Bulia na Kalou na Lomalagi kei na Vuravura

O cei na Dauveibuli? Na Kalou o Jiova. A bulia na ka kece, wili kina na ka e laurai kei na ka e sega ni laurai. Ni bera ni bulia na ka e laurai, a bulia e liu e dua na iwiliwili levu ni agilosi. O kila na cava na agilosi? O ira qo era vakataki Jiova nida sega ni raici ira. Na imatai ni agilosi a buli e dau vukei Jiova. A vukei koya ena buli ni kalokalo, so tale na vuravura, kei na ka kece tale eso, wili kina na vuravura totoka eda tiko kina.

E vakarautaka o Jiova na vuravura me tawana na manumanu kei na tamata. E vakacilava na matanisiga me vakararamataka na vuravura. E bulia na veiulunivanua, wasawasa, kei na uciwai.

Na cava tale e yaco? E kaya o Jiova: ‘Au na bulia na co, na vunikau lalai, kei na vunikau lelevu.’ Sa qai vua na veimataqali vuata, tubu na kakana draudrau kei na veisenikau. E qai bulia o Jiova na manumanu kece: na manumanuvuka, na kena e qalo, qasi, kei na kena e toso vakamalua. E bulia na manumanu lalai me vaka na rapete, kei na manumanu lelevu me vaka na elefaniti. Na manumanu cava o taleitaka?

E qai kaya o Jiova vua na imatai ni agilosi: “Daru cakava na tamata.” Eda duidui na tamata mai na manumanu. E rawa nida bulia eso na ka, rawa nida vosa, dredre, rawa tale ga nida masu. E dodonu meda vakaraica vinaka na vuravura, kei na manumanu. O kila na imatai ni tagane? Meda raica mada.