Yaga Vei Ira na Vakarorogo

NA YAGA ni ka o tukuna vei ira na vakarorogo e sega ni vakatau wale ga ena nomu vakamacalataka e dua na ulutaga momona. Tarogi iko mada: ‘Na cava e ganiti ira kina na rogoci au na ulutaga qo? Na cava meu na vakaraitaka vei ira mera vakila kina ni yaga dina vei ira na noqu ivakamacala?’

Ke o lesi ena koronivuli mo vakatovotovotaka na iwalewale ni vunau, o sa na vosa tiko ga vei koya e lesi mo drau veivosaki. Ia, so na gauna o na vosa vei ira kece na lewe ni ivavakoso.

Ka Era sa Kila Tu na Rogoci Iko. Tarogi iko mada se cava era kila na vakarorogo me baleta na ulutaga o na vosa kina? E bibi oqo mo kila kina na ka mo kua ni vakamacalataka. Ke o vosa tiko ena dua na ivavakoso era lewena e levu na lotu Vakarisito matua, kua ni misika tale na veika era sa na kila rawa tu. Tovolea ga mo kuriva ena so tale na itukutuku. Ia, ke ra vakarorogo tiko e so na tataleitaki vou, e dodonu mo raica tale ga na ka e ganiti ira.

Na balavu ni nomu vakamacalataka e dua na ka ena vakatau ena ka era sa kila tu na vakarorogo. Ke o na via tukuna e dua na ka era sa kila tu e levu, kua ni vakamacala kina vakadede. Ia, ke o vakamacalataka e dua na ka e vou vei ira e levu, taura na gauna mo vakamacalataka kina me rawa ni kasa vei ira.

Ka ena Yaga. E sega ni tukuni mo vakamacalataka sara e dua na ka vou me qai yaga na nomu ivakamacala. E so sa ra matau ena vosa era sereka e dua na ivakavuvuli vakaivolatabu kilai levu ena kena itukutukuni rawarawa, e matata sara ga kina vei ira e levu na vakarorogo e so tale na ka me baleta na ivakavuvuli oqo era a sega tu ni taura vakavinaka ena dua na gauna balavu.

Ena cakacaka vakavunau, e sega ni veirauti nomu tukuna e dua na itukutuku butakatakata me yavutaki kina noda ile nida sa bula tu ena iotioti ni veisiga. Vakayagataka na iVolatabu mo vakaraitaka kina na ibalebale ni ka era sa yaco tu nikua. Oqo ena yaga dina vei koya drau veivosaki. Ni o vakamacalataka tale ga e so na ka e baleta noda vuravura, na kau se manumanu, me kua ni nomu inaki mo tukuna wale ga vei itaukeinivale e so na itukutuku matanidavui. Me nomu inaki mada ga mo veidutaitaka na veika e tu yavoliti keda kei na ka e kaya na iVolatabu, me vakaraitaka ni tiko e dua na Dauveibuli e lomani keda. Oqo ena vukei koya na itaukeinivale me liaca e so na ka a sega ni vakasamataka tu.

E rawa tale ga ni cakacaka levu noda saga meda vakamacalataka vei ira na vakarorogo e dua na ka era dau rogoca wasoma. Ia, e dodonu mo maqosa ena tikina oqo ke o vinakata mo qasenivuli vinaka. Na cava mo cakava?

Vakekeli. Kua ni okata ena nomu ivakamacala na ka ga e votu mai nomu vakasama. Vakayagataka e so na iyaya ni vakekeli era vakamacalataki ena taqana e 33 ina 38. Raica vata na veika era vakaturi e kea kei na inaki ni nomu vosa. De dua o na raica ena nomu vakekeli ni dua na ka a yaco ena gauna makawa e ganita vinaka sara ga na ulutaga o na vosa kina. Se o rogoca e dua na itukutuku e salavata sara ga kei na ka o na via vakamacalataka.

Ni o dikeva nomu ulutaga, vakasamataka e so na taro vaka oqo: na cava na vuna? baleta? ni naica? i vei? o cei? kei na sala cava? Kena ivakaraitaki: Au kila vakacava ni dina? Au na vakadinadinataka vakacava? Na vakabauta takalevu cava soti ena vakadredretaka nodra ciqoma e so na ivakavuvuli vakaivolatabu qo? Na cava e bibi kina? Me cakayaco vakacava qo ena nona bula e dua? Rawa ni dua na kena ivakaraitaki me kilai kina na yaga ni kena muri? Cava e vakaraitaka na ivakavuvuli qo me baleta na itovo i Jiova? De dua e rawa mo taroga ke ganita na ka o vakamacalataka tiko: Gauna cava a yaco kina na ka qo? E rawa ni yaga vakacava na kena ivakavuvuli ena gauna qo? E rawa sara mada ga ni bulabula nomu vunau ke o taroga o qai sauma e so na taro vaka oqo ni vakacagau tiko na nomu vakamacala.

De dua o na wilika ena nomu vunau e so na tikinivolatabu sa ra buta vinaka tu kina na vakarorogo. Na cava o rawa ni cakava me yaga kina nomu wilika tale? Kua ni wiliki ira ga; vakamacalataki ira.

E rawa ni yaga nomu vakamacalataka e dua na tikinivolatabu kilai levu ke o wasewasea vakalalai na kena iyatuvosa, o qai vakamacalataka ga na kena iwasewase e baleta sara ga na nomu ulutaga. O rawa ni tovolea oqo ena tikinivolatabu me vaka na Maika 6:8. Na cava na “caka dodonu”? Na caka dodonu i cei e tukuni tiko? O na vakatauvatana kei na cava na ibalebale ni “caka dodonu”? Na cava na ibalebale ni “vinakata na yalololoma”? Na cava na yalomalumalumu? O na moica vakacava na ivakamacala oqo me ganita e dua e sa qase sara? E levu na ka vaka oqo o rawa ni vakasamataka ni o vakavakarau tiko, ia na ka o na qai okata me lewe ni nomu ivakamacala ena vakatau ena nomu ulutaga, nomu inaki, ira na rogoci iko, kei na balavu ni gauna o na vosa kina.

Ena yaga tale ga na vakamacalataki vakarawarawa ni so na vosa. Era kidroa e so nira vulica na ibalebale ni “matanitu” e tukuna na Maciu 6:10. (VV) Na vakamatatataki tale ga ni ibalebale ni so na vosa e rawa ni raica kina e dua e sa lotu Vakarisito dede na ibalebale dina ni dua na tikinivolatabu. E matata oqo nida wilika na 2 Pita 1:5-8 da qai vakamatatataka na ibalebale ni itovo yadua era vakamacalataki kina: na vakabauta, ivalavala vinaka, vuku, ivalavala malua, vosota, daulotu, veilomani vakaveitacini, kei na yalololoma. Nira vakayagataki vata e so na vosa e via tautauvata na kedra ibalebale, o rawa ni vakamatatataka ena nomu tukuna na ka era duidui kina. Dua na kena ivakaraitaki na vosa na vuku, kilaka, yalomatua, kei na lomavuku era kune ena Vosa Vakaibalebale 2:1-6.

E rawa ni yaga mada ga vei ira na vakarorogo na nomu vakadeuca e dua na tikinivolatabu. Levu era na kidroa mera kila ni vuravura e tukuni ena 1 Joni 2:17 ni na lako tani yani e vakaibalebaletaki vei ira era bese ni qarava na Kalou, e sega ni vakaibalebaletaki ina vuravura qele. E tokoni na vakasama oqo ni wiliki na Same 104:5 e tukuni kina ni ‘sa vakataudeitaki na yavu kei vuravura me kua ni yavala rawa, me sega ni mudu.’ Dua na gauna a vakidacalataki ira na Setoki o Jisu ena nona cavuta vei ira na Lako Yani 3:6, na tikinivolatabu era kaya nira vakabauta, qai sema vata kei na veivakaturi.—Luke 20:37, 38.

So na gauna e dau yaga meda dusia na veitikina e yavolita e dua na tikinivolatabu, veika e yaco ena gauna e volai kina, kei na ka e baleti koya e vosa tiko se o koya e tau tiko vua na vosa. Era kila vinaka na Farisi na ika110 ni Same. Ia, e kila ga o Jisu ni yaga me dusia vei ira e dua na tikina bibi e tiko ena imatai ni tikina. E taroga: “A cava dou lewa e na vuku i Karisito? a luve i cei ko koya? Era sa kaya vua, A luve i Tevita. Sa kaya vei ira ko koya, Sa vakaevei ni sa vakatokai koya me Turaga ko Tevita, ni sa vuna na Yalo Tabu, ka kaya, Sa kaya ko Jiova vua na noqu Turaga, Mo tiko e na ligaqu i matau, Me’u kitaki ira mada na nomu meca mei tutu-ni-yavamu? Ia kevaka sa vakatokai koya ko Tevita me Turaga, sa luvena vakaevei?” (Maciu 22:41-45) Nomu sereka vinaka na iVolatabu me vakataki Jisu ena vukei ira e so mera dau qarauna nodra wilika na Vosa ni Kalou.

Ni dua e vakamacala tiko qai tukuna na yabaki a volai kina e dua na ivola ena iVolatabu se gauna a yaco kina e dua ka, e dodonu me vakamacalataka tale ga na ituvaki ena gauna oya. Oqo ena vukei ira na vakarorogo mera taura rawa na bibi ni ivola se ka e yaco.

E rawa ni yaga tale ga na ka o tukuna ke o kauta mai e so na kena vosa vakatautauvata. Rawa mo kauta cake mai e dua na vakasama sa takalevu tu, kei na ka e tukuna na iVolatabu me baleta na vakasama oya. Rawa mo vakatauvatana e rua na itukutuku mai na iVolatabu erau vakamacalataka e dua vata ga na ka. So beka na ka erau duidui kina? Ena vuku ni cava? Cava eda vulica kina? Nomu cakava oqo ena solia e dua na rai vou vei ira na vakarogoci iko.

Ke o lesi mo vakamacalataka e dua na taba ni noda cakacaka vakaitalatala, rawa ni o tekivu ena dua na ivakamacala lekaleka me baleta na ka me caka, vuna me caka kina, kei na sala e veisemati kina oqo kei na inaki ni noda cakacaka kece na iVakadinadina i Jiova. Oti mo sa na qai vakamacalataka na vanua me caka kina na cakacaka oqo, kena gauna, kei na kena iwalewale.

Vakacava ke okati ena nomu ivunau na vakamacalataki ni “veika titobu ni Kalou”? (1 Kor. 2:10) Ena sega ni vereverea nomu ivakamacala ke o tekivu ena nomu vakamacalataka mai liu na veitikina bibi, o qai sereka e muri na kena ivakamacala matailalai. Ke o qai tinia nomu ivakamacala ena nomu railesuva vakalekaleka, era na lomavakacegu sara ga na vakarorogo nira sa vulica rawa e so na ka.

iVakasala Baleta na Bula Vakarisito. Ena qai yaga sara vei ira na vakarorogo nomu ivakamacala ke o vukei ira mera raica ni baleta sara ga na nodra bula na ka o tukuna. Ni o vakadikeva tiko na veitikinivolatabu ena itavi e lesi vei iko, tarogi iko, ‘Na cava e maroroi voli kina ena iVolatabu na itukutuku qo me yacova mai nikua?’ (Roma 15:4; 1 Kor. 10:11) Vakasamataka na veika era na sotava voli na vakarogoci iko. Vakasamataka na kedra dui ituvaki me salavata kei na ivakasala kei na ivakavuvuli ena Vosa ni Kalou. Vakamacalataka na tikinivolatabu e so me vakaraitaka na sala e rawa kina ni yaga vua e dua me raica vakayalomatua na ituvaki e sotava tiko. Kua ni vosa raraba tu ga. Vakamatatataka sara ga na rai me taurivaki se ka me caka.

Tekivu mada ga ena nomu tovolea e dua se rua na ka e vakaturi e ke ena nomu itavi o vakarautaka tiko. Ni sa matau vei iko oqori, qai kuria tiko vakalalai ni toso na gauna. Yaco na gauna sa ra na dau namaki iko na vakarorogo, nira kila ni na yaga dina vei ira na nomu ivakamacala.