O Lomana Vakalevu na Veivakadreti i Jiova?

“Sa vakabauta na nomuni vosa [se, “veivakadreti,” NW] na yaloqu; ia ka’u sa lomana vakalevu.”​—SAME 119:167.

1. Era cavuti vakavica vata e vei na veivakadreti i Jiova?

E LOMA i Jiova mera marau na nona tamata. Ia ke da via marau dina, meda muria na lawa ni Kalou da talairawarawa ina nona ivakaro. Oya na vuna e biuta tu mai kina vei keda na nona veivakadreti. Era cavuti vakavica vata oqori ena iVolatabu, vakabibi ena Same 119, kena irairai ni a vola na ravouvou gone kei Juta, o Esekaia. Na sere totoka oya e tekivu vaka oqo: “Sa kalougata [se, “marau,” NW] ko ira era sa dodonu sara e na sala, era muria na vunau i Jiova. Sa kalougata ko ira era vakabauta na nona vosa [se, “veivakadreti,”], era qarai koya ena lomadra taucoko.”​—Same 119:​1, 2.

2. E vakavumarau vakacava na muri ni nona veivakadreti na Kalou?

² Eda ‘muria na ivunau i Jiova’ ena noda vulica na ka dina mai na nona Vosa da qai bulataka. Sa dodonu ga meda vakadreti e veigauna nida tamata ivalavala ca. Na vosa vakaiperiu ni “veivakadreti” e dusia ni Kalou e dau vakalesuya mai ina noda vakasama na nona lawa, ivunau, ivakavuvuli, kei na ivakaro. (Maciu 10:​18-​20) Eda na marau wale ga kevaka eda rogoca e veigauna kece na veivakadreti vaka oya, nira dusimaki keda meda drotaka na icori e so vakayalo era dau tini ena leqa kei na rarawa.

Kabita Matua na Veivakadreti i Jiova

3. Me vaka na vosa ni Same 119:​60, 61, na cava eda kila vinaka tu mai vu ni lomada?

³ Dau vakamareqeta na veivakadreti ni Kalou na daunisame, e lagata: “Au a vakusakusa, ka sega ni vakaberabera me’u vakabauta na nomuni vunau. A nodrai vau nai valavala ca sa voliti au: ia ka’u sa sega ni guilecava na nomuni vunau.” (Same 119:​60, 61) Ena veivakadreti i Jiova eda vosota rawa kina na veivakacacani baleta nida kila mai vu ni lomada ni o koya na Tamada vakalomalagi e rawa ni tagutuva na wa era vesuki keda kina na keda meca mera tarovi keda. Ena kena gauna ga, ena qai sereki keda o koya mai na veika dredre vaka oya meda rawa ni vunautaka tiko ga kina na Matanitu ni Kalou.​—Marika 13:10.

4. Na cava meda cakava ni vakadreti keda na Kalou?

⁴ So na gauna, eda dau vakadodonutaki ena veivakadreti i Jiova. Meda ciqoma mada ga ena marau na veivakadodonutaki vaka oya, me vakataki koya ga na daunisame. A kaya vua na Kalou ena masu: “A nomuni tukutuku [se, “veivakadreti,” NW] talega na ka ka’u sa marautaka . . . ka’u sa lomana kina na nomuni tukutuku [se, “veivakadreti,”].” (Same 119:​24, 119) Sa qai levu sara na veivakadreti ni Kalou nikua ni raici vata kei na gauna e bula kina na daunisame. Na vica vata na drau na vosa era lavetaki ina iVolatabu Vakirisi mai na iVolatabu Vakaiperiu era sega wale ga ni vakavotuya vei keda na ivakaro i Jiova vei ira na nona tamata ena ruku ni Lawa, era vakavotuya tale ga na nona inaki me baleta na ivavakoso vakarisito. Ke sa raica na Kalou ni dodonu meda vakadreti mai na nona lawa, meda ciqoma ena marau oya. Ke da ‘kabita na veivakadreti i Jiova,’ eda na drotaka rawa na veika ca eda temaki kina e sega ni marautaka na Dauveibuli, era na vakavurarawa tale ga vei keda.​—Same 119:​31, NW.

5. Na sala cava eda na lomana kina vakalevu na veivakadreti i Jiova?

⁵ Eda na lomana vakacava na veivakadreti i Jiova? “Sa vakabauta na nomuni vosa [se, “veivakadreti,” NW] na yaloqu; ia ka’u sa lomana vakalevu,” e lagata na daunisame. (Same 119:​167, neitou na matanivola kala.) Eda na lomana vakalevu na veivakadreti i Jiova kevaka eda okata da qai ciqoma oqori me vaka sara ga e lako tiko mai vua na Tamada e nanumi keda dina. (1 Pita 5:​6, 7) Sa dodonu ga meda vakadreti vei koya, ia eda na qai lomana ga vakalevu na nona veivakadreti nida sa vakadinadinataka na kedra yaga.

Vuna sa Dodonu Kina me Vakadreti Keda na Kalou

6. Na cava e dua na vuna sa dodonu ga kina me vakadreti keda o Jiova, ia ke da via nanuma lesu oya, na cava meda cakava?

⁶ Nida tamata guiguileca, sa dodonu ga kina me dau vakadreti keda o Jiova. E kaya na World Book Encyclopedia: “Ena toso ni gauna, dau kena ivakarau me guiguileca na tamata. . . . De sa yacovi iko oti oqo, o vakarau cavuta sara tu ga e dua na yaca se dua na ka o qai sega tale ni nanuma se cava oya. . . . Dau vakalevu me yali vakalekaleka vaka oya mai na noda vakasama na ka e nanumi. Ra kaya na saenitisi ni oya e vaka na noda saga meda vaqara e dua na iyaya ena rumu e kabuwacara vakalevu. . . . Na sala vinaka meda nanuma dei kina e dua na ka, oya meda vulica da dikeva vagumatua oqori, veitalia ke o nanuma ni o sa kila vinaka.” Ena rawarawa nida nanuma lesu da qai bulataka na veivakadreti ni Kalou ke da vulica vagumatua da qai dau vakananuma.

7. Na cava e sa qai vinakati ga kina vakalevu nikua na veivakadreti ni Kalou?

⁷ Sa qai gadrevi ga vakalevu nikua me vakadreti keda o Jiova baleta ni sa yacova na kena iyacoyaco i cake duadua ena itukutuku ni kawatamata na ca. Ke da vakananuma na veivakadreti ni Kalou, eda na yalomatuataka kina na sala meda drotaka na icori e viria na vuravura ca oqo. “Au sa vuku cake vei ira kecega era vakavulici au,” e kaya na daunisame, “ni’u sa vakanananu ki na nomuni tukutuku [se, “veivakadreti,” NW]. Au sa vuku cake vei ira na qase, ni’u sa muria na nomuni vunau. Au sa vakadaroya na yavaqu mai na sala ca kecega, me’u vakabauta kina na nomuni vosa.” (Same 119:​99-​101) Nida muria na veivakadreti ni Kalou, eda na tiva kina mai “na sala ca kecega,” da qai sega ni ucui ira na umatamata e “vakabutobutotaki na lomadra, a ra sa sega ni veiriti kei na bula sa mai vua na Kalou.”​—Efeso 4:​17-​19.

8. Eda na vakarautaki keda vakacava meda rawa ni dei tiko ga ni vakatovolei na noda vakabauta?

⁸ E gadrevi tale ga nikua na veivakadreti ni Kalou nida na vakaukauataki kina meda vosota e levu na ka dredre ena “gauna ni vakataotioti” oqo. (Taniela 12:9) Ke da sega ni vakadreti, eda na tini vakataki koya e “daurogoca [na ka] ka guilecava.” (Jemesa 1:​25) Eda na dei tiko ga ena gauna e vakatovolei kina na noda vakabauta ke da dau gumatua ni vulica vakataki keda na iVolatabu, da vulica tale ga vakaivavakoso, salavata na ivola vakaivolatabu e so e vakarautaka na “dauveiqaravi yalo dina ka vuku.” (Maciu 24:​45-​47, VV) E yaga na isolisoli vakayalo vaka oya nida na raica rawa na ka meda cakava ena ituvaki dredre eda sotava, ena gadrevi meda vakamarautaki Jiova tiko ga kina.

Na iNaki Bibi ni Soqoni

9. O cei o ira “nai solisoli,” era vukea vakacava na tacidra vakayalo?

⁹ Dua na sala e vakacegui kina na noda gadreva na veivakadreti ni Kalou na soqoni vakarisito, era dau veidusimaki kina na tacida era lesi. E vola na yapositolo o Paula ni gauna e lako kina ‘i cake o Jisu, e vakabobulataki ira e lewe vuqa, a sa solia na isolisoli e so vei ira na tamata.’ Sa qai kaya tale o Paula: “Sa solia eso [o Karisito], me rai apositolo; ka so, me ra parofita; ka so, me ra tamata dauvunau voli; ka so me rai vakatawa kai vakavuvuli: me ra vakavinakataki kina ko ira sa lotu, me ia na cakacaka ni talatala, me vakatataki cake nai vavakoso nei Karisito.” (Efeso 4:​8, 11, 12) Eda vakavinavinaka dina ni o ira “nai solisoli” oqo​—o ira na qase ni ivavakoso​—era dau dusimaki keda ena veivakadreti i Jiova ena gauna eda soqoni kina meda sokalou!

10. Na tikina cava e vakabibitaki ena Iperiu 10:​24, 25, (VV)?

¹⁰ Ke da marautaka dina na isolisoli e vakarautaka na Kalou, eda na sega ni calata na lima na soqoni vakaivavakoso e veimacawa. A vakadreta o Paula na kena bibi meda dau soqoni e veigauna. E vola: “Me da sa vakasamataka tale ga na sala meda dui veivakauqeti kina e na loloma kei na cakacaka vinaka. Me da sa kakua ni vakaweleweletaka na sosoqoni vata, me vaka sa dau nodra i vakarau e so, ia me da sa dui veivakayaloqaqataki ga, ka me vagumatuataki cake sara ni ko ni sa raica ni sa roro voleka tiko mai na Siga.”​—Iperiu 10:​24, 25, VV.

11. E yaga vakacava na noda soqoni e lima e veimacawa?

¹¹ Vakaevei o marautaka na yaga ni noda soqoni? Na vuli Vale ni Vakatawa e veimacawa e dau vaqaqacotaka na noda vakabauta, dusimaki keda meda muria na veivakadreti i Jiova, qai vakataudeitaki keda meda valuta “na yalo ni vuravura.” (1 Korinica 2:​12; Cakacaka 15:31) Ena Soqoni Soqovi Levu, ra dau veivakavulici ena Vosa ni Kalou o ira na vunau, ra kauta cake tale ga mai na veivakadreti i Jiova kei “na vosa ni bula tawa mudu” totoka i Jisu. (Joni 6:​68; 7:​46; Maciu 5:1–​7:​29) Eda vagatara noda iwalewale ni veivakavulici ena Koronivuli ni Vuli iTalatala Liutaki Vakalou. Na Soqoni ni Cakacaka e yaga ena kena vakavinakataki na ivalavala ni noda vakamacalataka e veivale na itukutuku vinaka, ena noda veisikovi lesu, nida veivakavulici ena iVolatabu, kei na so tale na basoga ni noda cakacaka vakaitalatala. Na keda iwiliwili lailai ena Vulivola ni iVavakoso e vakarawarawataka na noda vakaitavi vakalevu cake ena kena vakamacalataki na veivakadreti ni Kalou.

12, 13. Era vakaraitaka vakacava e so na tamata ni Kalou ena dua na vanua vakaesia nira raica vakabibi na soqoni vakarisito?

¹² Nida tiko e veigauna ena soqoni vakaivavakoso, eda na rogoca tiko ga kina na ivakaro ni Kalou, eda na vakaukauataki tale ga vakayalo meda tudei ni yaco na veivaluvaluti, na bula leqaleqa vakailavo, kei na so tale na ka dredre e vakatovolea noda vakabauta. Era vakila na bibi ni soqoni e rauta ni le 70 na lotu Vakarisito ena dua na vanua vakaesia era drovaki bula ni yaco na ivalu, ra lai vakaitikotiko sara ena veikauloa. Era vakadeitaka e yalodra mera tomana tiko ga nodra sosoqoni, ra mani lesu ina nodra koro sa vakacacani vakalevu ena ivalu, ra basuka na ivovo ni nodra Kingdom Hall e se tu, ra lai tara tale i veikau.

¹³ Ena dua tale na yasa ni vanua vata ga oya, era se qaravi Jiova tiko ga ena yalogu na nona tamata. A tarogi e dua na qase ni ivavakoso ena yasayasa oya: “Na cava sara mada e tauri ira vata tiko na mataveitacini?” Na kena isau? “Ena loma ni 19 na yabaki, keimami sega vakadua ni vakalutu soqoni. So na gauna, era sega ni yaco rawa ina vanua ni soqoni na mataveitacini baleta na vakalutugasaukuro se ra sotava e so tale na ka dredre, ia keimami sega vakadua ni vakadaroya e dua na soqoni.” Era raica dina vakabibi na tacida lomani oqo me kua ni ‘vakaweleweletaki na dau soqoni vata.’

14. Na cava eda vulica vua na yada sa kena marama, o Ana?

¹⁴ Na yada yabaki 84, o Ana, a “sega ni yali vakadua mai na valenisoro.” A tiko gona o koya ni sa kau yani i kea na gonedramidrami o Jisu, oti toka e vica na siga ni sa sucu. (Luke 2:​36-​38, NW) Vakaevei, o dau tovolea vakaukaua mo kua ni calata e dua na soqoni? O dau saga ena nomu igu taucoko mo tiko ena siga kece ni soqo ni tabacakacaka kei na soqo ni tikina? Na ivakasala yaga eda rogoca ena sosoqoni vaka oqo e ivakadinadina matata ni dau karoni ira na nona tamata na Tamada vakalomalagi. (Aisea 40:11) Na gauna vaka oya e vakavureki tale ga, kei na noda tiko e kea e vakaraitaka nida marautaka na veivakadreti i Jiova.​—Niemaia 8:​5-8, 12.

Kilai Tani Ena Vuku ni Veivakadreti i Jiova

15, 16. Ke da muria na veivakadreti i Jiova, ena lai tara vakacava na noda itovo oqori?

¹⁵ Ke da muria na veivakadreti ni Kalou, eda na kilai tani nida duidui mai na vuravura itovo ca oqo. Dua mada oqo, eda na sega ni vakayacora na itovo tawakilikili kevaka eda muria na veivakadreti ni Kalou. (Vakarua 5:​18; Vosa Vakaibalebale 6:​29-​35; Iperiu 13:4) Ke da temaki meda lasu, meda kua ni dina ena ka eda cakava, se meda butako, eda na rawa ni valuta na gagadre oqori ke da muria na veivakadreti vakalou. (Lako Yani 20:​15, 16; Vunau ni Soro 19:11; Vosa Vakaibalebale 30:​7-9; Efeso 4:​25, 28; Iperiu 13:18) Ke da muria na veivakadreti i Jiova, eda na valuta rawa na yaloca, na kakase, kei na gagadre ni via sauma na ca e caka vei keda.​—Vunau ni Soro 19:​16, 18; Same 15:​1, 3.

¹⁶ Ena noda muria na veivakadreti ni Kalou, eda na savasava kina, se da wasei tani meda veiqaravi vua. E rui bibi meda wasei keda tani mai na vuravura oqo! Ena iotioti ni bogi ni nona bula vakatamata o Jisu, a masuta oqo vei Jiova ena vukudra na nona imuri: “Au sa solia vei ira na nomuni vosa; a sa cati ira ko vuravura, ni ra sa sega ni vakavuravura, me vaka ka’u sa sega ni vakavuravura. Au sa sega ni masu mo ni kauti ira tani e vuravura, mo ni maroroi ira ga mai na vu-ni-ca. Era sa sega ni vakavuravura, me vaka ka’u sa sega ni vakavuravura. Vakatabui ira e na nomuni vakavuvuli dina: sa ka dina na nomuni vosa.” (Joni 17:​14-​17) Meda vakamareqeta tiko mada ga na Vosa ni Kalou, ni oqori e wasei keda tani meda veiqaravi tabu vua.

17. Na cava e rawa ni yaco ke da vakalecalecava na veivakadreti ni Kalou, na cava gona meda vakayacora?

¹⁷ Nida tamata i Jiova, eda na saga meda vakadonui meda rawa ni qaravi koya tiko ga. Ke da vakalecalecava na veivakadreti ni Kalou, eda na rawa ni coriti ena yalo ni vuravura oqo e laurai votu ena kena ivosavosa, ivola, ka ni veivakamarautaki, kei na itovo. Kena ikuri, eda na qarauna tale ga meda kua ni tini ena dau vinakata na ilavo, viavialevu, dau vosa vakacaca, sega ni vakavinavinaka, caca veiwekani, sega ni rawa na yaloda, cudrucudru, yalolevu, lomana vakalevu na marau, lomana vakalailai na Kalou​—me cavuti e vica ga na itovo era kilai kina na tamata era sega ni veiriti kei na Kalou. (2 Timoci 3:​1-5) Ni sa cici yawa sara mai na bula ena iotioti ni veisiga ni ituvaki ca oqo, meda masuta tiko mada ga na veivuke vakalou me rawa nida uqeti kina meda muria dei na veivakadreti i Jiova, meda ‘qaqarauni tale ga me vaka na nona vosa.’​—Same 119:9.

18. Ke da muria na veivakadreti ni Kalou, ena uqeti keda oqori meda cakava na cava soti?

¹⁸ Na veivakadreti i Jiova e sega wale ga ni vakayadrati keda ena ka meda qaqarauni kina. E yavalati keda tale ga meda cakava na ka e dodonu, qai veiuqeti meda nuitaki Jiova vakatabakidua, meda lomani koya mai vu ni yaloda, lomada, noda vakasama kece, kei na kaukaua kece. (Vakarua 6:5; Same 4:5; Vosa Vakaibalebale 3:​5, 6; Maciu 22:37; Marika 12:30) E tosoi keda tale ga na veivakadreti ni Kalou meda lomani ira na tamata kece ga. (Vunau ni Soro 19:18; Maciu 22:39) E dua na sala levu eda vakaraitaka kina nida lomana na Kalou kei ira na tamata kece ga, oya ena noda vakayacora na lomana da qai kacivaka yani na itukutuku ni bula me baleta ‘na veikilai kei na Kalou.’​—Vosa Vakaibalebale 2:​1-5.

Ke Da Muria na Veivakadreti i Jiova, Eda na Bula!

19. Eda na vakaraitaka vakacava vei ira e so tale ni vinaka qai yaga na muri ni veivakadreti i Jiova?

¹⁹ Ke da muria na veivakadreti i Jiova da qai vukea e so tale mera mai cakava tale ga oqo, eda na bula kina o keda kei ira na rogoci keda. (1 Timoci 4:​16) Eda na vakaraitaka vakacava vei ira e so tale ni yaga qai vinaka na muri ni veivakadreti i Jiova? Ena noda bulataka sara ga na ivakavuvuli vakaivolatabu. Era na vakadinadinataka kina o ira “sa vakarau tu me vinakata na bula tawamudu” ni ka e vinaka me caka, oya me muri na ivakarau e virikotori tu ena Vosa ni Kalou. (Cakacaka 13:48) Era na raica tale ga ni ‘sa tiko dina kei keda na Kalou,’ qai lomadra mera mai tomani keda ena sokalou vua na Turaga Sau o Jiova.​—1 Korinica 14:​24, 25.

20, 21. Na veivakadreti ni Kalou kei na veivuke ni yalona tabu ena uqeti keda meda cakava na cava?

²⁰ Eda na qai lomana ga vakalevu na veivakadreti i Jiova ke da vulica tiko ga na iVolatabu, bulataka na ka eda vulica, da qai vakayagataka vinaka sara na isolisoli vakayalo e vakarautaka o koya. Ke da muria na veivakadreti oqo, ena rawa vei keda meda sulumaka na “i tovo vou, sa caka me veiucui kei na Kalou e na yalododonu kei na yalosavasava.” (Efeso 4:​20-​24, VV) Ena veivakadreti i Jiova kei na veivuke ni yalona tabu, sa na rawa meda vakavotuya ena noda bula na loloma, reki, vakacegu, vosota vakadede, yalomalua, yalololoma, vakabauta, yalomalumalumu, ivalavala malua​—na itovo era veicalati sara ga kei na kena e kune ena vuravura e koto ena kaukaua i Setani! (Kalatia 5:​22, 23; 1 Joni 5:​19) Eda vakavinavinaka gona ni rawa ni vakadreti vei keda na veika e vinakata o Jiova meda cakava ena gauna eda vulica kina vakataki keda na iVolatabu, ena gusudra na qase ni ivavakoso, nida tiko ena noda soqoni vakaivavakoso, soqo ni tabacakacaka, se soqo ni tikina.

²¹ Nida muria na veivakadreti i Jiova, eda na reki dina ga nida sotava na rarawa nida muria tiko na ivalavala dodonu. (Luke 6:​22, 23) Eda rai vua na Kalou me dau vakabulai keda mai na ituvaki ririkotaki dina. Sa qai bibi dina oqori baleta na veimatanitu kece era sa vakasoqoni tiko oqo “ki nai valu ni siga dina ko ya ni Kalou Kaukauwa,” na Amaketoni.​—Vakatakila 16:​14-​16.

22. Me vakacava sara mada na gu ni yaloda me baleta na veivakadreti i Jiova?

²² Ke da vinakata me noda na isolisoli ni bula tawamudu, meda lomana vakalevu na veivakadreti i Jiova da qai muria mai vu ni yaloda. Me tiko mada ga vei keda na yalo vata ga a tiko vua na daunisame, e lagata: “A kena dodonu na nomuni vosa [se, “veivakadreti,” NW] sa sega ni mudu rawa: mo ni vakavukui au, ka’u na bula kina.” (Same 119:144) O koya gona, me tiko vei keda na yalogu vata ga e tiko vua na daunisame, me vaka e laurai ena nona vosa: “Au kaci yani vei kemuni [i Jiova]. Ni vakabulai au! Au na qai muria na nomuni veivakadreti.” (Same 119:​146, NW) Io, meda vakadinadinataka mada ga ena noda vosa kei na ka eda cakava nida lomana dina vakalevu na veivakadreti i Jiova.

O na Sauma Vakacava?

• E raica vakacava na veivakadreti i Jiova na daunisame?

• Na cava sa dodonu ga kina me vakadreti keda na Kalou?

• E yaga vakacava na veisoqoni ena vakabibitaki ni veivakadreti vakalou?

• E wasei keda tani vakacava na veivakadreti i Jiova meda duidui mai na vuravura oqo?

[iYaloyalo ena tabana e 15]

E lomana vakalevu na veivakadreti i Jiova na daunisame

[iYaloyalo ena tabana e 17]

Me vaka ga na ivakaraitaki i Ana, o dau tovolea vakaukaua mo kua ni calata e dua na soqoni?

[iYaloyalo ena tabana e 18]

Ke da muria na veivakadreti i Jiova, eda na wasei tani meda savasava, meda vakadonui meda veiqaravi vua