O sa tu Vakarau ke Vinakati mo Qaravi Totolo Vakavuniwai?

Eda sega ni kila na gauna e rawa ni yaco vakasauri kina e dua na ituvaki ena vinakati kina vakatotolo na veiqaravi vakavuniwai. (Jeme. 4:14) O koya e yalomatua ena vakarautaki koya rawa ena kena vinaka duadua. (Vkai. 22:3) O sa vakatulewataka oti qai vola na veiqaravi vakavuniwai o na vakadonuya me caka vei iko? E yaga vakalevu ena tikina qori na DVD Transfusion-Alternative Health Care​—Meeting Patient Needs and Rights, na ikarua ni iyaloyalo ena DVD Transfusion-Alternatives​—Documentary Series. Saga mo sauma na taro qo ni o sarava tiko na vidio. Moni lewa matau na itubutubu ni oni sarava kei luvemuni na vidio qori, ni na vakaraitaki vakalekaleka kina na veisele.

(1) Na cava era sa dikeva tale tiko kina eso na vuniwai kei ira na kenadau ni tabana ni bula na vakayagataki ni dra? (2) Tukuna e tolu na ivakaraitaki ni veisele vereverea e sega ni vakayagataki kina na dra. (3) Na cava era tu vakarau kina e vica na udolu na vuniwai kei ira na dauveisele e veiyasa i vuravura mera kua ni vakayagataka na dra nira veisele? (4) Na cava e kune ena so na vakadidike e caka ena vica na valenibula me baleta na vakayagataki ni dra? (5) Na cava eso na leqa e yaco ena veiqaravi vakavuniwai e vakayagataki kina na dra? (6) Na cava era sa vakadeitaka e levu na kenadau me baleta na yaga ni veiqaravi e sega ni soli kina na dra? (7) Na cava e dau vakavuna na lailai ni dra (anemia)? Na cava e rawa ni caka me vakalevutaki tale kina na dra? (8) Na cava e rawa ni caka me bulia vakalevu kina na yago na red-cell? (9) Na iwalewale cava soti era dau vakayagataka na vuniwai me kua ni levu kina na dra e vakayali ena gauna ni veisele? (10) Ena yaga tale beka ga vei ira na gone, ira na tauvimate bibi, kei ira na mavoa vakaca na veiqaravi vakavuniwai e sega ni vakayagataki kina na dra? (11) Na cava e bibi duadua ena veiqaravi vakavuniwai e vinaka?

E levu na veiqaravi e vakamacalataki ena vidio qo e sega ni vakayacori ena noda vanua, e bibi kina mo vakadeitaka mo yalodina tiko ga ni o veivosaki kei ira na vuniwai ena veiqaravi vakavuniwai era rawa ni cakava.. Wilika tale na wase 7 ni ivola “Loloma ni Kalou” kei na ikuri naba va mo vakatulewa kina vakayalomatua. Ke o papitaiso, vakadeitaka mo vakalewena na nomu Advance Medical Directive card qai kauta tiko ena veigauna kece. Me vakaleweni e veiyabaki e dua na card vou, qai rawa ni vakaleweni e vica na card ke gadrevi. Vakadeitaka mo tukuna vakatotolo vei ratou na qase ni ivavakoso ni o sa vakarau lako i valenibula me rawa ni ratou vukei iko.

[Tikina bibi ena tabana e 3]

Ni rawa ni yaco vakasauri na leqa, o dau kauta tiko e dua nomu Advance Medical Directive card sa vakaleweni vinaka tu?