemaki i wati Potifa: “Au na qai cakava rawa vakaevei na ka ca vakaidina oqo, kai valavala ca vua na Kalou?” E tini dro ga o Josefa ni sagai koya toka ga na yalewa oqo.—Vkte. 39:9, 12.

Sala e Vakaraitaki Kina na Nuidei. Na vosa o vakayagataka e rawa ni vakaraitaka ni o nuidei ena ka o tukuna. Levu na gauna ni bera ni cavuta o Jisu e dua na itukutuku bibi, e dau kaya mada: “E dina, e dina, au sa kaya vei iko.” (Joni 3:3, 5, 11; 5:19, 24, 25) E kilai tale ga na nuidei i Paula ena nona dau cavuta e so na vosa vaka oqo: “Ni’u sa kila vakaidina,” “Au sa kila, ka sa vakadinadinataka vei au na Turaga ko Jisu,” kei na “au sa vosa dina, au sa sega ni lasu.” (Roma 8:38; 14:14; 1 Tim. 2:7) Me baleta na vakayacori ni nona vosa ni yalayala, e dau uqeti ira nona parofita o Jiova mera cavuta e so na vosa vaka oqo, “ena yaco vakaidina.” (Apak. 2:3) E rawa ni vaka tale ga oqo na vosa o vakayagataka ni o vakamacalataka na parofisai oqo. Ia, ena vakatau oqo ena nomu nuitaki Jiova o sega ni nuitaki iko ga, o qai veidokai ni o vosa, ena kilai tale ga kina ni qaqaco vinaka tu na nomu vakabauta.

E rawa ni kilai tale ga nomu nuidei ena gu ni nomu vakamacala kei na dei ni yalomu ni o vosa. Ena kilai ena kemu irairai, irairai ni matamu, kei na nomu ivukivuki. Kevaka mada ga o dau mamadua se o galugalu, ena laurai ga vei iko na nuidei ke o vakabauta dina na ka o tukuna tiko, o kila tale ga ni dodonu me tukuni yani.

E macala ni vosa e tau ena nuidei e dodonu me vu sara ga mai lomada. Ke ra siqema na rogoci keda ni sega ni vu dina mai lomada na ka eda tukuna, era na sega ni galeleti keda. O koya gona, me vu ga mai lomamu na ka o tukuna. Ke ra lewe levu era rogoci iko, me rogolevu cake na domomu, me kaukaua tale toka ga. Ia me nomu inaki mo talaucaka sara ga na lomamu, mo tukuna na ka sara ga o vakabauta.

iVukevuke Mo Vosa Kina ena Nuidei. Ke tarai iko na ka o na tukuna, sa na qai rawa ni o vosa ena nuidei, o koya gona e bibi na vakavakarau vinaka. Ena sega ni vinaka sara ke o kauta ga mai e so na tikina ena noda ivola o qai mai cavuqaqataka vei ira na vakarorogo. Dodonu mo kila vinaka na tikina o na vosa kina, mo qai biuta ena nomu vosa ga ni o vakamacalataka. Mo vakabauta dina na ka o tukuna, mo kila tale ga ni na yaga vei ira na vakarorogo. Kena ibalebale oqo ni gauna o vakarautaka tiko kina na ka mo tukuna, o na vakasamataka vata kei na kedra ituvaki na vakarorogo, vaka kina na ka era sa kila tu kei na ka era nanuma me baleta na ulutaga o na vosa kina.

E rawarawa ni kilai nida vosa ena nuidei ke taladrodro noda ivakamacala. O koya gona, kua ni vakarautaka wale ga na ka o na tukuna, vakarautaka tale ga na kena itukutukuni. Vakarautaka vinaka sara na veitikina bibi kece ena nomu vunau mo kua kina ni lai raica tale tiko nomu tikidua ni o vakamacalataka. Nanuma tale ga mo masuti Jiova me vakalougatataka nomu sasaga. Na veivuke ni Kalou ena vakavuna mo “doudou” me rawa kina ni o vosa ena nuidei ni o kila ni dina qai bibi na nomu itukutuku.—1 Ces. 2:2.