Vakayagataki Donu na Tikinivolatabu

NA NODA veivakavulici e sega ni okati wale ga kina na wili tikinivolatabu. E vola na yapositolo o Paula vua na nona itokani o Timoci: “Gumatua sara mo vakaraitaki iko mo vinaka e na mata ni Kalou, a tamata daucakacaka sa sega e dua na ka me madua kina, mo wasea vakadodonu nai vakavuvuli dina.” (Neitou na matanivola kala.)—2 Tim. 2:15.

Eda na vakayacora oqo ena noda qarauna me kua ni veisaqasaqa kei na ivakavuvuli taucoko ni iVolatabu na noda vakamacalataka e dua na tikinivolatabu. Kena ibalebale nida na sega ni taura e dua na tikinivolatabu da qai vakayagataka me tokona ga na noda ile, ia eda na raica me salavata na noda ivakamacala kei na vo ni iVolatabu. A veivakaroti o Jiova ena gusu i Jeremaia mera qarauni na parofita era kaya voli nira gusunivosa i Jiova, ia era “cavuta na raivotu wale e vu mai na lomadra ga.” (Jere. 23:16) A vakaroti ira tale ga na lotu Vakarisito o Paula mera kua ni wakia vata na Vosa ni Kalou kei na ivakavuvuli vakatamata ena nona vola: “Keitou sa biuta na veika vuni e veivakamaduataki, a sa sega ni daulawaki na neitoui valavala, se keitou vakatanitaka na vosa ni Kalou.” Ena gauna oya, era dau vakawaicalataka na daunibisinisi veidabui na waini era volitaka mera rawa ilavo kina. Ia o keda, eda sega ni vakawaicalataka se wakia vata na Vosa ni Kalou kei na ivakavuvuli vakatamata. “Keitou sa sega ni dauvakatanitaka na vosa ni Kalou, me vakataki ira na lewe vuqa,” e kaya o Paula, “ia keitou sa vakataki ira era sa dina sara, me vaka sa mai vua na Kalou, e na mata ni Kalou, keitou sa vosa e na yaca i Karisito.”—2 Kor. 2:17; 4:2.

Tiko na gauna o na wiligusutaka beka kina e dua na tikinivolatabu mo vakabibitaka e dua na ivakavuvuli. Na iVolatabu li e sinai tu ena ivakavuvuli mera dusimaki keda ena veibasoga ni noda bula. (2 Tim. 3:16, 17) Ia, e dodonu mo vakadeitaka ni sa donu na nomu vakayagataka e dua na tikinivolatabu, o sega ni vakayagataka cala, o sega ni moica me rawa ga kina na nomu inaki. (Same 91:11, 12; Maciu 4:5, 6) Nomu vakamacalataka e dua na tikinivolatabu e dodonu me salavata kei na inaki i Jiova, me salavata tale ga kei na vo ni Vosa ni Kalou.

Noda “wasea vakadodonu nai vakavuvuli dina” e okati kina na noda kila na vuna e volai kina e dua na tikinivolatabu. E sega ni dodonu meda vakayagataka na iVolatabu me ivakarawa ni ka. Era a wiligusutaka na iVolatabu na ivakavuvuli vakalotu era tusaqati Jisu, ia era sega ni via kauaitaka na ka e bibi cake—na lewadodonu, yalololoma, kei na yalodina—na ka e vinakata na Kalou. (Maciu 22:23, 24; 23:23, 24) Ni vakavulica tiko na Vosa ni Kalou o Jisu, a ucui Tamana sara ga vakavinaka. Na nona kauaitaka na ka dina e lako vata kei na nona lomani ira na dau rogoca na nona ivakavuvuli. Dodonu meda saga meda muria na nona ivakaraitaki.—Maciu 11:28.

Eda na kila vakacava nida sa vakayagataka tiko vakadodonu e dua na tikinivolatabu? Ena vukei keda na noda dau wilivolatabu wasoma. E dodonu meda doka tale ga na “dauveiqaravi yalo dina ka vuku”—na ilawalawa lotu Vakarisito lumuti e lesia o Jiova me vakarautaka na kakana vakayalo vei ira na nona tamata yalodina kece. (Maciu 24:45, VV) Noda vuli vakataki keda kei na noda dau tiko da qai vakaitavi ena soqoni vakaivavakoso eda na vakila kina na veituberi e vakarautaka na dauveiqaravi yalodina ka vuku.

Ke o wilika rawa na Reasoning From the Scriptures, tovolea sara mo vakayagataka vakavinaka, o na kila kina na ivakamacala dodonu ni vicanadrau na tikinivolatabu e dau vakayagataki ena noda cakacaka vakaitalatala. Ke o via vakayagataka e dua na tikinivolatabu o sega ni kila vinaka, na yalomalumalumu ena uqeti iko mo vulica vinaka na veika e baleta na tikinivolatabu oqori, mo rawa kina ni wasea vakadodonu na ivakavuvuli dina ena gauna o vakamacalataka kina.—Vkai. 11:2.

Me Matata na Kena iVakamacala. Ni o veivakavulici, raica me matata vakasigalevu vei ira na vakarorogo na veisemati ni ka o vosa tiko kina kei na veitikinivolatabu o vakayagataka. Ke o taroga e liu e dua na taro ni bera ni o wilika na tikinivolatabu, e dodonu mera raica na vakarorogo se sauma vakacava na taro o taroga na tikinivolatabu. Ke o vakayagataka e dua na tikinivolatabu me tokona nomu ile, me raica sara ga o koya o vakavulica se tokona vakacava na ile oqori na tikinivolatabu.

Na wiliki wale ga ni iVolatabu e sega ni veirauti—veitalia mada ga ke o vakabibitaka donu na vosa mai na tikinivolatabu. Nanuma tiko ni levu era sega ni kila vinaka tu na iVolatabu, e rawa gona ni sega ni matata vei ira na ka o vakabibitaka ena gauna o wilika kina. Tovolea mo vakamuai ira ina vosa se matavosa ena tikinivolatabu o via vakabibitaka.

Oqo e okati kina vakalevu na nomu vakatakila sara ga na vosa o via vakabibitaka, na vosa e baleta vakatabakidua na tikina o vakamacalataka tiko. Na kena iwalewale rawarawa duadua na nomu cavuta tale na vosa o via vakabibitaka. Ke drau veivosaki tiko ga kei na dua, o rawa ni taroga e so na taro me raica kina vakataki koya na ka o via vakabibitaka. E so era vakayagataka na vosa e tautauvata na kedra ibalebale se ra tokaruataka na vakasama era via vakabibitaka, ke ra vosa vei ira e lewe levu. Ke o via vakayacora oqo, qarauna me matata tiko ga vei ira na vakarorogo na veisemati ni ka o vakamacalataka tiko kei na vosa bibi mai na tikinivolatabu o vakayagataka.

Na imatai ni kalawa na nomu vakatakilakilataka na vosa bibi ena dua na tikinivolatabu. Ia, sega ni o koya ga oya. Sa matata beka mai na nomu ivakamacala ni bera ni o wilika na tikinivolatabu na vuna o wilika kina? Me matata vei ira na vakarorogo se veisemati vakacava na nomu ivakamacala kei na tikina bibi mai na tikinivolatabu o wilika. Ke o sega ni vakamatatataka oqo ni bera ni o wilika na tikinivolatabu, vakamatatataka ni o sa wilika oti.

Era a tarogi Jisu na Farisi ena dua na taro era nanuma ni na dredre dina me sauma: “Sa tara vua na tagane me biuta na watina e na vuku ni ka kecega, se segai?” E qai yavutaka o Jisu na nona isaunitaro ena Vakatekivu 2:24. Dikeva ni a vakabibitaka o koya e dua ga na iwase ni tikinivolatabu oqo, oti sa qai vakamua ina taro e tarogi mai. Ni sa vakamatatataka rawa ni o tagane kei watina erau “lewe dua ga,” sa qai kaya o Jisu: “Na ka sa vauca vata na Kalou, me kakua ni tawasea rua na tamata.”—Maciu 19:3-6.

Me vakacava na levu ni ka o tukuna ni o via vakamacalataka vakamatata na ibalebale ni dua na tikinivolatabu? Ena vakatau—o cei soti e rogoci iko, e vakacava tale ga na bibi ni ka o vakamacalataka. Saga ga me rawarawa, me matata na ka o tukuna.

Me Momona Nomu Vakamacalataka na Tikinivolatabu. E macala mai na Cakacaka 17:2, 3 (VV) me baleta na cakacaka vakaitalatala i Paula mai Cesalonaika, ni a momona sara na nona ‘vakamacalataka na iVolatabu.’ Oqo e dua na ka e dodonu meda saga kece na dauveiqaravi i Jiova. Kena ivakaraitaki, a talanoataka o Paula e so na ka e baleta na bula i Jisu kei na nona cakacaka vakaitalatala, qai vakaraitaka ni veika oqo a sa tukuni oti tu ena iVolatabu Vakaiperiu, oti sa qai tinia ena nona kaya: “Ko Jisu ka’u kaya tiko oqo vei kemuni, sa i koya sara ga na Karisito!”

Ena ivola i Paula vei ira na Iperiu, e tokaruataka kina o Paula e levu na ka sa volai oti tu ena iVolatabu Vakaiperiu. Ni via vakabibitaka se vakamatatataka e dua na tikina, e dau digia e dua na vosa se matavosa, qai vakamacalataka na kena ibalebale. (Iper. 12:26, 27) E laurai ena Iperiu wase 3 na veika e lavetaka o Paula mai na Same 95:7-11. Dikeva ni a qai vakarabailevutaka e tolu na tikina: (1) na yaloda se lomada (Iper. 3:8-12), (2) na ibalebale ni vosa “na siga oqo” se “na siga edaidai” (Iper. 3:7, 13-15; 4:6-11), kei (3) na ibalebale ni matavosa: “Ni ra na sega sara ni curu ki na noqui vakavakacegu” (Iper. 3:11, 18, 19; 4:1-11). Tovolea mo muria na ivakaraitaki oqo ni o vakamacalataka e dua na tikinivolatabu.

Vakasamataka mada na laulau ni vosa i Jisu ena momona ni nona ivakamacala me vaka e volai ena Luke 10:25-37. A taroga e dua na tagane e kila vinaka na Lawa: “Vakavuvuli, a cava me’u kitaka me’u rawata kina na bula tawa mudu?” Ni bera ni sauma o Jisu na nona taro, a sureti koya mada me vakaraitaka na nona nanuma, oti sa qai vakaraitaka o Jisu na bibi ni kena muri na ka e kaya na Vosa ni Kalou. Ni siqema o Jisu ni se sega ni taura na tagane oqo na ka e vakaibalebaletaka, sa qai taura na gauna me sereka kina e dua bulu na vosa mai na tikinivolatabu—“na kai nomu.” E sega tale ga ni vakamacalataka ga o Jisu, ia e qai vakayagataka e dua na vosa vakatautauvata me qai lialiaci ga vakataki koya na tagane oqo.

E macala ni gauna e dau tarogi kina o Jisu, e sega ni dau sauma ga na taro ena nona wiligusutaka na tikinivolatabu. E dau vakalewa vinaka na ka e kaya na tikinivolatabu, oti sa qai vakamua me sauma kina na vakatataro.

Nira veibataka na Setoki na ka e baleta na veivakaturi, e qai vakabibitaka o Jisu e dua wale ga na tikina mai na Lako Yani 3:6. Ia, e sega ni wiligusutaka wale ga na tikinivolatabu mai cegu yani. E qai biuta e dua na kena ivakamacala momona me vakamatatataka kina ni veivakaturi e dua tale ga na inaki ni Kalou.—Mari. 12:24-27.

Nida vinakata meda qasenivuli maqosa, e dodonu meda saga me momona na noda ivakamacala, me laulau tale ga.