Vakamatatataki na Kena Yaga

SE O vosa tiko vua e dua se o vosa vei ira e lewe levu, na nomu taleitaka na ka o tukuna e sega ni kena ibalebale nira sa na lai taleitaka tale ga na vakarorogo. E bibi na nomu itukutuku, ia ke o sega ni vakamatatataka na kena yaga, sega ni dede sa na sega ni kauaitaki na ka o tukuna.

E rawa ni yaco tale ga oqo ena Kingdom Hall. De dua era na vakatudaliga na vakarorogo ni o cavuta e dua na vosa vakatautauvata se tukuna e dua na itukutuku era se sega ni bau rogoca. Ia, ke o sega ni tara cake nomu ivakamacala mai na veika o tukuna oqo, vakalailai ga sa na sega ni galeleti na ka o tukuna. O koya gona, e dodonu mo vukei ira mera raica na vuna kei na sala e yaga kina vei ira na ka o tukuna.

E uqeti keda na iVolatabu meda vakasamataka na veika e yaga, se veika e yavutaki ena “vuku dina.” (Vkai. 3:21) A vakayagataki Joni na Dauveipapitaiso o Jiova me dusimaki ira ena nona gauna “ki na nodra vuku era yalododonu,” oqo e vakaibalebaletaki ina veika e yaga. (Luke 1:17) Na vuku oqo e yavutaki ena nona rerevaki dina o Jiova. (Same 111:10) O ira era taura rawa na ibalebale ni vuku oqo era na tamata yaco ena nodra bula ena gauna oqo, vakauasivi ena bula dina, na bula tawamudu sa voleka.—1 Tim. 4:8; 6:19.

Me Yaga na Nomu Vunau. Ke o vinakata me yaga na nomu vunau, kua ni nanuma wale ga na ka mo na tukuna, nanumi ira tale ga na vakarorogo. Kua ni nanumi ira me vaka beka era dua ga na ilawalawa levu. Nanuma tiko ni ilawalawa levu oqori era cavutu mai na dui vuvale, so era lako yadudua sara ga mai. Era na wili beka kina na lalai, ira na itabagone, ira na uabula, kei na so era sa qase sara. Era na maliwai ira tale beka ga na tataleitaki se o ira era se tekivu qaravi Jiova ni o se bera mada ga ni sucu. So beka era sa matua sara vakayalo; so se kabiti ira voli beka ga e so na itovo se ivalavala vakavuravura. Tarogi iko: ‘Ena yaga vakacava vei ira na vakarorogo na ka au vakarautaka? Na cava meu cakava mera taura rawa kina na ka au via vakabibitaka?’ De dua o lewa mo sa na vakamua vakatabakidua na nomu ivakamacala ina rua ga na matailawalawa eda sa veivosakitaka mai. Ia, kua ga ni guilecavi ira sara vakadua na kena vo.

Vakacava ke o lesi mo vakamacalataka e dua na ivakavuvuli mai na iVolatabu? Mo cakava vakacava me yaga kina vei ira era sa vakabauta oti tu na ivakavuvuli o na vakamacalataka? Saga mo vaqaqacotaka tale na nodra vakabauta. O na cakava vakacava? Ena nomu vakadeuca na veitikinivolatabu e tokona na ivakavuvuli oqori. Rawa tale ga ni o vukei ira mera vakamareqeta cake. O na vakayacora ena nomu vakaraitaka na kena salavata kei na vo ni ivakavuvuli dina mai na iVolatabu kei na itovo i Jiova. Tukuna e so na ivakaraitaki—se dua na italanoa dina—me vakaraitaka ni yaga sara na kilai ni ivakavuvuli oqo ena nona bula e dua, e sa cakayaco tale ga ena nona raica na veigauna se bera mai.

Kua ni waraka me voleka sara ni oti nomu vunau mo qai vakamua vei ira na vakarorogo na nomu ivakamacala. E dodonu mera vakila yadua na vakarorogo ena gauna ga o tekivu kina ni nomu vosa e baleti ira. Ni vakacagau nomu ivakamacala, mo qai tomana yarayara nomu raica me yaga vei ira yadua na ka o tukuna, me lai yacova sara na kena itinitini.

Ni o saga mo vakamua vei ira na vakarorogo na nomu ivakamacala, tovolea mo vakaraitaka na itovo vinaka vakaivolatabu oqo, na yalololoma kei na veikauaitaki. (1 Pita 3:8; 1 Joni 4:8) Ni saga tiko mada ga na yapositolo o Paula me walia na leqa levu a basika e Cesalonaika, a vakadeitaka me na kauta cake mai na veika era ivakaraitaki vinaka kina vakayalo na tacina lotu Vakarisito e kea. E vakaraitaka tale ga nona nuidei nira na via cakava na ka e dodonu ni vosa oti vei ira. (1 Ces. 4:1-12) Sa ivakaraitaki vinaka dina vei keda!

E inaki beka ni nomu vunau mo vakauqeti ira na tacimu mera vakaitavi ena vunautaki ni Vosa ni Kalou kei na kena vakavulici? Ke vaka kina, saga mo vakauqeti ira na vakarorogo mera taleitaka na cakacaka oqo, me tara na lomadra, mera vakila na kena bibi. Ia ni o cakava oqo, nanuma ni duidui na ka eda rawata me vaka e vakaraitaka tale ga na iVolatabu. (Maciu 13:23) Kua ni vakayalolailaitaki ira na mataveitacini. E uqeti keda na Iperiu 10:24 meda “veivakatakatai me dauloloma kai valavala vinaka.” Ke ra uqeti na vakarorogo mera dauloloma, sega ni sega sa na laurai nira yavutaka na ka era cakava ena inaki vinaka. Kua ni vakasaurarataka e dua me cakava na ka e sega ni rawata, nanuma tiko ni vinakata o Jiova me yavutaki noda ‘talairawarawa ena ka eda vakabauta.’ (Roma 16:26) O koya gona, e bibi meda vaqaqacotaka ga na noda vakabauta, kei na nodra vakabauta na tacida.

Saga Mera Taura na Kena iBalebale. Ni o vakamacala, kua ni guilecava mo vakamatatataka na yaga ni itukutuku vinaka. Mo na cakava oqo, e dodonu mo kauaitaka na ka e tiko ena nodra vakasama na tamata ena nomu yalava. O na cakava vakacava oqo? Rogoca na itukutuku ena walesi se retioyaloyalo. Raica na ulutaga levu e dau tabaki ena niusiveva e veisiga. Saga mera tukuna mai na lomadra o ira oni na veivosaki, vakatudaliga nira vosa. De dua o na raica nira sotava sara tu ga na leqa—ra sa sega ni cakacaka, ia e tu na rede mera sauma, tauvimate beka e dua, mate e dua na wekadra, ra vakaleqai ena basulawa, ra sotava na ka ca ena ligadra na vakailesilesi vakamatanitu, kavoro nodra bula vakawati, ra sega ni lewai rawa na luvedra, kei na levu tale. Ena vakacegui ira beka na iVolatabu? Me qai sega?

O na rairai nanuma tiko e dua na ulutaga ni o se qai tekivuna e dua na veivosaki. Ia, ke vakaraitaka o koya drau veivosaki ni dua na ka e leqataka tiko, veivosakitaka sara ga na leqa oqori, ke o nanuma ni vinaka mo lai vakarautaka vinaka mai, tukuna ni o na qai lesuvi koya tale. Eda sega ni vinakata meda lai ‘siova na ka e sega ni baleti keda,’ ia eda na tu vakarau meda wasea e so na ivakasala momona vakaivolatabu. (2 Ces. 3:11) Ena uqeti ira vakalevu duadua na rogoci iko na ivakasala vakaivolatabu e tara na nodra dui bula.

Ke ra vakila na vakarorogo ni sega ni yaga vei ira na ka eda tukuna, e rawa nira tagutuva sara ga na veivosaki. Ke ra mani vakalaiva mada ga meda vosa, ena sega ga ni tarai ira sara na ka eda tukuna. Ena yasana adua, ke vakamatatataki na kena yaga, ena rawa ni vakavuna sara ga mera tekivu lialiaci, ra veisautaka sara na nodra bula.

Ni o tuberi koya tiko nomu vuli iVolatabu, vakabibitaka tiko ga vua na yaga ni ka e vulica. (Vkai. 4:7) Vukei koya o vakavulica me kasa vua na ivakasala, na ivakavuvuli, kei na ivakaraitaki mai na iVolatabu, me matata kina vua na sala me muria. Vakabibitaka vua na yaga ni nona cakava oqo. (Aisea 48:17, 18) Oqo ena uqeti koya me veisautaka na nona bula me salavata kei na ka e sa vulica. Vakavulici koya me lomani Jiova, me via vakamarautaki koya, me rawa ni qai vu sara ga mai lomana na nona muria na Nona Vosa.