E Cala na Veimauilavo?

Kena isau vakaivolatabu

E sega ni vakamacalataki vakamatailalai ena iVolatabu na veimauilavo. Ia e laurai ena ivakavuvuli vakaivolatabu ni cala ena mata ni Kalou na veimauilavo.—Efeso 5:17.a

• E cata na Kalou na kocokoco, na itovo qori e dau vakavuna na veimauilavo. (1 Korinica 6:9, 10; Efeso 5:3, 5) Era rawaka na dauveimauilavo ena nodra buno eso tale, ia e vakatabuya na iVolatabu na kocovi ni nodra iyau eso tale.—Lako Yani 20:17; Roma 7:7; 13:9, 10.

• Ke mani veimautaki mada ga e dua na ilavo lailai, na veimauilavo e rawa ni vakavuna na lomani ni ilavo kei na rusa.—1 Timoci 6:9, 10.

• Era dau nuitaka na dauveimauilavo na kaukaua vuni se ivurevure ni kalougata e okata na Kalou me ivalavala ni qaravi matakau, e veisaqasaqa kei na ivalavala ni sokalou e vakadonuya.—Aisea 65:11.

• E sega ni uqeta na iVolatabu na kanabuta, e veiuqeti ga ena cakacaka vakaukaua. (Dauvunau 2:24; Efeso 4:28) O ira na muria na ivakasala vakaivolatabu mera “kania na kakana era dui bunoca.”—2 Cesalonaika 3:10, 12.

• Na veimauilavo e rawa ni vakavuna e dua tale na ka e vakatabuya na iVolatabu, na veiqati.—Kalatia 5:26.