LESONI 10

Veiveisau na Rorogo ni Domo

Vosa Vakaibalebale 8:4, 7

IVAKAMACALA LEKALEKA: Me matata qai veiuqeti nomu ivakamacala ni veiveisau na rorogo ni domomu.

Rogo levu se rogo lailai. Me rogo levu na domomu ni o vakabibitaka eso na tikina qai uqeti ira na vakarorogo. Me va tale ga qori ke o wilika e dua na tikinivolatabu e okati kina na vakatauitotogi. Ni rogo lailai na domomu era na namaka na vakarorogo ni vakarau veisau na ka o tukuna me vakilai kina na taqaya se rere.

Me kua ni rogo levu tu ga na domomu ni o vosa, de ra nanuma na vakarorogo nira vosataki tiko. Kua ni levu tale nomu ivukivuki de ra kauaitaki iko vakasivia na vakarorogo.
Kaukaua cake se malumu sobu. Ke veiganiti ena nomu vanua, me kaukaua cake nomu vosa me bulabula kina na ka o tukuna se nomu vakamacalataka na levu ni dua na ka se na kena yawa. Me malumu na rorogo ni domomu ni o vakamacalataka na veika me baleta na rarawa kei na nuiqawaqawa.
Totolo se berabera. Vosa vakatotolo ke tukuni e dua na itukutuku marautaki. Vosa vakaberabera ni o vakabibitaka eso na tikina.

Kua ni veisau vakasauri na ivakarau ni nomu vosa, de ra veilecayaki na vakarorogo. Me kua ni totolo sara nomu vosa de sega ni matata na ka o tukuna.