Kilai Rawarawa

NI O vakamacala, kua ni o sa vosa tu ga. Saga mera kila na vakarorogo na ka o tukuna. E bibi oqo ke o vinakata me yaga nomu ivakamacala vei ira na lewe ni ivavakoso, se nomu veivosaki kei na dua e sega ni iVakadinadina i Jiova.

E levu na ka e dodonu meda cakava ke da vinakata me na kilai na ka eda tukuna. So na ka e vinakati oqo sa vakamacalataki ena Lesoni 26 ena ulutaga, “Tuvana Vinaka Nomu iVakamacala.” So tale era vakamacalataki ena Lesoni 30 ena ulutaga, “Dau Veikauaitaki.” Eda na dikeva e vica tale na kena ikuri ena lesoni oqo.

Vakayagataka ga na Vosa Rawarawa, me Rawarawa Tale ga na Kena iTukutukuni. E matata na veivosaki ni vakayagataki ga na vosa e rawarawa kei na iyatuvosa leleka. E ivakaraitaki vei keda o Jisu ena nona vunau mai na ulunivanua, ni vakayagataka na vosa era kila na tamata kece ga—veitalia na nodra ivakatagedegede ni bula se vanua era cavutu mai kina. E vou beka vei ira na ka e vakamacalataka. Ia, era taura rawa na ka e tukuna ni a vakamacalataka na ka era kauaitaka kece: sala e rawati kina na marau, sala e rawa ni vakavinakataki kina na veimaliwai, iwali ni nuiqawaqawa, kei na ka me caka me vakainaki kina na bula. E vakayagataka tale ga na vosa e kilai levu. (Maciu wase 5-7) E macala ni so na iyatuvosa ena iVolatabu e lekaleka, so e balavu, duidui tale ga na kedra ivolavolai. Me nomu inaki ga me matata nomu ivakamacala, me rawarawa na tauri ni kena ibalebale.

Ni o vakamacalataka mada ga e so na ka dredre, ena rawarawa ga ni tauri na kena ibalebale ke rawarawa na kena itukutukuni. Ia, na cava mo cakava? Kua ni matailalai tale na ka o vakamacalataka ke sega ni gadrevi. Tuvana vinaka nomu ivakamacala me votu tiko ga mai kina na veitikina o vakabibitaka. Digitaka vinaka na tikinivolatabu mera na uto ni nomu ivakamacala. Kua ni o wilika oti ga e dua na tikinivolatabu o sa dewa ina dua tale, vakamacalataka vakavinaka mada. Ni o vakamacalataka e dua na tikina bibi, kua ni sivia na ka o tukuna de o vakabuawataka tale.

Nanuma tiko na ivakavuvuli kece oqo ni o vakavulici koya nomu vuli iVolatabu. Kua ni vocia vakavudi na ka kece. Vukei nomu gonevuli me kila vinaka na uto ni ka e vulici. Toso na gauna sa na qai kila na veika matailalai tale e so ena nona vuli vakataki koya kei na nona tiko ena soqoni.

Ena vinakati na vakavakarau vinaka ke o vinakata me rawarawa nomu vakamacalataka e dua na ka. E dodonu me matata mada vei iko na ka o na vakamacalataka ke o vinakata me lai matata vei ira na rogoci iko. Ena rawa ga ni o vakamacalataka na vuna e yaco kina e dua na ka se kena yavu ke o kila vinaka. Ena rawa tale ga ni o vakamacalataka ena nomu vosa ga.

Vakamacalataka na Vosa Dredre. Nomu vinakata me kilai na ka o tukuna ena so na gauna ena okati kina nomu vakamacalataka na ibalebale ni vosa e so ena vou vei ira na vakarorogo. Kua ni nanuma nira sa kila kece ga na ka na vakarorogo, ena yasana adua, kua ni beci ira. Ena vuku ni nomu vulica na iVolatabu, o na vakayagataka beka ena so na gauna e so na vosa ena vou vei ira e so. Era na sega ni kila o ira era sega ni dau veimaliwai kei keda na vosa me vaka na “kena vo,” “dauveiqaravi yalo dina ka vuku,” ‘so tani tale na sipi,’ kei “nai soqosoqo levu,” ke sega ni vakamacalataki vei ira. (Roma 11:5; Maciu 24:45, VV; Joni 10:16; Vkta. 7:9) Na tamata tale ga e sega ni kilai keda ena rawa ni lecava na ibalebale ni vosa me vaka na “dautukutuku,” “painia,” “ivakatawa ni tabacakacaka,” kei na “iVakananumi.”

E so mada ga na vosa vakaivolatabu era vakayagataka vakalevu o ira era sega ni iVakadinadina i Jiova ena gadrevi me vakamacalataki. Vei ira e levu, na “Amaketoni” e vakaibalebaletaki ina ivalu vakaniukilia. Era na nanuma beka ni “Matanitu ni Kalou” e tiko ga e lomada, e sega ni dua dina na matanitu me na veiliutaki mai lomalagi. Ni cavuti na “yalo,” era nanuma ni oqo e dua na tiki ni tamata e bula tiko ga ni mate na yago. E dua tale ga na iwiliwili levu era tuberi mera vakabauta ni “yalo tabu” e dua na ka bula, e tiki ni Letoluvakalou. Ni levu nikua era sa lecava na ivakatagedegede savasava vakaivolatabu, de dua e dodonu me vakamacalataki vei ira na ka e vakaibalebaletaka na iVolatabu ni kaya: “Ni kakua ni dau veibutakoci.”—1 Kor. 6:18, VV.

O ira na sega ni kila vinaka na iVolatabu e rawa ni sega ni matata vei ira na ka o vakaibalebaletaka ke o tukuna, “e kaya o Paula . . . ” se “kaya o Luke . . . ” Era tu beka na nodra itokani se veikilai era vakatokai ena yaca oqori. Ena gadrevi beka mo kuriva e so na kena ivakamacala me matata kina se o tukuni koya tiko e dua na yapositolo lotu Vakarisito se dua na dauvola iVolatabu.

Levu tale ga nikua ena gadrevi me vakamatatataki vei ira na tikinivolatabu e so e vakamacalataka na ivakarau ni wiliwili se itovo vakavanua ni gauna makawa. Me kena ivakaraitaki, ena sega ni vakaibalebale na kena tukuni ni waqa i Noa e 300 na kiupiti na kena balavu, 50 na kiupiti na kena raba, qai 30 na kiupiti na kena cere. (Vkte. 6:15) Ia, ni o vakatauvatana na levu ni waqa i Noa kei na levu ni dua na ka era na kila vinaka na vakarorogo, era na taura rawa sara ga na ka o tukuna.

Vakamacalataka. Me rawa ni matata e dua na ka vei ira na rogoci iko, ena sega beka ni veirauti nomu vakamacalataka ga na ibalebale dina ni dua na vosa dredre. Ni wiliki oti na Lawa mai Jerusalemi, ena gauna i Esera, e dau qai tarava yani na kena ivakamacala. Me kasa vei ira na lewevuqa na kena ibalebale, era sa dau qai vakamatatataka na Livai na ka e wiliki, ra vakaraitaka tale ga na kena ivakavakayagataki ena ituvaki e sotavi tiko ena gauna oya. (Niem. 8:8, 12) Me vaka tale ga oqo na nomu vakamacalataka na ibalebale ni tikinivolatabu o wilika kei na kena ivakavakayagataki.

Ena gauna e mate kina o Jisu qai vakaturi, a vakamacalataka vei ira nona tisaipeli ni ka e yaco oya a sa tukuna tu na iVolatabu. E qai vakaraitaka vei iratou na nodratou itavi ni ratou a raica sara ga na veika oya. (Luke 24:44-48) Era na kila na rogoci iko na ibalebale dina ni ka o tukuna ke o sa vukei ira mera kila ni ka era vulica e dodonu mera bulataka sara.

Okati Kina na Lomadra. E tiko tale e so na ka e rawa ni vakavuna me sega ni vakabauti na nomu ivakamacala, veitalia mada ga ke sa matata. Ena sega ni taura rawa e dua na ka o vakamacalataka ke sega ga ni malele kina na lomana. (Maciu 13:13-15) Vei ira e vakayago tu ga nodra rai, e ka vakalialia vei ira na ka vakayalo. (1 Kor. 2:14) Ke dua e laurai vua na yalo vaka oqo, e vinaka cake ga mo muduka nomudrau veivosaki—de rawa ni qai vakarorogo ena dua tale na gauna.

Ia, so na gauna era sega ni malele ina noda itukutuku e so ena vuku ni veika dredre era sotava ena nodra bula. E rawa nira ciqoma o ira oqo na itukutuku vinaka ke soli vei ira na gauna. Ni tukuna vei iratou nona tisaipeli o Jisu ni na kanakuitataki, ena vakamatei, eratou a sega ni via vakabauta. Baleta na cava? Eratou a sega ni namaka, eratou sega tale ga ni vinakata! (Luke 18:31-34) Ia, toso na gauna eratou sa qai vakabauta e 11 na nona yapositolo, ratou ciqoma tale ga, vakadinadinataki oqo ena nodratou muria vinaka na ka a vakavulici iratou kina o Jisu.

Yaga ni iVakaraitaki Vinaka. Na ka era kila na tani e sega ni vakatau wale ga ena noda vosa, e vakatau tale ga ena ka eda cakava. Levu era kaya me baleta na imatai ni nodra curuma na Kingdom Hall ni tarai ira ga vakalevu na loloma era vakila, sega soti na ka era rogoca. Na noda yalomamarau tale ga e sa vakavuna mera via rogoca e levu na itaukeinivale na ka dina mai na iVolatabu. Nodra raica e so noda veilomani na iVakadinadina i Jiova kei na noda dau veiraici ena gauna ni leqa era kaya kina ni o keda ga eda lewena na lotu dina. Ni o saga gona mo vukei ira na tani mera kila na iVolatabu, kua ni guilecava ni bibi na kena itukutukuni kei na nomu ivakaraitaki.