Eda na Sega ni Rere ni Uqeti Keda na Loloma

1. Na cava era dau leqataka na tamata ni Kalou?

VAKASAMATAKA mada e vica na italanoa dina qo. Kena imatai, e vinakata o Nestor kei watina o María, me rau veiqaravi ena vanua e vinakati kina na veivuke.b Ia me rawa qori, e vinakati me rau vulica me rau vakayagataki ilavo vakavuku. Rau leqataka ni rau na sega ni marau ke lailai ga na ilavo me rau bula kina. Kena ikarua, e iVakadinadina i Jiova o Biniam, e tiko ena vanua e saqati kina na noda cakacaka, e kila ni na tusaqati ni mai qarava na Kalou. Qori na ka e dau leqataka. Sa qai lomaleqataka ga vakalevu na nodratou rai na nona vuvale ke ratou kila ni sa dua nona lotu vou. Kena ikatolu, e laurai vei Valérie e dua na mataqali kenisa e tete totolo tiko. E sega ni rawarawa me raica e dua na vuniwai ena doka na nona vakabauta me baleta na dra. E leqataka tale ga ni na mate kina.

2. Na cava meda qarauna kina na rere se lomaleqa?

² Vakacava o dau lomaleqa tale ga se rere? Levu vei keda eda dau va qori. Ke da sega ni qarauna, ena rawa ni ca na noda vakatulewa, ena vakaleqai kina noda veiwekani kei Jiova. Qori na ka e vinakata o Setani. E vinakata tale ga me vakarerei keda meda beca na lawa i Jiova, okati kina noda vunautaka na itukutuku vinaka. (Vkta. 12:17) Sa rui ca o Setani, e sega ni dau loloma, e kaukaua sara. Ia mo qarauna me kua ni vakaleqai iko. Ena sala cava?

3. Na cava eda na sega ni rere kina?

³ Eda na vakamalumalumutaka na sasaga nei Setani ke da vakabauta ni lomani keda o Jiova, e tokoni keda. (Same 118:6) Kena ivakaraitaki, e sotava na ituvaki rarawataki o koya e vola na Same 118. E levu na kena meca, okati kina eso era vakaitutu (tikina e 9, 10). Eso na gauna e caka vakaukaua vua na ka (tikina e 13). E vakadodonutaki koya tale ga vakaukaua o Jiova (tikina e 18). Ia e uqeti na daunisame me lagata: “Au na sega ni rere.” Na cava e nuidei kina qai sega ni rere? E kila ni lomani koya vakalevu na Tamana vakalomalagi, ya na vuna e vakadodonutaki koya kina. E vakabauta na daunisame ni na tu vakarau tu ga na nona Kalou dauloloma me vukei koya, se mani ituvaki cava e sotava.—Same 118:29.

4. Na cava eda na sega ni rerevaka ke da vakabauta ni lomani keda na Kalou?

⁴ E bibi meda vakabauta ni lomani keda yadudua o Jiova. Qori ena uqeti keda meda kua ni rerevaka e tolu na ka eda dau lomaleqataka, (1) rere se lomaleqa nida sega ni qarava rawa noda vuvale, (2) noda rerevaka na tamata, kei na (3) noda rerevaka na mate. O ratou na tacida eratou vakamacalataki mai na imatai ni parakaravu, eratou vakabauta ni lomani ratou na Kalou, ya na vuna eratou sega kina ni rere se lomaleqa vakalevu.

RERE SE LOMALEQA NIDA SEGA NI QARAVA RAWA NODA VUVALE

5. Na cava era na rairai lomaleqataka na ulunivuvale? (Raica na iyaloyalo ena waqana.)

⁵ Ena raica vakabibi na ulunivuvale lotu vaKarisito na nona itavi me qarava na nona vuvale. (1 Tim. 5:8) Ke o ulunivuvale, o rairai vakacegui mai na nomu cakacaka ena vuku ni matedewa se qai veidewavi tiko ga qo. O na rairai lomaleqataka na ka me ratou kania na nomu vuvale, na isau ni rede, se na sausaumi ni vale. De dua o na lomaleqataka tale ga ke sa sega na nomu cakacaka, ena dredre mo kunea e dua tale. Se vakataki Nestor kei María sa tukuni oti mai, o na rawa ni nanuma ni na dredre mo dou bula vakavuvale ena dua na ilavo lailai. E vakayagataka vakalevu o Setani na rai qori mera biuti Jiova kina e levu.

6. Na cava e vinakata o Setani meda vakabauta?

⁶ E vinakata o Setani meda vakabauta ni sega ni kauaitaki keda yadudua o Jiova, ena sega tale ga ni vukei keda meda qarava na noda vuvale. Na kena itinitini eda rawa ni nanuma meda kua ni biuta na noda cakacaka, ke da vakawalena mada ga kina na ivakavuvuli vakaivolatabu.

7. Na cava e vakadeitaka vei keda o Jisu?

⁷ E kilai Tamana vinaka o Jisu ni vakatauvatani kei keda. E vakadeitaka vei keda ni noda Kalou o Jiova e ‘kila na ka eda vinakata ni bera mada ga nida kerea.’ (Maciu 6:8) E kila tale ga o Jisu ni tu vakarau o Jiova me vakarautaka na ka meda bula kina. Nida lotu vaKarisito, eda lewenivuvale ni Kalou. Me vaka ni ulunivuvale o Jiova, eda nuidei ni na doka na ivakavuvuli ena 1 Timoci 5:8.

8. (a) Na cava meda kua ni lomaleqataka kina noda sega ni qarava rawa na noda vuvale? (Maciu 6:31-33) (b) Eda na vakatotomuria vakacava nodrau ivakaraitaki na veiwatini ena itaba erau kau kakana vua na tacida yalewa?

⁸ Nida vakabauta ni lomani keda o Jiova, e lomani ira tale ga na lewe ni noda vuvale, eda nuidei ni na vakarautaka na ka meda bula kina. (Wilika Maciu 6:31-33.) E vinakata o Jiova me vakarautaka na ka eda gadreva, e vakaraitaka qori na nona loloma kei na nona lomasavu! Ni bulia na vuravura, e sega wale ga ni vakarautaka na ka meda bula kina. Ena nona loloma, e vakarautaka tale ga e vuravura na ka meda marautaka vakalevu. (Vkte. 2:9) Eso na gauna ena toka ga na ka meda bula kina, ia meda nanuma tiko na vuna ga e rawa kina qori ni o Jiova sara ga e vakarautaka. E sega vakadua ni weletaka, ena dau vakarautaka tu ga. (Maciu 6:11) Ia meda nanuma tiko ni ka vakayago eda vakuai keda kina ena gauna qo, e sega sara ga ni tautauvata kei na ka e vakarautaka vei keda na noda Kalou dauloloma ena gauna qo kei na gauna se bera mai. Qori na ka erau vakadinadinataka o Nestor kei María.—Aisea 65:21, 22.

9. Na cava o vulica ena ivakaraitaki i Nestor kei María?

⁹ Erau marautaka o Nestor kei María na vale totoka rau tiko kina, kei na nodrau cakacaka vinaka mai Colombia. Rau kaya: “Keirau vakasamataka me keirau bula rawarawa ga me keirau vakalevutaka na neirau cakacaka vakaitalatala, ia keirau leqataka ni keirau na sega ni marau ni lailai ga na ilavo keirau na bula kina.” Na cava e qai vukei rau? Erau vakasamataka ni levu na sala e vakaraitaka kina o Jiova nona lomani rau. Rau vakabauta ni na vakarautaka tu ga na ka me rau bula kina, rau mani biuta na nodrau cakacaka vinaka. Rau volitaka na nodrau vale, rau toki sara ina dua na vanua e vinakati kina vakalevu na dautukutuku ni Matanitu. Na cava rau kaya ena nodrau vakatulewa qori? E kaya o Nestor: “Keirau vakadinadinataka sara ga na ka e tukuni ena Maciu 6:33. E sega ni dua na ka vakayago keirau leqa kina. Keirau marautaka vakalevu na neirau bula ena gauna qo.”

NODA REREVAKA NA TAMATA

10. Na cava eda dau rerevaki ira kina eso?

¹⁰ E kilai na keda itukutuku na kawatamata nida dau veivakaleqai ga vakataki keda. (Dauv. 8:9) Kena ivakaraitaki, levu era vakatanitaka na nodra lewa, era daubasulawa voravora, ira na dauveisagai era dau vakasaurarataki ira era vuli vata e koronivuli, eso mada ga e voravora na nodra itovo vei ira na lewe ni nodra vuvale. Sa rauta meda dau rere! E vakayagataka vakacava o Setani na rere qori me rawai keda kina?

11-12. Ena vakayagataka vakacava o Setani noda rerevaka na tamata me rawai keda kina?

¹¹ E vakayagataka o Setani noda rerevaka na tamata meda kua ni vunau se cakava eso tale na ka e vinakata vei keda o Jiova. Ni lewai ira tiko na veimatanitu, ya na vuna era vakatabuya kina na noda cakacaka, mera vakacacani keda. (Luke 21:12; Vkta. 2:10) E vakayagataka tale ga o Setani e levu nikua mera vakatetea na itukutuku veivakacalai se lasutaki me baleti keda na iVakadinadina i Jiova. O ira na vakabauta na lasu qori e rawa nira veivakalialiai se ra vakacacani keda mada ga. (Maciu 10:36) Vakacava eda kidroataka na iwalewale nei Setani? Sega. A vakayagataka tale ga qori ena imatai ni senitiuri.—Caka. 5:27, 28, 40.

¹² Noda rerevaka nodra veitusaqati na veimatanitu e sega ni iwalewale duadua ga e vakayagataka tiko o Setani. Eso era leqataka nodra rai na wekadra nira sa mai iVakadinadina i Jiova. Era rerevaka qori mai na nodra vakacacani. Era lomani ira vakalevu na wekadra, era vinakata mera mai kilai Jiova, mera lomani koya tale ga. E mositi ira nira dau vosabeca na Kalou dina na wekadra qori, era vosabeci ira tale ga na qaravi koya. Eso sara ga vei ira na dau veitusaqati qori era qai mai kila na ka dina. Ia vakacava ke ra sega sara ga ni via kilai keda tale na wekada ena vuku ni noda vakabauta vou? Na cava eda na cakava?

13. E yaga vakacava noda nuitaka na loloma ni Kalou nira sega ni taleitaki keda na lewe ni noda vuvale? (Same 27:10)

¹³ E veivakacegui nida vakasamataka na totoka ni ka dina e tukuni ena Same 27:10. (Wilika.) Nida nanuma tiko na levu ni nona lomani keda o Jiova, eda na sega ni rere nida tusaqati. Eda nuidei tale ga ni na vakalougatataka na noda vosota. O Jiova duadua ga ena vakarautaka na ka meda bula kina, vakaceguya na lomada, vukei keda tale ga meda volekati koya tiko ga! Qori na ka e vakadinadinataka o Biniam sa tukuni oti mai.

14. Na cava o vulica ena ivakaraitaki nei Biniam?

¹⁴ E kila o Biniam ni rawa ni vakacacani sara vakaukaua ni mai iVakadinadina i Jiova. Dikeva ni yaga dina na nona kila ni lomani koya o Jiova, e sega kina ni rerevaka na tamata. E kaya: “Au sega sara ga ni vakamacalataka rawa na veika dredre au sotava ena gauna au vakacacani kina. Dua na ka au leqataka vakalevu na nodratou veitusaqati na lewe ni noqu vuvale. Au lomaleqataka ni noqu vakatulewa meu iVakadinadina i Jiova ena vakararawataki tamaqu e sega ni tiko ena dina, eratou na sega tale ga ni dokai au na noqu vuvale.” Ia e nuidei o Biniam ni o Jiova e dau kauaitaki ira na lomani koya. E kaya: “Au dau vakasamataka nona dau vukei ira eso tale o Jiova mera vosota na leqa vakailavo, veivakaduiduitaki, kei na veivakacacani. Au kila keu yalodina tiko ga vei Jiova, ena vakalougatataki au. Niu vesu vakavica vata qai vakararawataki, au vakadinata sara ga ena gauna qori na levu ni nona dau vukei keda o Jiova ena gauna ni leqa nida yalodina tiko.” Io, o Jiova e vaka sara ga na Tamai Biniam dina, o ira tale ga na tacida era vaka na lewe ni nona vuvale.

REREVAKA NA MATE

15. Na cava eda rerevaka kina na mate?

¹⁵ E tukuni ena iVolatabu ni keda meca o mate. (1 Kor. 15:25, 26) Eda dau rerevaka na vakasama ni mate, vakauasivi ke da tauvimate bibi se dua na wekada. Na cava eda rerevaka kina na mate? Ni buli keda o Jiova, e biuta tale ga e lomada meda via bula tawamudu. (Dauv. 3:11) Nida rerevaka na mate ena uqeti keda meda maroroya na noda bula. Kena ivakaraitaki, ena uqeti keda meda vakatulewataka vinaka na ka eda kania, eda vakaukauayago, meda lai raici vuniwai, meda gunu wainimate ke vinakati, meda kua tale ga ni cakava na ka ena vakaleqa na noda bula.

16. E vakayagataka vakacava o Setani noda rerevaka na mate me rawai keda kina?

¹⁶ E kila vinaka o Setani nida mareqeta na noda bula. E kaya nida na biuta na ka kece, okati kina na noda veiwekani kei Jiova, me rawa nida bula tiko ga. (Jope 2:4, 5) E lasu o Setani! Me vaka ni “o koya [sara ga] e vakavuna na mate,” ena vakayagataka na noda rerevaka na mate meda biuti Jiova kina. (Iper. 2:14, 15) Eso na gauna, o ira sara ga na matataki Setani era vakarerei keda nida na vakamatei ke da sega ni biuta na noda vakabauta. Eso tale na gauna, ena rawa ni vakayagataka o Setani na noda tauvimate bibi meda soro koso kina. De dua era na cikevi keda na vuniwai se o ira na wekada era sega ni tiko ena dina meda taura na dra, qori e beci kina na lawa ni Kalou. Se rawa ni vakatututaka e dua meda vakayagataka na veiqaravi e sega ni salavata kei na ivakavuvuli vakaivolatabu.

17. Me salavata kei na Roma 8:37-39, na cava meda kua ni rerevaka kina na mate?

¹⁷ Eda sega ni vinakata meda mate, ia eda kila ni na lomani keda tu ga o Jiova ke da mate mada ga. (Wilika Roma 8:37-39.) Nira mate na itokani i Jiova, e nanumi ira vinaka tu ga me vaka ga era se bula tiko. (Luke 20:37, 38) E vinakata vakalevu me vakaturi ira. (Jope 14:15) E vakarautaka o Jiova e dua na ka talei me rawa nida “rawata . . . na bula tawamudu.” (Joni 3:16) Eda kila ni lomani keda vakalevu, e kauaitaki keda tale ga. Nida tauvimate gona se voleka sara ni mate, meda kua ni biuti Jiova. Ia meda nuitaka na nona veivakacegui, nona vuku kei na nona kaukaua. Qori sara ga na ka e cakava o Valérie kei watina.—Same 41:3.

18. Na cava o vulica ena ivakaraitaki nei Valérie?

¹⁸ Ni yabaki 35 o Valérie, e laurai ni sa tete totolo tiko e yagona e dua na mataqali kenisa. Dikeva ni sega sara ga ni rerevaka na mate baleta ni lomani Jiova. E kaya: “Keirau kidroa sara ga vakaveiwatini niu sa kenisa. E vinakati me caka vei au e dua na veisele levu. Au kere ivakasala vei ira e levu na dauniveisele, ia era via vakayagataka kece na dra ena nodra veisele. Dua na ka na noqu rere. Ia ena vuku ni ivakaro ni Kalou, au na sega tu ga ni taura na dra! Ena noqu bula kece, e vakaraitaka tu ga o Jiova na levu ni nona lomani au. Ia qo e dua na sala au na vakaraitaka kina na noqu lomani koya. Na gauna kece au rogoca kina na itukutuku ca, e uqeti au qori meu vakamarautaki Jiova, sega ni o Setani. Au mani sele rawa, e sega ni soli vei au na dra. Au se tautauvimate tiko ga, ia e dau vakarautaka tu ga o Jiova na ka au gadreva. Kena ivakaraitaki, ni bera ni kilai na kequ mate keimami veivosakitaka ena soqoni ena muanimacawa na ulutaga, ‘Yaloqaqa ni o Sotava na Veika Dredre Nikua.’c E vakacegui au sara ga na ulutaga qori. Keirau wilika vakavica vata. Na ulutaga va qo kei na ituvatuva vinaka vakayalo e vakacegui keirau vakaveiwatini, e uqeti keirau me donu na neirau rai, me keirau vakatulewa vinaka tale ga.”

KUA NI RERE SE LOMALEQA

19. Na cava sa vakarau yaco?

¹⁹ Ena veivuke i Jiova, era vosota kina na ituvaki dredre na lotu vaKarisito e veiyasa i vuravura, ra qai saqata na Tevoro. (1 Pita 5:8, 9) O rawa tale ga ni cakava qori. Sa voleka sara qo me vakaroti Jisu kei ira na veiliutaki kei koya o Jiova mera “vaqeavutaka na cakacaka ni Tevoro.” (1 Joni 3:8) Oti qori, o ira na tamata ni Kalou era qaravi koya tiko e vuravura era na “sega ni rerevaka e dua se taqaya.” (Aisea 54:14; Maika 4:4) Me yacova na gauna qori, e vinakati meda saga tiko ga meda kua ni rere se lomaleqa.

20. Na cava ena vukei keda meda kua ni rere?

²⁰ E bibi meda vakabauta tiko ga ni o Jiova e lomani ira na nona dauveiqaravi, e dau taqomaki ira tale ga. Ena rawa qori ke da dau vakasamataka vakatitobu qai veivosakitaka na sala e dau taqomaki ira kina nona dauveiqaravi o Jiova ena gauna sa oti. Kena ikuri, meda vakasamataka na sala e vukei keda yadudua kina nida sotava na ituvaki dredre. Ena veivuke gona i Jiova, eda na sega kina ni rere!—Same 34:4.