Veika e Tukuna o Jiova ena Yaco Dina

“SAI au na Kalou, ka sa sega tale e dua: sai au na Kalou, ka sa sega e dua me keirau tautauvata kaya, ka’u sa dautukuna na kenai vakataotioti mai na kenai vakatekivu, ia mai na gauna eliu ka’u sa tukuna na ka sa bera ni caka.” (Aisea 46:​9, 10) E cavuta na vosa oqori o Jiova ni kila vinaka na veika e se bera ni yaco.

Sega ni kurabuitaki nona sega ni rawa ni tukuna vakailiu na tamata na veika ena yaco. E ivola ni parofisai na iVolatabu, dodonu gona me uqeti ira na via kila na ka dina mera vaqaqa se vakavuna dina na iVolatabu na Kalou. Meda dikeva mada e so na parofisai vakaivolatabu era yaco dina.

Veiliutaki ena Gauna Makawa

A parofisaitaka na Kalou ni ratou na vakarusai tawamudu o Itomi, Moapi kei Amoni. (Jeremaia 48:42; 49:​17, 18; 51:​24-​26; Opetaia 8, 18; Sefanaia 2:​8, 9) Nodra kawaboko vakadua na kena kawa e vakadeitaka na dina ni parofisai ena iVolatabu.

Ena rairai kaya e dua ni rawa nida tukuna kece vakailiu ni na vakarusai e dua na matanitu se mani vakacava sara na kena kaukaua. Ia, e lecava o koya oqori ni iVolatabu a vakamacalataka e levu tale na ka e vauca na veivakarusai. Kena ivakaraitaki, a vakamatatataka se na vakabalei vakacava o Papiloni. A vakamacalataka tale ga nira na ravuravu na kai Mitia, era na kabakoro na sotia i Sairusi qai vakadivai na kena uciwai.​—Aisea 13:​17-​19; 44:27–45:1.

Ia, sega ni dau tukuni tu ga ena iVolatabu na rusa tawamudu ni dua na matanitu se matatamata. Vakadinadinataki oqori ena gauna a parofisaitaki kina nira na vakarusai Jerusalemi na kai Papiloni, a tukuna na Kalou ni na vakalesui tale na koro ina kena ituvaki taumada, dina ga ni kena ivakarau e Papiloni mera kua ni sereki na bobula. (Jeremaia 24:​4-7; 29:10; 30:​18, 19) A yaco dina oqori, ra se bula tiko ga nodra kawa na Jiu me yacova mai nikua.

A parofisaitaka o Jiova ni na vakabalei o Ijipita, ia “ena tawa tale me vaka e na gauna eliu.” Ni toso na gauna, ena ‘vakalolovirataki’ na matanitu rogo oqo. (Jeremaia 46:​25, 26; Isikeli 29:​14, 15, NW) Yaco dina oya. Dua tale na kena ivakaraitaki, a parofisaitaka o Jiova ni na vakabalei na matanitu qaqa o Kirisi, sega ni tukuna ni na kawaboko vakadua. Cava eda vulica ena nodra yali vakadua na matanitu a tukuni nira na kawaboko kei na nodra tiko ga o ira na sega ni tukuni nira na vakawabokotaki? Io, e dina qai nuitaki na parofisai ena Vosa ni Kalou.

iTukutuku Vakatubuqoroqoro

A vakatakila o Jiova e levu na ka e vauca na rusa i Papiloni. Vaka tale ga oqori na ka e tukuni me baleta na rusa i Taia, e tukuna o Isikeli ni ‘na viritaki i loma ni wai’ na kena vatu, kau ni vale kei na kuvunisoso. (Isikeli 26:​4, 5, 12) Yaco na parofisai oqori ena 332 B.S.K., nira vakayagataka na mataivalu i Alekisada na Ka Levu na irusarusa ni koro e vanua, me caka kina e dua na gaunisala me kedrau isema kei Taia e yanuyanu. A qai vakarusai tale ga oqori.

E vakatubuqoroqoro tale ga na parofisai me baleti “tui Kirisi” e vakamacalataki ena Taniela 8:​5-8, 21, 22 kei na 11:​3, 4. Ena vakamatei na iliuliu oqo ena gauna sara ga e toso vinaka tu kina nona veiliutaki qai vidai va nona matanitu, ia ena sega ni soli vei ira nona kawa. Sivi e 200 na yabaki mai na kena volatukutukutaki na parofisai oya, a qai dua dina na tui qaqa o Alekisada na Ka Levu. Kilai mai na itukutuku ni veigauna, ni a mate koso qai vidai va nona matanitu vei ratou na le va nona jenerali​—a sega ni soli dina vei ira nona kawa.

Ra kaya na dauveivakadiloi ni parofisai oqori a rairai volai ni sa yaco oti. Dikeva tale mada na parofisai vata oqori ena ivola i Taniela. E vakasakiti na kena ivakamacala ni dikevi na veika dina e vauca na parofisai. Ke a volai dina na veika oqori ni sa yaco oti qai lasutaki ni parofisai, sega beka ni vakatikina se vovodea ga na kena ivakamacala? Ke via qoroi e dua na dauveivakaisini a bula ni sa mate oti o Alekisada ena nona cavuta na ka e nanumi me parofisai, cava na vuna a sega ni tukuna kina ni rau na saga e rua na luve i Alekisada tagane me rau tauyavutaka nodrau matanitu, ia rau na vakamatei? Cava a sega ni tukuna kina ni ratou na wasea na matanitu i Alekisada na va na jenerali ni oti e vica vata na yabaki? Cava e sega ni cavuta kina na yaca ni tui kei na yacadratou nona jenerali?

Sa tukuni voli mai ena dua na gauna balavu ni parofisai ena iVolatabu era qai volai ga nira sa vakayacori oti, ia oqori e nodra ile ga na sega ni vakabauta ni rawa ni tukuni vakailiu na ka ena yaco, dina ga ni tu na kena ivakadinadina. Ra yavutaka na nodra ivakamacala ena vakasama kei na rai vakatamata, nira sega ni vakabauta ni iVolatabu e Vosa ni Kalou. E veiganiti vinaka na parofisai uqeti vakalou e tu, me vakadinadinataki kina ni Kalou ga a vakavuna na kena volai.a

Ena qaqaco nomu vakabauta ke o vakananuma vakatitobu na parofisai vakaivolatabu kei na kena vakayacori dina. Vakacava mo vulica na parofisai ena iVolatabu? Na kato ena tabana e 200 ni ivola “Na Cava Sara Mada E Kaya Na i Volatabu” ena yaga ena tikina oqo.b Ke o muria na vakatutu oqo, me nomu isausau mo vaqaqacotaka nomu vakabauta. Kua ni wilika vakusakusa, mo rawa ga ni tukuna ni o sa wilika oti. E bibi mo vakananuma vakatitobu na kena dau vakayacori dina na parofisai i Jiova.

[iVakamacala e ra]

[Kato/​iYaloyalo ena tabana e 24]

IVAKAVUVULI YAGA

Dua tale na tikina me vakasamataki. Na Kalou a parofisaitaka nodra cadra kei na nodra bale e so na matanitu qaqa, e ivurevure tale ga ni ivakavuvuli yaga. Oqo e so na kena ivakaraitaki:

Na ka o kaburaka o na tamusuka.​—Kalatia 6:7.

Ka ni veivakalougatataki vakalevu na soli ka mai na taura na ka.​—Cakacaka 20:35.

Vakatau na marau ena kauaitaki ni bula vakayalo.​—Maciu 5:​3, NW.

Ena yaga na ivakavuvuli oqori ke o bulataka.

[iYaloyalo ena tabana e 22]

A parofisaitaki ena Vosa ni Kalou na nona rusa vakadua o  . . .

ITOMI

PAPILONI

. . . ia sega ni o

KIRISI

IJIPITA

[Credit Line]

Pictorial Archive (Near Eastern History) Est.

WHO photo by Edouard Boubat

[iYaloyalo ena tabana e 23]

Alekisada na Ka Levu