Na Rai ni iVolatabu

Na iWali ni Yalolailai

E SEGA ni ka vou ina kawatamata na yalolailai, o keda kece eda dau vakila ena so na gauna. Ia, nira yalolailai vakalevu e so era lai nanuma kina ni vinaka cake mera mate.

E vakaraitaka na iVolatabu ni o ira sara mada ga na tamata yalodina ni Kalou era sotava na leqa kei na ibili e dau vakavuna mera yalolailai. Me kena ivakaraitaki, o Ilaija kei Jope​—erau a marautaka ruarua na nodrau veiwekani vinaka kei na Kalou. Ni dro bula o Ilaija mai vua na ranadi ca o Jesipeli, a “masu [vei Jiova] me mate yani.” (1 Tui 19:1-4) Na turaga yalododonu o Jope a vakila sara ga na veitaravi ni leqa a sotava, wili kina na mate mosi a tauvi koya tu kei na nodratou mate na tini na luvena. (Jope 1:13-19; 2:7, 8) Ena nona yalolailai e kaya kina: “E vinaka cake meu mate niu sotava tu oqo na rarawa.” (Jope 7:15, The New English Bible) E macala ni rau a yalolailai dina o rau na dauveiqaravi yalodina ni Kalou oqo.

E vu ni nodra yalolailai e so edaidai oya na momosi ni yago nira sa qase, ni mate e dua na itokani voleka, se na tarabi ni leqa vakailavo. So tale era vakila ni sega ni oti rawa na leqa era sotava tiko, na kena sega ni seavu na momosi ni ka rarawa e sotavi, se leqa ni vuvale, e vaka sara ga era sasaga bula mai na loma ni wasaliwa, qai dredre me kauti ira mai vanua na ua. E kaya e dua na turaga: “Au vakila ni sega na kequ yaga​—keu yali vakasauri o cei me na liaca. Noqu galili e sega ni kinoci rawa ena so na gauna.”

So na gauna e bau via vinaka cake toka ni lailai ga na rarawa e sotavi. Ia vakacava ke sega sara ga ni veisau na ituvaki? Ena vukei keda vakacava na iVolatabu meda walia kina na yalolailai?

Yaga na iVolatabu

E tu vei Jiova na kila kei na kaukaua me vakabulai rau o Ilaija kei Jope mai na ituvaki dredre rau a sotava voli. (1 Tui 19:10-12; Jope 42:1-6) Sa bau veivakacegui dina oya vei keda edaidai! E kaya na iVolatabu: “A nodai drodro kei na noda kaukauwa na Kalou, sa voleka sara me vukei keda ni da sa rarawa.” (Same 46:1; 55:22) E dina ni vaka meda dau madua nida dau yalolailai, e yalataka o Jiova ni na tokoni keda na ligana imatau sa daudina. (Aisea 41:10) Eda na ciqoma vakacava na veivukei oqo?

E vakamacalataka na iVolatabu ni rawa ni sobuti keda ‘na vakacegu ni Kalou, sa uasivia na ka kece ga e kilai rawa, me vakataudeitaka na yaloda kei na lomada ena vuku i Karisito Jisu’ ke da masulaka. (Filipai 4:6, 7) Nida yalolailai e vaka meda sa sega wale ga kina ni kila na iwali ni noda leqa. Ia ke da “ia tikoga na masu,” ena taqomaka na lomada kei na noda vakasama o Jiova, qai vakaukauataki keda me rawa nida vosota tiko ga.​—Roma 12:12; Aisea 40:28-31; 2 Korinica 1:3, 4; Filipai 4:13.

E vinaka meda tukuna sara ga vakadodonu na noda leqa ena noda dau masu. Ena dredre beka meda tukuna na ka e tu e lomada, ia meda doudou ni tukuna vei Jiova na ka eda nanuma kei na ka eda siqema ni vu ni noda leqa. Meda kerea vua me vakaukauataki keda tiko ga e veisiga. E vakadeitaki vei keda: “Ena vakayacora ko koya na ka era gadreva ko ira era rerevaki koya [Jiova]: ena rogoca talega na nodra tagi, ka na vakabulai ira.”​—Same 145:19.

Me ikuri ni masu, meda kua ni tawasei keda tani mai vei ira na so. (Vosa Vakaibalebale 18:1) E so e seavu na nodra yalolailai ena nodra solia nodra gauna kei na nodra igu mera vukei ira kina na tani. (Vosa Vakaibalebale 19:17; Luke 6:38) Me kena ivakaraitaki o Maria,a e sega wale ga ni tauvi kenisa ia e tarai koya tale ga na mosimosi ni nodratou sa mai leqa e walu na lewe ni nona vuvale ena dua ga na yabaki. Dau saga vakaukaua o Maria me duri mai na nona imocemoce me cakava na veika e tu e dodonu me cakava. Voleka ni veisiga e lai vakavulici ira na tani ena iVolatabu, qai tiko wasoma tale ga ena soqoni vakarisito. Ni dau lesu mai vale, sa qai lomabibi ga vakalevu. Ia, ni vakadeitaka e lomana ni via vukei ira dina na tani, a rawa kina vua me vosota.

Vakacava ke dredre meda dau masu, se sega tale ga vua e dua na yalo ni veimaliwai? Ke vaka oya meda qara e so na veivuke. E uqeti keda na iVolatabu meda “kacivi ira na qase ni soqosoqo lewe ni lotu.” (Jemesa 5:13-16) E kaya e dua na turaga sa balavu mai na nona yalolailai: “E yaga sara ga na noda veitalanoa kei na dua eda nuitaka, e cegu kina na vakasama kei na yalo, qai vakaotia tale ga na rai cala.” (Vosa Vakaibalebale 17:17) Ke sa balavu qai tarabi na noda yalolailai voli de vinaka meda lai qaravi vakavuniwai, ni yaga tale ga meda laurai vei ira na kenadau.b​—Maciu 9:12.

E dina ni sega ni tiko na kena iwali rawarawa, ia meda kua ni beca ni rawa vua na Kalou me vukei keda meda walia na noda leqa. (2 Korinica 4:8) Noda gumatua ena masu, da kua ni tawasei keda tani mai vei ira na so, kei na noda vaqara na veivuke vei ira na kenadau ena vukei keda me dei tale na yaloda. E yalataka na iVolatabu ni Kalou ga ena qai tinia vakadua na veika e dau vakavuna tiko na yalolailai. Era saga na lotu Vakarisito mera vakararavi ga vei Jiova ena nodra waraka tiko na siga me na “sega ni nanumi [tale kina] na ka e liu.”​—Aisea 65:17; Vakatakila 21:4.

[iVakamacala e ra]