Porokaramu me Vukei Keda Meda Vakavinakataka Tiko ga Noda Vosa kei na Veivakavulici

NA VULI oqo ena vakarautaki iko mo maqosa cake ena nomu dau vakamacala, mo maqosa cake tale ga ena nomu veivakavulici ena Vosa ni Kalou, veitalia o qase se o gone, o tagane se o yalewa.

Na nodra itavi na curu ena Koronivuli ni Vuli Vunau ena lesia na ivakatawa ni koronivuli. E tiko ena tolu na taqaniveva e tarava na lesoni mo cakacaka kina. Na naba era volai ena lesoni yadua era naba sara ga ni lesoni era na qai dikevi veitaravi yani. Sa na qai vakamacalataki ena lesoni yadua na ka e okati ena kena sagai me muri ena noda vosa kei na veivakavulici na veika e vakaturi, kei na vuna e bibi kina me muri. Ena vakarautaki tale ga e so na idusidusi yaga ena sala me muri kina na veika e vakaturi.

Na dui roka ena tutu ni taqana e 79 ina 81 e vakaraitaka na dui ituvaki e rawa ni vakayagataki kina na dui lesoni. Na ituvaki me vaka na (1) wilivola vei ira na vakarorogo, (2) veivosaki ni le rua se sivia, se (3) vosa ina ivavakoso. Na ivakatawa ni koronivuli ena qai lesia na lesoni mo cakacaka kina. E vinaka mo cakacaka ga ena dua na lesoni, oti mo qai toso ina dua tale. Ena yaga tale ga na nomu cakava na vakatovotovo e vakarautaki ena icavacava ni lesoni e lesi vei iko. Ke laurai ni o sa muria na veika e vakaturi ena lesoni e lesi vei iko, ena qai lesia na ivakatawa ni koronivuli e dua tale na lesoni mo cakacaka kina.

Ke dua drau na veivosaki ena nomu itavi, me na dua na nomudrau ituvatuva. E so na ituvatuva sa ra volai toka ena taqana e 82, ia o rawa ni bulia e so tale. E rawa ni vakatura na ivakatawa ni koronivuli na ituvatuva mo cakacaka kina, e rawa tale ga ni laiva mo qai lewa.

Kua ni waraka me soli sara vei iko e dua na lesoni mo qai tekivu, e rawa ni o toso totolo ke o vakawilika sara ga yani na ivola oqo, o qai cakava na vakatovotovo era vakarautaki kina. De dua o rawa ni vulica e dua na lesoni dua na macawa.

Se mani vakacava na dede ni nomu vakaitavi ena koronivuli se cakacaka vakaitalatala, se rawa ga ni o cakava e so tale na ka mo maqosa cake kina. Me yaga mada ga vei iko na nomu curu ena Koronivuli ni Vuli Vunau.