Mataveitacini e Vuravura Raraba

RAUTA ni 1,500 na yabaki nona vakatokai ira na Isireli na Kalou o Jiova mera nona tamata. Oti e qai golevi ira na veimatanitu “me digitaka e dua na ilawalawa me vakatokai ena yacana.” (Caka. 15:14) O ira na vakayacani vua era nona ivakadinadina, e duavata nodra rai kei na ka era cakava, se mani vanua cava era tu kina ena veiyasa i vuravura. Nodra duavata e vakayacori kina na itavi e lesia o Jisu vei ira na nona imuri. E kaya: “O koya gona, ni lako moni vakavulici ira na lewe ni veivanua kece ga mera tisaipeli, ni papitaisotaki ira ena yaca i Tamada kei na Luvena kei na yalo tabu, vakavulici ira mera muria na ka kece au vakarota vei kemuni.”—Maciu 28:19, 20.

² Ni o yalataka nomu bula vei Jiova mo papitaiso, o sa dua na tisaipeli i Jisu Karisito. O sa mai lewe ni mataveitacini e vuravura raraba, e sega ni tawasei ira na duidui matatamata, vakayavusa, se ivakatagedegede ni bula. (Same 133:1) Oya na vuna o lomani ira kina, o dokai ira tale ga na nomu itokani lotu vaKarisito ena ivavakoso. Eso era duikaikai, e duidui nodra ivakatagedegede ni vuli, o sega ni tadra ni o mai maliwai ira. Ia e vakaduavatataki keda noda veilomani vakaveitacini, e kaukaua sara mai na mataqali veiwekani kece, me vaka na veiwekani vakacakacaka, veiwekani vakalotu, se veiwekani vakadra.—Mari. 10:29, 30; Kolo. 3:14; 1 Pita 1:22.

VEISAU NA RAI

³ Ke dredre mera biuta eso na veivakaduiduitaki vakamatatamata, vakapolitiki, se so tale na ka e dau vakavuna na veivakaduiduitaki sa vakawakana tu, ena yaga mera vakasamataki ira na lotu vaKarisito taumada era Jiu, ni vinakati mera cavuraka na yalo ni veivakaduiduitaki nira raici ira na kai veimatanitu. Ni bera ni vunau o Pita vua na turaganivalu ni Roma o Konilio, e vakarautaki koya vinaka o Jiova.—Cakacaka, wase 10.

⁴ A tukuni vei Pita ena raivotu me vakamatea qai kania eso na manumanu e tawasavasava vei ira na Jiu. Ni sega ni via cakava o Pita na ka e tukuni vua, e qai rogo mai e dua na domo mai lomalagi e kaya vua: “Kua ni tukuna ni dukadukali na ka sa vakasavasavataka na Kalou.” (Caka. 10:15) Ke sega ni rogoca o Pita na vosa qo mai lomalagi, ena dredre me veisautaka nona rai me ciqoma na itavi e vakarau lesi vua, ya me sikova e dua na turaga e kai veimatanitu. E muria o Pita na vosa i Jiova qai kaya vei ira na tu e kea: “Oni kila vinaka ni cala vua na Jiu me veitokani se lako vua e dua tale na matatamata, ia e vakaraitaka vei au na Kalou meu kua ni vakatoka e dua me dukadukali se tawasavasava. Ni o talatala yani au mani lako mai, au sega tale ni lomalomarua.” (Caka. 10:28, 29) Tekivu ena gauna qori nona vakadinadinataka o Pita ni vakadonui Konilio kei na nona vuvale o Jiova.

⁵ A vakamalumalumu o Saula mai Tarisu, e dua na Farisi vuli vinaka, me veimaliwai kei ira e dau sevaka. E kere ivakasala mada ga vei ira. (Caka. 4:13; Kala. 1:13-20; Fpai. 3:4-11) E vinakati tale ga me veisau na rai nei Serikiu Paula, Taionisio, Tamarisi, Filimoni, Onisimo, kei na so tale era vakabauta na itukutuku vinaka mera tisaipeli i Jisu Karisito.—Caka. 13:6-12; 17:22, 33, 34; Fmon. 8-20.

DUAVATA TIKO GA KEI IRA NA TACIDA E VEIYASA I VURAVURA

⁶ Macala ga ni uqeti iko nodra loloma na mataveitacini ena ivavakoso mo volekati Jiova kei na nona isoqosoqo. O raica na loloma kei na duavata era kilai kina na tisaipeli dina i Jisu Karisito, me vaka e kaya: “Au solia vei kemudou e dua na ivunau vou, mo dou veilomani, mo dou veilomani me vaka ga na noqu lomani kemudou. Na ka qo era na kila kece kina ni dou noqu tisaipeli, ke dou veilomani.” (Joni 13:34, 35) O dokai Jiova vakalevu kei na nona isoqosoqo ni o kila ni nodra veilomani na lewe ni ivavakoso e ivakaraitaki ni nodra veilomani na tamata i Jiova ena veiyasa i vuravura! O vakadinadinataka sara ga na vakayacori ni parofisai ena iVolatabu ni nodra kumuni ena iotioti ni veisiga qo o ira mera qaravi Jiova ena veiyaloni kei na duavata.—Maika 4:1-5.

⁷ Sa sega ni caka rawa nikua na duiyaloyalo kei na veisei, o koya gona, o cei e tadra ni na rawa nira vakaduavatataki na lewe ni “veimatanitu kece, veiyavusa, veimatatamata, kei na duivosavosa”? (Vkta. 7:9) Vakasamataka mada na kedra duidui o ira era bula ena veivanua vakavalagi kei ira era muria voli ga na ivakarau ni bula makawa vakavanua. Vakasamataka na nodra duiyaloyalo na veimatalotu era lewena o ira era matatamata vata ga. Kena ikuri sa qai levu ga na yalo ni boletaki vanua, na talawasewase vakapolitiki ena kena ivakatagedegede e sega ni bau laurai vakadua. Ni o vakasamataka na duidui bula vakailavo kei na levu ni ka e vakavuna na duidui ena gauna qo, sa na bau wadrega na kena sagai mera duavata na duikaikai, na duivosavosa, ilawalawa kei na duidui ivakatagedegede ni bula. Ia e rawati ga na duavata ena veitokoni ni Kalou Kaukaua Duadua.—Saka. 4:6.

⁸ Io, sa yaco tiko na duavata. O sa lewe ni mataveitacini ni o yalayala, o papitaiso mo iVakadinadina i Jiova. Ni o marautaka tiko na duavata, e nomu itavi mo vakamareqeta. O na vakayacora qo ni o muria na vosa i Paula ena Kalatia 6:10: “Ni se rawa, meda caka vinaka vei ira na tamata kece, vakauasivi vei ira eda vakabauta vata.” Eda muria tale ga na ivakasala qo: “Moni kua ni cakava e dua na ka ena veileti se yalo ni nanumi koya ga, ia moni yalomalumalumu ena nomuni okati ira na kena vo mera uasivi kemuni, ni oni sega ni kauaitaka ga na ka e baleti kemuni, ni kauaitaka tale ga na ka e baleti ira tale eso.” (Fpai. 2:3, 4) Ke da vulica meda raici ira na tacida vakayalo mai na rai i Jiova, eda na sega ni vakalewa na nodra malumalumu, eda na veiyaloni tiko ga, eda na marautaka tale ga na veimaliwai.—Efeso 4:23, 24.

VEIKAUAITAKI

⁹ E vakaraitaka na vosa vakatautauvata i Paula nira duavata na lewe ni ivavakoso kece, era veikauaitaki, era veitokoni. (1 Kor. 12:14-26) Rairai era tu vakayawa eso, ia e sega ni kena ibalebale nira guilecavi. Ke ra vakacacani eso na tacida, eda na rarawa na kena vo. Ke ra leqa eso se ra vakaleqai ena leqa tubukoso se ivalu se tikoyavavala, ena gu na lomada meda vukei ira vakayalo, vakayago tale ga.—2 Kor. 1:8-11.

¹⁰ E dodonu meda masulaki ira na tacida e veisiga. Eso na tacida era temaki mera caka ca. Eso tale na tacida ena rairai kilai raraba na nodra vakararawataki. Ia e sega ni dau kilai na nodra tusaqati eso ena vanua ni cakacaka, kei na nodra vuvale era sega ni qaravi Jiova. (Maciu 10:35, 36; 1 Ces. 2:14) Eda na kauaitaka kece qo nida mataveitacini e vuravura raraba. (1 Pita 5:9) E tiko tale ga o ira era cakacaka vakaukaua ena isoqosoqo i Jiova, era liu tiko ena cakacaka vakavunau kei na qaravi ni ivavakoso. Era lesi tale ga eso mera raica na noda cakacaka e vuravura raraba. O ira kece qo e dodonu meda dau masulaki ira. Qo e vakaraitaka nida kauaitaki ira dina, eda lomani ira tale ga, ke da sega mada ga ni vukei ira rawa.—Efeso 1:16; 1 Ces. 1:2, 3; 5:25.

¹¹ E vakilai vakalevu ena iotioti ni veisiga qo na tikoyavavala kei na leqa tubukoso me vaka na uneune kei na waluvu. Eda tu vakarau na iVakadinadina i Jiova meda veivuke ena gauna va qo. Ena so na gauna, ena vinakati na veivueti se vakarautaki e levu na iyaya ni vakacoko. Era ivakaraitaki vinaka ena tikina qo na lotu vaKarisito ena imatai ni senitiuri. Era nanuma na ivakasala i Jisu na tisaipeli mai na veivanua, ra qai vakauta na ka ni veivuke vei ira na veitacini mai Jutia ena gauna ni dausiga. (Caka. 11:27-30; 20:35) E tuvanaka na yapositolo o Paula na cakacaka ni vakacoko qo me rawa ni cicivaki vakamatau. (2 Kor. 9:1-15) Ena gauna qo, e totolo sara me veivuke na isoqosoqo kei na lotu vaKarisito yadua ena leqa tubukoso.

CAKAVA NA LOMA I JIOVA

¹² E tuvanaki ena isoqosoqo i Jiova e vuravura raraba me cakava na lomana. Ena gauna qo, se inaki tiko ga i Jiova me vunautaki na itukutuku vinaka ni nona Matanitu me ivakadinadina ina veimatanitu kece. (Maciu 24:14) Nida vakayacora tiko na itavi qo, e vinakata o Jiova me salavata noda ivalavala kei na nona ivakatagedegede savasava. (1 Pita 1:14-16) Meda vakamalumalumutaki keda vei ira na tacida, da qai duavata ni tukuna na itukutuku vinaka. (Efeso 5:21) Qo na gauna meda vakaliuca kina na Matanitu ni Kalou, e sega ni gauna meda qara kina na ka me noda. (Maciu 6:33) Nida nanuma tiko qo da qai cakacaka ena duavata ena vuku ni itukutuku vinaka, eda na marau, eda na rawata tale ga na bula tawamudu.

¹³ Eda duatani na iVakadinadina i Jiova, nida savasava da qai gumatua ni qarava na Kalou. (Taito 2:14) Eda duatani na ivakarau ni noda sokalou na tamata i Jiova. Eda sega ni cakacaka vata wale ga kei ira na tacida mai na veiyasa i vuravura, eda vosataka tale ga e dua ga na vosa ni ka dina qai salavata noda bula kei na ka dina eda tukuna. E parofisaitaka qo o Jiova ena gusu i Sefanaia na parofita: “Au na qai veisautaka na nodra vosa na lewe ni veivanua me vosa savasava, mera masuta kece na yaca i Jiova, mera qaravi koya ena duavata.”—Sefa. 3:9.

¹⁴ E qai uqeti Sefanaia o Jiova me vakamacalataka na mataveitacini e vuravura raraba nikua: “O ira na vo ni Isireli era na sega ni cakava na ka tawadodonu, era na sega ni tukuna na ka lasu, se kune e gusudra na yame veivakaisini, era na kana era na davo, ena sega ni dua e vakarerei ira.” (Sefa. 3:13) Nida vulica na vosa ni Kalou da qai vakavouya noda vakasama kei na ivakarau ni noda bula me salavata kei na nona ivakatagedegede, eda na cakacaka vata kina ena duavata. Eda rawata kina na veika e sega ni vakabauti vakadua mai na rai vakatamata. Io, eda duatani na tamata ni Kalou, nida vakalagilagi koya e vuravura taucoko.—Maika 2:12.