Na Rai ni iVolatabu

Cava e Gadrevi Vua na Ulunivuvale?

E KAYA na iVolatabu, “na ulu ni yalewa na tagane.” (1 Korinica 11:3; Efeso 5:23) Ia, e levu vei ira na kaya nira rokova na iVolatabu era vakabauta ni ivakavuvuli me baleta na nona vakatokai o tagane vakawati me ulunivuvale e sega wale ga ni tawaveiganiti ena gauna oqo, ia e rerevaki tale ga. Rau kaya e dua na veiwatini ni “ivakavuvuli me baleta nodra ‘vakarorogo’ na yalewa [vei ira na watidra], ke sega ni yalani, ena rawa ni tini ina veivakacacani vakayago kei na vakacacani ni yalo.” E ka ni rarawa ni vakilai raraba na vakayagataki cala ni veiliutaki oqo. E kaya e dua na dauvolaivola ni “dau kena ivalavala ena levu na vanua mera dau moku na yalewa, na dodonu ni tagane e lagati na kena sere, serekalitaki, qai laurai tale ga ena soqo ni vakamau.”

Era kaya e so ni ivakavuvuli vakaivolatabu oqo e vakavuna sara ga na veivakacacani vaka oqori. E beci beka na yalewa qai vakararawataki tale ga ena ivakavuvuli vakaivolatabu e baleta na veiliutaki ni tagane? Na cava na ibalebale dina ni ulunivuvale?a

Na Ulunivuvale e Sega ni Veivakasaurarataki

Na veiliutaki ni ulunivuvale e vakamacalataka na iVolatabu e ituvatuva e vakilai kina na veilomani, sega ni veivakasaurarataki. Na nona beca ga na lawa ni Kalou na tamata e lai vakavuna na nona vakararawataki yalewa o tagane. (Vakatekivu 3:16) Me tekivu mai na were o Iteni, era sa vakayagataka tiko mai vakatani na tagane na nodra veiliutaki ra qai vakalolomataki ira na marama kei na gone.

Ia, a sega ni inaki ni Kalou oya. O Jiova e dau cati ira na vakayagataka vakatani na nodra veiliutaki. A cudruvi ira na tagane ni Isireli era “cakacaka vakailasu” vei ira na watidra. (Malakai 2:13-​16) E kaya tale ga na Kalou ni na ‘cati koya e ivalavala kaukaua.’ (Same 11:5) Ena sega kina ni rawa vei ira na dau mokuti ira na watidra mera vakayagataka na iVolatabu me tokona na nodra ivalavala voravora.

Cava e Okati ena Veiliutaki Vinaka?

E vakayagataka na Kalou na veiliutaki me rawa kina na tiko vinaka raraba. Vakavo ga na Kalou, o keda kece eda vakarorogo vua e dua. Na tagane e vakarorogo vei Karisito, o ira na gone era vakarorogo vei ira na nodra itubutubu, ra qai vakarorogo na lotu Vakarisito ina matanitu. E vakarorogo tale ga o Jisu vua na Kalou.​—Roma 13:1; 1 Korinica 11:3; 15:28; Efeso 6:1.

E vinakati meda dau vakarorogo vei ira na veiliutaki, me qai rawa kina na tiko vinaka. E vinakati vaka kina na vakarorogo vua na ulunivuvale me qai rawa kina ni kaukaua, mamarau, qai bula vakacegu na vuvale. Ia ena sega ni veisau oqo ke sega ni tiko o tagane vakawati se o tama ena dua na vuvale. Ena vuvale vaka oqori, sa na taura na itutu ni veiliutaki na tina. Ke rau sa yali ruarua na itubutubu, ena taura na itavi ni ulunivuvale na gone e qase duadua se dua na wekadratou. Se mani ituvaki cava e sotavi, ena yaga vei ira na lewenivuvale na nodra vakarorogo vakavinaka vei koya e vakadonui me veiliutaki.

E rui bibi meda kua ni beca na veiliutaki vakavuvale, da qai vulica meda doka vinaka na veiliutaki ni ulunivuvale. Na yapositolo o Paula e vakaroti ira na tagane vakawati lotu Vakarisito mera ulunivuvale, me vaka ga ni “ulu ni soqosoqo lewe ni lotu na Karisito.” (Efeso 5:21-23) E dusia o Paula na ivalavala ni nona veitaratara o Karisito kei na ivavakoso me ivakaraitaki uasivi ni veiliutaki. Na ivakaraitaki cava e biuta tu mai na Karisito?

Dina ga ni Mesaia qai lesi tale ga me Tui ena gauna mai muri, e lesi Jisu sara ga na Kalou, e vuku cake vakalevu qai levu sara na nona kila na bula mai vei ira na nona tisaipeli, ia e dauloloma ga, veikauaitaki, qai dau veinanumi. E sega ni cudrucudru, se me rawai na lomana, se namaka vakalevu na ka. E sega ni viavia lewa se dau sakitaki koya ni luve ni Kalou. E yalorawarawa qai yalomalumalumu o Jisu. Oya na vuna e ‘rawarawa kina na nona ivua, qai mamada na nona icolacola.’ (Maciu 11:28-​30) E rawarawa na veivosaki kei koya qai yalorawarawa tale ga. E kaya o Paula ni levu ni nona lomana na ivavakoso o Jisu e “solia na nona bula e na vukuna.”​—Efeso 5:25, VV.

Rawa ni Muri Vakacava na Veiliutaki i Jisu?

E rawa vakacava mera muria na itovo i Karisito na ulunivuvale? Na ulunivuvale vinaka ena dau kauaitaka na nodra bula vakayago kei na nodra bula vakayalo na nona vuvale. E lomasoli me solia na nona gauna kei na nona kauai vei ira yadudua kei ira kece na vuvale. Ena vakaliuca na veika e gadreva na kena isa kei na ka era gadreva na luvena.b (1 Korinica 10:24; Filipai 2:4) Ni bulataka na ivakavuvuli vakaivolatabu e veisiga o tagane vakawati, ena dokai koya o watina kei ira na luvena. Ni veiliutaki vinaka, era na rawaka vakalevu na lewenivuvale nira saga vata mera walia na veileqa e tubu mai. Ni muria na veiliutaki e vakaraitaka na iVolatabu, ena tara cake o tagane vakawati na vuvale e mamarau e vakalagilagia qai vakacaucautaka na Kalou.

Na ulunivuvale vuku e yalomalumalumu tale ga. Ena dau kere veivosoti ena gauna e gadrevi kina, dina ga ni na via dredre me vakaraitaka ni a cala. E kaya na iVolatabu ni rawa na tiko vinaka “ni ra lewe vuqa na daubose.” (Vosa Vakaibalebale 24:6) Io, ni yalomalumalumu na ulunivuvale, ena dau rogoca qai kerea tale ga na nanuma i watina vaka kina o iratou na luvena ke gadrevi. Ni vakatotomuri Jisu, ena raica na ulunivuvale lotu Vakarisito ni nona veiliutaki ena sega wale ga ni vakamarautaka na nona vuvale, ia ena rokovi qai vakalagilagi tale ga kina o koya e tauyavutaka na vuvale, na Kalou o Jiova.​—Efeso 3:14, 15.

[iVakamacala e ra]

[iYaloyalo ena tabana e 28]

Na tagane vakawati e yalorawarawa e dau kauaitaka na nanuma i watina kei iratou na luvena