Vakayagataka na Tikidua me Vakatetei Kina na iTukutuku Vinaka
1. Era vakayagataka vakacava na tamata ni Kalou na tikidua?
1 Era sa vakayagataka tu mai ena dua na gauna balavu na tikidua vakaivolatabu na tamata i Jiova mera vakatetea kina na itukutuku vinaka. Ena 1880, a vakarautaka o C. T. Russell kei ratou na nona itokani na Bible Students’ Tracts, qai soli vei ira era dau wilika na Watch Tower mera veisoliyaka vei ira na lewenivanua. Dua na ka na kena talei ena gauna ya na tikidua, ni rejisitataka gona o C. T. Russell ena 1884 e dua na isoqosoqo vakalawa e sega ni rawatubu me vakatetei kina na itukutuku ni Matanitu ni Kalou, a biu sara mada ga na vosa “tract” ena yaca ni isoqosoqo, oya na Zion’s Watch Tower Tract Society, gauna qo sa kilai me Watch Tower Bible and Tract Society of Pennsylvania. Ena 1918, e sivia e 300 na milioni na tikidua era veisoliyaka na Gonevuli ni iVolatabu. Se laulau tiko ga nikua ena cakacaka vakavunau na vakayagataki ni tikidua.
2. Na cava e laulau kina na vakayagataki ni tikidua?
2 Vuna e Laulau Kina: Era duiroka na tikidua qai rairai vinaka. Na kena ivakamacala leleka e vakavure vakasama qai yaga. O ira na itaukeinivale era dau rairai leqataka na taura na mekesini se ivola era na taleitaka na tikidua. E sega ni dredre na kena veisoliyaki, e rawa mada ga nira solia na dautukutuku vou kei na gonelalai. Kena ikuri, era ka lalai toka ga na tikidua qai rawarawa noda kauta wavoki.
3. Tukuna e dua na ka o sotava se dua na irogo e tabaki ena noda ivola me baleta na yaga ni tikidua.
3 E levu era mai vulica na ka dina ena ka era wilika ena tikidua. Kena ivakaraitaki, e dua na marama mai Haiti a raica e gaunisala e dua na tikidua. A tomika sara, wilika, qai kailavaka “au sa kunea na ka dina!” A qai lako ina Vale ni Soqoni na marama ya, tekivu vulica na iVolatabu, qai papitaiso. A yaco kece qori ena kaukaua ni Vosa ni Kalou a laurai ena tikidua.
4. Na cava me noda isausau ni tuvanaki me soli na tikidua ena dua na vula?
4 Vunau e Veivale: Ni dau laulau na kena vakayagataki na tikidua ena vunau, ena so na gauna sa na okati ena ivola me soli ena dua na vula, ena tekivu sara ga qori ena Noveba. E sega ni noda isausau wale ga meda soli tikidua, ia meda vakayagataka sara ga me tekivu kina na veivosaki. Ke dua e tataleitaki ena imatai ni gauna eda sota kina se nida sikovi koya lesu, eda rawa ni vakaraitaka vua na kena vulici na iVolatabu ena noda vakayagataka na ivola Kaya na iVolatabu, se dua tale na ivola e dau caka kina na vuli. Eda na veisoliyaka vakacava na tikidua e veivale? E duidui na tikidua, meda kila vinaka gona na tikidua eda solia.
5. Eda na solia vakacava e veivale na tikidua?
5 Na noda ivakamacala kei na tikidua eda vakayagataka me ganita na yalava. Eda rawa ni tekivuna na veivosaki nida solia vei taukeinivale na tikidua. Ena rairai taleitaka o koya na rairai vinaka ni waqana e liu. Se da rawa ni vakaraitaka vua e vica na tikidua, me qai digia na kena e taleitaka. Nida cakacaka ena yalava e dau dredre mera dolava na taukeinivale na nodra katuba, eda rawa ni vakaraitaka vei taukeinivale na tikidua me raica na waqana e liu, se da rawa ni kerea meda vakacuruma ena ruku ni nona katuba e dua na ka eda via kila kina se cava na nona nanuma. Ke ulutaga ni tikidua e dua na taro, eda rawa ni kerea me tukuna na nona nanuma. Se da rawa ni bulia ga e dua na taro ena rawa ni uqeti koya qai vakarawarawataka nomudrau veitalanoa. Meda wilika sara vei taukeinivale eso na ka e tukuni ena tikidua, eda rawa ni cegu ena dua na taro e volai toka kina da qai kerea me tukuna o taukeinivale na nona nanuma. Eda rawa ni wilika vua na tikinivolatabu e tokona na vakasama e veivosakitaki tiko ena tikidua ya. Nida sa veivosakitaka oti eso na tikina ena tikidua, sa rawa ni tini e kea na noda ivakamacala da qai vakadeitaka na gauna meda lesuvi koya kina. Ke dau kena ivakarau ena ivavakoso me biu na ivola ena vale e lala, eda rawa ni biuta na tikidua ena dua na vanua e sega ni laurai levu ke sega ni dua e tiko e vale.
6. E rawa ni veisoliyaki vakacava ena vunau e salatu na tikidua?
6 Vunau e Salatu: O sa bau vakayagataka na tikidua ena nomu vunau e salatu? Eso eda veisivi e gaunisala era dau vakusakusa ena vanua era lako kina ra qai sega ni via vosa vei keda. Ena rairai dredre na noda kila era tataleitaki dina se sega. Meda kua ni totolo sara ni solia na mekesini vou nida sega ni kila tu mada ga era na wilika se sega, de vinaka meda solia na tikidua. Ni rairai vinaka na waqana e liu qai leleka na kena ivakamacala, era na via wilika sara ga na tamata ena nodra gauna galala. Ia ke ra sega ni vakatotolo, eda rawa ni vakamacalataka eso na ka e volai ena tikidua.
7. Tukuna na irogo e vakaraitaka na sala eda rawa ni solia kina na tikidua nida vunau tawalokuci.
7 Vunau Tawalokuci: E rawarawa sara na vunau tawalokuci nida vakayagataka na tikidua. E dau tawana eso na tikidua ena nona taga e dua na tacida tagane ena gauna kece e biubiu kina mai na nona vale. Ni sotava e dua, itaukeinisitoa beka, ena tukuna ga ni via solia vua e dua na ka me wilika qai solia sara na tikidua. Ni rau lako e dua na veiwatini me rau lai sarasara ina siti o Niu Yoka, rau kila ni rau na sotava e levu mai na veimatanitu. Erau mani kauta na ivola na Good News for People of All Nations kei na vica na tikidua ena duidui vosa. Ena gauna erau rogoca kina e dua e vosataka tiko e dua tale na vosa, e volivolitaki tiko e batinisala se dabe tikivi rau ena dua na vanua ni gade se valenikana, erau na solia vua na tikidua ena nona vosanisucu.
8. Sala cava e vaka kina na sorenikau na tikidua?
8 ‘Kaburaka na Nomu Sorenikau’: Na tikidua e vaka na sorenikau. Ena kaburaka ga vakalevu na sorenikau na dauteitei ni sega ni kila na sorenikau cava ena kadre qai tubu. E kaya na Dauvunau 11:6: “E na mataka mo kaburaka na nomu sila [“sorenikau,” NW], ia e na yakavi me kakua ni cegu na ligamu: ni ko sa sega ni kila se cava vei rau ena yaco, se na ka oqo se na ka ko ya, se na vinaka vakatautauvata ruarua.” Koya gona meda ‘kaburaka tiko ga na vuku’ ena noda vakayagataka na ivukevuke yaga qo ena cakacaka vakavunau.—Vkai. 15:7.
[Tikina bibi ena tabana 3]
Ni dau laulau na kena vakayagataki na tikidua ena vunau, ena so na gauna sa na okati me ivola me soli ena dua na vula, ena tekivu sara ga qori ena Noveba