“Lomani Ira na Mataveitacini Kece”
Na vosa uqeti vakalou ena ulutaga qo a volai rauta ni ruanaudolu na yabaki sa oti. (1 Pita 2:17) Sa qai bibi ga nikua meda muria na kena ivakavuvuli! Ia eda na lomani ira vakacava na mataveitacini kece nira tu ena veiyasa i vuravura ra qai lewe levu? Ena vuravura e sega kina na veilomani, eda na vakadeitaka vakacava ni na sega ni seavu na noda loloma? (Maciu 24:12) Raica mada ke o rawa ni sauma na taro qo ni o sarava na vidio Our Whole Association of Brothers.
(1) Gauna cava eda mai lewena kina na mataveitacini e vuravura raraba? (2) Na tolu na cakacaka cava eda qarava vata kei ira na tacida mai na veiyasa i vuravura? (3) Era vakaraitaka vakacava na tacida na nodra gugumatua mera lai vunau (a) ena yalava ribayawa kei Alaska, (b) ena ikelekele ni waqa lelevu mai Urope, kei na (c) veikauloa e Peru? (4) Na cava me kua ni raici kina vakamamada na noda cakacaka vakavunau? (5) Tukuna na ivakaraitaki ni nodra dau veivakacegui kei na nodra veivukei na iVakadinadina i Jiova (a) ni oti na uneune, (b) cagilaba, kei na (c) nodra veivaluvaluti na lewenivanua? (6) Sala cava eda rawa ni vakaraitaka kece kina na ivakatakilakila eda kilai tani kina na lotu vaKarisito? (Joni 13:35) (7) E yaga vakacava na noda cakacaka vata ena kena tara na noda Vale ni Soqoni? (8) Ena gauna a vakatabui kina na noda cakacaka ena tokalau kei Urope vaka kina e Rusia, na cava era cakava na tacida mera kaukaua tiko ga kina vakayalo? (9) Na sasaga vakasakiti cava era cakava e levu na iVakadinadina me rawa nira tiko ena soqo ni tikina, na vuna? (10) E uqeti iko vakacava na vidio qo mo vakadeitaka kina (a) mo dau tiko ena soqoni mo duavata kina kei ira na tacimu vakayalo ena sokalou vei Jiova, (b) vukei ira na so tale ena gauna era gadreva kina na veivuke, (c) mo vunau ena yalodina ena gauna kei na sala veiganiti kece? (11) Gauna kei na sala cava eda rawa ni vakayagataka kina na vidio qo ena noda cakacaka vakaitalatala?
Na vuna levu eda lewena kina na mataveitacini e vuravura raraba nida lomani Jiova. Eda taleitaka meda vulica na veika me baleti koya da qai vakavulici ira na so tale mera kilai koya. Eda lomani ira tale ga na tamata e lomana o Jiova. Nida vukei ira ena gauna era gadreva kina na veivuke, eda sega ni namaka me vakavinavinakataki keda o Jiova. Eda vakavinavinakataka ga na Kalou baleta eda okata na noda veitacini vaKarisito me nona iloloma talei vei keda. Meda veilomani tiko mada ga vakamataveitacini ni sa voleka sara ni vakarusai na vuravura qo e sega kina na veilomani!