iTalatala ni iTukutuku Vinaka

E VAKARAUTAKA o Jiova na ivakaraitaki uasivi meda vakatotomuria—na Luvena o Jisu Karisito. (1 Pita 2:21) Ni dua e mai tisaipeli i Jisu, sa italatala ni Kalou me vunautaka na itukutuku vinaka. E vakaraitaka o Jisu ni veivakacegui na itavi qo, e kaya: “Ni lako mai vei au o kemuni kece oni oca, oni bikai voli ena icolacola bibi, au na vakacegui kemuni. Ni mai cola na noqu ivua moni vuli vei au, niu yalomalumalumu, au yalomalua tale ga, oni na kunea kina na vakacegu.” (Maciu 11:28, 29) E dau dina tu ga na vosa ni yalayala qo vei koya e rogoca!

² Ni iTalatala Uasivi ni Kalou o Jisu, e sureta eso mera nona imuri. (Maciu 9:9; Joni 1:43) E vakavulici ira ena cakacaka vakaitalatala qai talai ira mera cakava tale ga na cakacaka e cakava tiko. (Maciu 10:1–11:1; 20:28; Luke 4:43) E muri, e qai tala e lewe 70 tale mera kacivaka na itukutuku vinaka ni Matanitu ni Kalou. (Luke 10:1, 8-11) Ni talai ira nona tisaipeli o Jisu mera vunau, e kaya: “O koya e rogoci kemuni e rogoci au. O koya e beci kemuni e beci au. Ia o koya e beci au, e beci koya tale ga e talai au mai.” (Luke 10:16) Ena sala qo, a vakabibitaka o Jisu na itavi e solia vei ratou na nona tisaipeli. Eratou matataki Jisu kei na Kalou Cecere Duadua! Era okati tale ga kina o ira kece era rogoca na veisureti i Jisu: “Mo muri au.” (Luke 18:22; 2 Kor. 2:17) O ira kece era rogoca na veisureti qo era sa ciqoma na ilesilesi ni Kalou mera vunautaka na itukutuku vinaka ni nona Matanitu, mera veivakatisaipelitaki tale ga.—Maciu 24:14; 28:19, 20.

³ Eda vakalougatataki nida rogoca na veisureti i Jisu meda muri koya, eda mai ‘kila’ kina na Kalou o Jiova kei Jisu Karisito. (Joni 17:3, vmr.) Eda vakavulici ena sala i Jiova. Ena nona veitokoni, eda veisautaka kina noda rai, noda bula, kei na noda itovo me salavata kei na nona ivakatagedegede savasava. (Roma 12:1, 2; Efeso 4:22-24; Kolo. 3:9, 10) Ena levu ni noda vakavinavinaka eda yalataka kina noda bula vei Jiova, da qai vakaraitaka e matanalevu ena noda papitaiso ena wai. Nida papitaiso, eda sa lesi meda italatala.

⁴ Meda nanuma tiko ni dodonu meda qarava na Kalou ena liga e sega ni cala kei na lomada savasava. (Same 24:3, 4; Aisea 52:11; 2 Kor. 6:14–7:1) E savasava noda lewaeloma nida vakabauti Jisu Karisito. (Iper. 10:19-23, 35, 36; Vkta. 7:9, 10, 14) E uqeti keda na lotu vaKarisito na yapositolo o Paula meda cakava na ka kece ga me vakalagilagi kina na Kalou, meda kua ni veivakatarabetaki. E vakaraitaka tale ga na yapositolo o Pita na bibi ni itovo vinaka nira na taleitaka kina na dina na sega ni vakabauta. (1 Kor. 10:31, 33; 1 Pita 3:1) O na vukea vakacava e dua me italatala ni itukutuku vinaka?

DAUTUKUTUKU VOU

⁵ Ni o tekivu vuli iVolatabu kei na dua e tataleitaki, uqeti koya me dau wasea na ka e vulica. E rawa ni vakamacala vei ira na wekana, nona itokani, ira e valenicakacaka, kei na so tale. Qo e dua na ikalawa bibi ni nodra vukei na ka vou mera imuri i Jisu Karisito nira italatala ni itukutuku vinaka. (Maciu 9:9; Luke 6:40) Ni toso tiko vakayalo qai matau ena vunau tawalokuci, lakolako sa na vinakata me vakaitavi ena cakacaka vakaitalatala.

RAWATA NA KENA IVAKATAGEDEGEDE

⁶ Ni bera ni o sureta e dua me vunau e veivale ena imatai ni gauna, mo vakadeitaka ni sa rawata na kena ivakatagedegede. Ni dua e tomani keda ena cakacaka vakavunau, e vakaraitaka e matanalevu ni dua na iVakadinadina i Jiova. Kena ibalebale ni sa veisautaka nona bula me salavata kei na ivakatagedegede savasava i Jiova, sa rawa tale ga ni dautukutuku bera ni papitaiso.

⁷ Ni o vakavulica e dua ena ivakavuvuli vakaivolatabu, de dua o sa na kilai koya vinaka. O rawa ni raica ni sa bulataka tiko na veika e vulica. Ia e tiko eso na ka me baleti koya e ratou na vinakata na qase mo dou veivosakitaka vata kei koya.

⁸ Ena lesia na kodineita ni ilawalawa qase e rua na qase ni ivavakoso (e dua me lewe ni komiti ni cakacaka) mo dou veivosaki kei na nomu vuli iVolatabu. Ke lailai na qase ni ivavakoso, de dua ena cakava qo e dua na qase kei na dauveiqaravi ni ivavakoso matua. Na tacida erau digitaki me rau kua ni lokuyara. Ke rau kila na ka e vinakata o gonevuli ena soqoni, de dua dou na veivosaki kei nomu vuli iVolatabu ni suka na soqoni. E dodonu me gauna marautaki. Ni bera ni vakadonui o gonevuli me dautukutuku bera ni papitaiso, qo na ka me laurai vua:

1. (1) E vakabauta ni Vosa ni Kalou na iVolatabu.—2 Tim. 3:16.

2. (2) E kila qai vakabauta na yavu ni ivakavuvuli vakaivolatabu me rawa ni yavutaka kina nona dau sauma na taro e tarogi vua, e sega ni sauma ena nona vakasama ga se na ivakavuvuli lasu vakalotu.—Maciu 7:21-23; 2 Tim. 2:15.

3. (3) Sa muria tiko na ivakaro ni iVolatabu me dau veimaliwai kei ira na tamata i Jiova ena soqoni vakaivavakoso ke rawa ni tiko kina.—Same 122:1; Iper. 10:24, 25.

4. (4) E kila na ka e kaya na iVolatabu me baleta na veiyacovi tawadodonu, wili kina na veibutakoci, dua me levu tu na watina, veiyacovi vakatagane se vakayalewa, qai salavata nona bula kei na ivakavuvuli qori. Ke yalewa qai tiko vata kei na dua na tagane se tagane qai tiko kei na yalewa e sega ni wekana, e dodonu me rau vakamau.—Maciu 19:9; 1 Kor. 6:9, 10; 1 Tim. 3:2, 12; Iper. 13:4.

5. (5) E muria na ka e vakatabuya na iVolatabu, me vaka na mateni, na vakatavako, mariwana, betel nut, wili kina na wainimate gaga e veivakabobulataki eso era buli, vakavo ga na wainimate e vakadonui vakavuniwai.—2 Kor. 7:1; Efeso 5:18; 1 Pita 4:3, 4.

6. (6) E kila ni bibi me kua ni vakailala ca.—1 Kor. 15:33.

7. (7) Sa vakacegu mai na isoqosoqo kece ni lotu lasu a lewena tu. Sa sega tale ga ni soqoni vata kei ira, se tokoni ira.—2 Kor. 6:14-18; Vkta. 18:4.

8. (8) Sa galala mai na veika kece vakapolitiki ni vuravura qo.—Joni 6:15; 15:19; Jeme. 1:27.

9. (9) E vakabauta, e bulataka na ka e kaya na Aisea 2:4 me baleta na ka era vakayacora na veimatanitu.

10. (10) E vinakata sara ga me iVakadinadina i Jiova. —Same 110:3.

⁹ Ke rau sega ni vakadeitaka na qase nona nanuma o koya e vakatarogi ena dua vei ira na tikina qo, me rau tarogi koya ni rau vakayagataka na tikinivolatabu e lavetaki me yavutaki kina nodrau ivakamacala. E bibi me kila tiko ni dua e tomani keda na iVakadinadina i Jiova ena cakacaka vakavunau e dodonu me salavata nona bula kei na ivakatagedegede vakaivolatabu qo. Na nona ivakamacala ena qai matata vei rau na qase ke sa kila tiko na ka e vinakati vua, sa rawata tale ga na ivakatagedegede me tekivu vakaitavi ena cakacaka vakaitalatala.

¹⁰ Me rau tukuna totolo vua na qase ke sa vakadonui me dautukutuku. Ena so na ituvaki, e rawa ni caka qori ni oti ga na veitarotarogi. Ke sa rawata o koya na ivakatagedegede e vinakati, me rau vakavinavinakataki koya na qase ni sa dua na dautukutuku. (Roma 15:7) Me uqeti me tekivu vakaitavi sara ena cakacaka vakavunau, me solia nona ripote ni cava na vula. Me rau vakamacalataka na qase ni gauna e solia kina na imatai ni nona ripote, ena vakaleweni e dua nona Kad ni Dautukutuku ni iVavakoso, qai maroroi ena ivolatukutuku ni ivavakoso. Eratou na taura na qase na kena itukutuku me qaravi kina na cakacaka e okati me baleta na iVakadinadina i Jiova e veiyasa i vuravura, me vakaitavi tale ga ena noda cakacaka, me uqeti tale ga vakayalo. Kena ikuri, me ratou tukuna vua na qase ni itukutuku kece me baleti ira ena dau dikevi me salavata kei na iDusidusi ni iVakadinadina i Jiova me Baleta na Maroroi ni iTukutuku e tiko ena jw.org.

¹¹ Ni kauaitaki na dautukutuku vou kei na ka e rawata ena tarai koya sara ga. Ena uqeti koya me gumatua ni qaravi Jiova, me solia tale ga e veivula nona ripote ni cakacaka vakavunau.—Fpai. 2:4; Iper. 13:2.

¹² Ni rau sa vakadeitaka na qase ni sa rawa ni vakaitavi ena cakacaka vakavunau na vuli iVolatabu, sa rawa ni dua nona ivola na iSoqosoqo e Cakava na Loma i Jiova. Ni solia na imatai ni nona ripote, ena kacivaki sara ena ivavakoso ni sa dua na dautukutuku bera ni papitaiso.

NODRA VUKEI NA GONE

¹³ E rawa tale ga nira dautukutuku na gone. O Jisu e ciqomi ira qai vakalougatataki ira na gone era lako yani vua. (Maciu 19:13-15; 21:15, 16) E nodra itavi na itubutubu mera tuberi luvedra, ia e rawa nira veitokoni eso ena ivavakoso mera vukei ira na gone e vu mai lomadra nodra vunautaka na itukutuku vinaka ni Matanitu ni Kalou. Ke o itubutubu, nomu ivakaraitaki vinaka ena cakacaka vakaitalatala ena uqeti luvemu me gumatua ni qarava na Kalou. Ke vinaka nona itovo e dua na gone qai uqeti na lomana me wasea nona vakabauta, na veivuke cava tale e rawa ni caka vua?

¹⁴ Ena veiganiti vua na itubutubu me raica e dua vei ratou na Komiti ni Cakacaka ni iVavakoso, me kilai kina se sa rawata o luvena na ivakatagedegede me dautukutuku. Ena tuvanaka na kodineita ni ilawalawa qase me rua na qase (me dua e lewe ni komiti ni cakacaka ni ivavakoso) me veivosaki kei na gone kei na dua vei rau na itubutubu (se o rau ruarua). Ke sa kila toka o gone na yavu ni ivakavuvuli vakaivolatabu qai laurai ni vinakata me vakaitavi ena cakacaka vakavunau, e vakaraitaka qori ni sa toso tiko. Ni veivosakitaki oti na ka kece qo, dikevi tale ga eso na tikina e dau veivosakitaki kei ira na uabula, e rawa ni rau vakadeitaka na qase ke sa rawa ni dautukutuku se sega. (Luke 6:45; Roma 10:10) Ni caka tiko qori, me kua ni veivosakitaki na ka e sega ni ganiti ira na gone.

¹⁵ Me rau vakavinavinakataki gone na qase ni ivavakoso ena toso sa cakava, me rau uqeti koya tale ga me nona isausau me papitaiso. Me rau vakavinavinakataki tale ga na itubutubu, ena nodrau gumatua ni tugana na ka dina vei luvedrau. Me rau vakamacalataka na qase na ulutaga “Vei Kemuni na iTubutubu Lotu vaKarisito,” ena tabana e 179-181 me yaga ena nodrau veituberi.

YALAYALA KEI NA PAPITAISO

¹⁶ Ke o sa kilai Jiova, o lomani koya ni o muria na ivakatagedegede vakaivolatabu, o vakaitavi tale ga ena cakacaka vakaitalatala, e dodonu mo vaqaqacotaka na nomu veiwekani kei koya. Ena sala cava? Nomu yalataki iko vua qai papitaiso ena wai.—Maciu 28:19, 20.

¹⁷ Na yalayala e tiko kina na vakasama ni kena biu vakatikitiki e dua na ka me vakayagataki ena inaki tabu. Eda yalataki keda vua na Kalou ena masu da qai yalataka vua nida na vakayagataka noda bula meda qaravi koya, meda muria tale ga na nona sala. Eda na qaravi koya vakatabakidua me tawamudu. (Vkru. 5:9) Qo o na cakava taudua sara ga. Sega tale ni dua ena cakava vei iko.

¹⁸ Ia o na sega ni tukuna wale ga vei Jiova ni o via solia vua nomu bula. Dodonu me laurai ni o sa yalataki iko vua na Kalou. O na vakayacora qo ena nomu papitaiso ena wai, me vaka ga a vakayacora o Jisu. (1 Pita 2:21; 3:21) Ke o sa vakatulewataka mo qaravi Jiova, o via papitaiso, na cava mo cakava? Dodonu mo vakaraitaka nomu vakatulewa vua na kodineita ni ilawalawa qase. Ena lesia o koya e vica na qase mo dou veivosaki me vakadeitaki kina ke o sa rawata na kena ivakatagedegede mo papitaiso. Ena ikuri ni ivakamacala, qai railesuva na ulutaga “Vei Kemuni na Dautukutuku Bera ni Papitaiso” ena tabana e 182-184 ni ivola qo, kei na “Taro Vei Ira na Via Papitaiso” ena tabana e 185-207.

RIPOTE NI CAKACAKA VAKAITALATALA

¹⁹ E veiyabaki, e dau vakayaloqaqataki keda na ripote ni cakacaka e vauca na tubu ni sokalou savasava e vuravura raraba. Tekivu mai na gauna e tukuna kina vei ratou nona tisaipeli o Jisu Karisito ni na vunautaki na itukutuku vinaka ina veiyasa i vuravura, era dau vaqaqa na lotu vaKarisito dina se na vakayacori vakacava qo.—Maciu 28:19, 20; Mari. 13:10; Caka. 1:8.

²⁰ Era dau marautaka na imuri taumada i Jisu na ripote ni kena vuavuaivinaka na cakacaka vakavunau. (Mari. 6:30) E tukuni ena ivola na Cakacaka nira tiko e rauta ni le 120 ena gauna e sovaraki kina na yalo tabu vei ira na tisaipeli ena Penitiko 33 G.V. Sega ni bera ni tubu na kedra iwiliwili na tisaipeli me 3,000, oti ya e tubu sara me 5,000. E tukuni ni “vakatubura tiko ga o Jiova e veisiga na kedra iwiliwili na vakabulai,” era “mai vakabauta tale ga e levu sara na bete.” (Caka. 1:15; 2:5-11, 41, 47; 4:4; 6:7) Sa na bau vakayaloqaqataki ira sara ga na tisaipeli na itukutuku ni tubu ni cakacaka! E rairai vakaukauataki ira na itukutuku se ripote qo mera gumatua tiko ga ena cakacaka e lesia vei ira na Kalou, ia era sotava na veivakacacani mosimosi era bukana na iliuliu ni lotu vakaJiu!

²¹ Rauta na yabaki 60-61 G.V., e vola o Paula vei ira mai Kolosa ni “sa tete qai vuavuaivinaka tiko ga e vuravura taucoko” na itukutuku vinaka, sa vunautaki tale ga “vei ira na kabuli kece e ruku i lomalagi.” (Kolo. 1:5, 6, 23) Era talairawarawa ena Vosa ni Kalou na lotu vaKarisito taumada, e vakaukauataki ira tale ga na yalo tabu mera vakacavara na cakacaka vakaitamera ni vunau ena gauna oya ni bera ni cava na ivakarau vakaJiu ena 70 G.V. E vakayaloqaqataki ira sara ga na lotu vaKarisito yalodina ena gauna ya na veika sa rawati!

²² E vinakata tale ga na isoqosoqo i Jiova nikua me ripotetaka noda cakacaka, me vakayacori kina na Maciu 24:14 ni kaya: “Ena vunautaki mada na itukutuku vinaka qo ni Matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.” Nida yalataki keda vua na Kalou, e tiko na itavi bibi meda qarava. E dodonu me gu na lomada meda vakacavara vinaka na cakacaka vakaitalatala ni bera na icavacava. Ena raica o Jiova me vakacavari sara na cakacaka qo. Ke da vakaitavi kina, ena vakadonui keda o koya.—Isik. 3:18-21.

NOMU RIPOTE NI CAKACAKA VAKAVUNAU

²³ Na cava meda ripotetaka? E vakarautaka na isoqosoqo na Ripote ni Cakacaka Vakavunau meda vakalewena. Ia ena yaga vakalevu eso na ivakamacala qo.

²⁴ Ena vanua e volai kina “iVola e Soli (iVola tabaki/Kena e vakau ena iyaya vakalivaliva),” mo vakalewena na levu ni ivola tabaki se kena o vakaraitaka ena iyaya vakalivaliva vei ira era sega ni iVakadinadina. Ena vanua e volai kina na “Vidio e Vakaraitaki,” vakalewena na levu ni gauna o vakaraitaka kina noda vidio.

²⁵ Ni o vakalewena na “Veisikovi Lesu,” mo vola na levu ni veisiko o vakabulabulataka kina na nona tataleitaki e dua e sega ni iVakadinadina. E sega ni wiliki wale ga me veisikovi lesu na nomu lesuvi koya e tataleitaki ena nona vale, o na wilika tale ga nomu veisikovi lesu ke o volavola, o qiri, vakauitukutuku ena talevoni se kompiuta, se o kauta e dua na ivola. Na gauna kece o vakavulica kina e dua na vuli iVolatabu, o na wilika me nomu veisikovi lesu. Ke dua na gone e tiko e se bera ni papitaiso, ena wilika na itubutubu me nona veisikovi lesu na gauna kece e liutaka kina na sokalou vakavuvale.

²⁶ Kena ivakarau me vuli e veimacawa o koya e vuli iVolatabu, ia ena wiliki me dua na vuli iVolatabu ni cava na vula. Me vakaleweni na kena isoqoni kece ena dua na vula. Mera ripotetaki tale ga na vuli iVolatabu era se bera ni yalataki ira mera papitaiso. Rawa ni wiliki tale ga mera vuli iVolatabu o ira sa sega tu ni dautukutuku ena veidusimaki ni komiti ni cakacaka, se o ira na papitaiso vou era sega ni vakaotia na ivola Marau me Tawamudu!

²⁷ E bibi mo vakalewena vakadodonu na iwiliwili ni “Aua.” Qo na levu ni gauna o vakayagataka ena nomu cakacaka vakavunau e veivale, nomu veisikovi lesu, nomu veivakavulici ena iVolatabu, se nomu vunau tawalokuci vei ira o sotava era sega ni iVakadinadina yalayala papitaiso. Ke rau cakacaka vata e rua na dautukutuku me rau dui wilika nodrau aua, ia ena dua ga vei rau ena wilika na veisikovi lesu se vuli iVolatabu. Ni rau vakaitavi ruarua na itubutubu ena Sokalou Vakavuvale, rau na yadua na aua. Mera wilika na tacida tagane na gauna era vakaitavi kina ena ivunau soqovi levu. O ira na vakadewa ena ivunau soqovi levu mera wilika tale ga na nodra gauna. Ia ena sega ni wili na gauna eda vakayagataka nida vakavakarau ena cakacaka vakavunau, noda tiko ena soqoni ni cakacaka vakavunau, kei na so tale.

²⁸ Me muria na dautukutuku na nona lewaeloma e vakavulici ena iVolatabu ni vakatulewataka na gauna me vunau kina. Eso era vunau ena vanua era levu kina na lewenivanua, eso era cakacaka ena yalava era lewe lailai ga qai vinakati vakalevu na veitosoyaki. E duidui na yalava; e duidui tale ga na nodra raica na dautukutuku na cakacaka vakavunau. E sega ni usuraka nona rai na iLawalawa Dauvakatulewa ina ivavakoso e veiyasa i vuravura me baleta na kena wiliki na gauna ni cakacaka vakavunau, se digitaki e dua me vakatulewa ena tikina qo.—Maciu 6:1; 7:1; 1 Tim. 1:5.

²⁹ Me volatukutukutaki na aua e rawata e dua ena cakacaka vakavunau, me kua ni wilika na kena caca. Vakavo ga o ira na dautukutuku era sa qase sara, era sega ni biuta rawa na nodra vale, se dua e tiko ena valenimalumalumu, se lailai na ka e rawata ena vuku ni tauvimate. O ira na dautukutuku qo sa rawa nira ripotetaka ga e 15 na miniti. Ke vakayagataka mada ga e 15 na miniti ena dua na vula me vunau kina, e dodonu me ripotetaka. Ena okati tiko ga me dautukutuku wasoma ni Matanitu ni Kalou. Era okati tale ga ena ituvatuva qo na dautukutuku e sega ni cakava rawa e dua na ka ena vula ya ni dredre nona veitosoyaki ena vuku ni tauvimate bibi se mavoa. Me nanumi tiko ni ituvatuva qo e baleti ira ga e vakaiyalayala na ka era cakava. Na komiti ni cakacaka ni ivavakoso ena lewa se o cei e ganita na ituvatuva qo.

KAD NI DAUTUKUTUKU NI IVAVAKOSO

³⁰ Na nomu ripote ni cakacaka vakavunau e veivula e dau vakaleweni ena Kad ni Dautukutuku ni iVavakoso. Na kad qo ena maroroya na ivavakoso. Ni o vakarau toki ina dua tale na ivavakoso, vakaraitaka vei ratou na qase. Na vunivola ena raica me vakau ena nomu ivavakoso vou na nomu Kad ni Dautukutuku ni iVavakoso. Qo ena rawa kina vei ratou na qase ena nomu ivavakoso vou me ratou kilai iko qai veivuke vakayalo. Ke sega ni sivia na tolu na vula nomu biuta vakalekaleka nomu ivavakoso, yalovinaka vakauta tiko ga e veivula na nomu ripote ina nomu ivavakoso.

VUNA EDA RIPOTETAKA KINA NODA CAKACAKA VAKAVUNAU

³¹ O dau guilecava ena so na gauna mo biuta nomu ripote? Eda dau guiguileca kece, e bibi me tataunaki tiko vei keda na ka. Ia ke donu noda rai me baleta na bibi ni noda ripote, eda na sega ni guilecava meda ripotetaka noda cakacaka.

³² Era dau taroga eso: “E kila vinaka tu o Jiova na ka au cakava ena nona cakacaka, na cava tale meu biuta kina e dua na ripote ena ivavakoso?” E kila dina o Jiova na ka eda cakava, e kila tale ga se da cakava tiko ena noda vinaka taucoko se da cakava ga me rawa. Ia nanuma tiko ni a volatukutukutaka o Jiova na iwiliwili ni siga a tiko kina o Noa ena loma ni waqa kei na iwiliwili ni yabaki era lako voli kina ena vanua talasiga na Isireli. A volatukutukutaka na kedra iwiliwili era yalodina, kei ira na talaidredre. A volatukutukutaka tale ga na ravuti veitaravi ni vanua o Kenani kei na ka era rawata na turaganilewa yalodina e Isireli. Io, e vola e levu sara na itukutuku me baleti ira na nona tamata. Era uqeti vakalou na dauvolavola mera vola na veika kece qo me matata vei keda nona rai me baleta na bibi ni volavola vakadodonu.

³³ Eda vakadinadinataka ena veika e volatukutukutaki ena iVolatabu nira volai vakamatata qai donu na ka era vola na tamata i Jiova. Levu na gauna ena uqeti keda na ka eda wilika nida raica na iwiliwili ni ka e volatukutukutaki. Dikeva mada e vica na kena ivakaraitaki: Vakatekivu 46:27; Lako Yani 12:37; Dauveilewai 7:7; 2 Tui 19:35; 2 Veigauna 14:9-13; Joni 6:10; 21:11; Cakacaka 2:41; 19:19.

³⁴ E macala ni ripote qo e sega ni tukuna kece na ka eda cakava ena noda qaravi Jiova, ia e yaga vakalevu ena nona isoqosoqo. Ena imatai ni senitiuri ni ratou lesu mai na vunau na yapositolo, ratou tukuna vei Jisu “na ka kece eratou cakava kei na nodratou veivakavulici.” (Mari. 6:30) So na gauna ena rawa ni kilai mai na ripote na ka me vakavinakataki ena cakacaka vakaitalatala. Ena rawa ni kilai mai na fika na tubu ni cakacaka ni dautukutuku, ena rawa tale ga ni kilai ke malumu nona veiqaravi. De dua ena vinakati me vakayaloqaqataki, se me wali na leqa. O ira na ivakatawa nuitaki era na kauaitaka na ripote yadua ra qai vakavinakataka na ituvaki e rawa ni vakaleqa na toso ni dua na dautukutuku, se toso ni ivavakoso.

³⁵ E yaga tale ga ina isoqosoqo na noda ripote me kilai kina na yalava e vinakati vakalevu kina na veivuke. Kena ivakaraitaki, na yalava cava e vuavuaivinaka? Na yalava cava e sega ni vuavuaivinaka? Na ivola cava ena vukei ira na lewenivanua mera kila na ka dina? Ena kilai tale ga ena ripote na ivola e vinakati ena veivanua e vuravura, kei na kena raici me vakarautaki tiko ga.

³⁶ E dau veiuqeti na ripote. Vakacava eda dau marautaka nodra gugumatua na tacida ena vunautaki ni itukutuku vinaka e veiyasa i vuravura? Eda rawa ni kila na tubu ni isoqosoqo i Jiova nida raica na ripote. E vakayaloqaqataki keda na kedra italanoa, e gu kina na lomada meda vakaitavi ena cakacaka vakavunau ena kena levu eda rawata. (Caka. 15:3) E bibi meda solia e veivula na noda ripote, e vakaraitaka nida kauaitaki ira kece na tacida. E vakaraitaka tale ga nida vakamalumalumu ina ituvatuva ni isoqosoqo i Jiova.—Luke 16:10; Iper. 13:17.

TEKIA NOMU ISAUSAU

³⁷ E sega ni dodonu meda vakatauvatana kei na dua tale noda cakacaka vakavunau. (Kala. 5:26; 6:4) E duidui na keda ituvaki. Ia ena yaga ke da tekia na noda isausau, meda kila kina na toso eda sa rawata ena cakacaka vakaitalatala. Eda na lomavakacegu nida sauva na isausau qori.

³⁸ E matata vakasigalevu ni vakatotolotaka tiko o Jiova nodra kumuni na yalodina mera taqomaki ena gauna ni “veivakararawataki levu.” Eda donuya na gauna e vakayacori kina na parofisai i Aisea ena nona kaya: “O koya e lailai sara ena yaco me le duanaudolu, kei koya e lailai me matanitu qaqa. O yau o Jiova, au na vakatotolotaka ena kena gauna.” (Vkta. 7:9, 14; Aisea 60:22) E ka dokai dina meda italatala ni itukutuku vinaka ena gauna vakairogorogo qo!—Maciu 24:14.