Sa Volai Niu na Raici Koya Tale

Talanoataka o Rosalía Phillips

“O na rogo! E tiko vei iko na kena taledi!” Oqori na ka e tukuna vei au na neitou dairekita ni matasere ni dabe toka ena nona piano ni vo ga e vica na sekodi me keitou vakaitavi. Ratou vakabula tale ga mai vei au na lewe va keitou na vakaitavi vata tiko. Au vakavinivo damudamu cacalivaliva, au se qai lewena vou tale ga na matasere oqo, meu nodratou daunilagasere. Au taqaya. Vakauasivi ni keitou vakaitavi tiko ena dua na vale ni vakatasuasua kilai levu ena korolevu o Mexico, e se qai imatai tale ga ni noqu vakaitavi, meu tekivutaka kina na noqu cakacaka ena buturara ni veivakamarautaki! Oqo ena Maji 1976, sa vo ga e dua na vula meu yabaki 18.

A LEQA o tamaqu ena tolu na yabaki yani e liu, ia e sega ni seavu na noqu vakananumi koya. Era nanumi koya vinaka tale ga na lewenivanua. Era dau taleitaki koya, ra divi koya tale ga baleta ni a dua na dauvakalasalasa rogo ena neitou vanua, qai vakaraitaki ena 120 taucoko na iyaloyalo yavala, donuya na gauna e toso vinaka sara tu ga kina na tabana ni caka iyaloyalo e Mexico. Na yacana o Germán Valdés, e nona ikacivi tale ga o “Tin-Tán,” e dau volai na yacana ena valelaca ni vakatasuasua ena veivanua kece e Amerika e Loma, Sauca Amerika, vaka kina na veivanua e vosa vakasipeni e Mereke kei Urope. Ena gauna mada ga oqo, e dina ni sa oti e 30 na yabaki nona sa takali, ia e se dau vakaraitaki tiko ga na nona iyaloyalo.

Niu se goneyalewa lailai sara, e dau nodra isosoqoni na rogo ena veivakamarautaki na neitou vale. Ratou a tauyavutaka e dua na matasere o tinaqu kei na rua na tacina qai yacadratou na Las Hermanitas Julián (Na Veitacini na Julián). Na ganedratou o Julio Julián e kilai levu e Urope ni daulagasere ni opera, e marama ni Sipeni na watina, e yacana o Conchita Domínguez, e dau solo. Rau kilai levu tale ga na tamaqu lalai ni rau dau vakaraitaki ena porokaramu lasa ni retioyaloyalo, o Manuel “Loco” (dau vakatokai me o Kisitoni) Valdés kei Ramón Valdés, dau kilai levu tu me o Don Ramón.

E sega gona ni ka vou vei au kei ganequ, o Carlos, na vanua ni caka iyaloyalo se vanua ni veivakamarautaki, vaka kina na vanua e dau caka kina na katokatoni, baleti ni dau kauti keirau sara tu ga o Tata ni lai cakacaka se na vanua cava ga e lai veivakamarautaki kina; na sala tale ga oqori keitou duavata tiko ga kina vakavuvale. Sa bau veibasai sara ga na neitou bula e vale, ni kunei kina na veilomani kei na duavata, meu qai vakatauvatana kei na bula vovodea e dau laurai ena kedra maliwa na dauniveivakamarautaki! Au nanumi tamaqu vinaka tu ga ni dauloloma, e bulabula qai marautaka na bula. Sa rui dau yalovinaka, ena so na gauna sa sivia tale. E vakavulici au o Tata niu na kunea ga na marau keu dau soli ka, sega ni noqu taukeni ira tu.

Dua na Veisau Rarawataki

Ni vakarau cava na 1971, a vakasavuya o Nau vei keirau vakaveiganeni e dua na itukutuku rarawataki, ni sa kune vei Tata e dua na mate levu qai sega na kena iwali. E dua veimama taucoko na yabaki noqu raica voli na nona rarawa ena nona saga me vosota na kaukaua ni wainimate e gunuva tiko.

Au sega ni guilecava rawa na siga sa mai kauti Tata kina na lori ni valenibula me lai curu. Vaka meu kila ni na sega ni lesu tale mai. Au sega ni vakamacalataka rawa na levu ni noqu rarawa. Au qai nanuma ni dodonu tale ga meu rarawa me vaka ga nona rarawa tiko o koya. Au mani bokoca kina e ligaqu na tavako, oti au sa qai mai sorova yani na tagi. E qai leqa o tamaqu ena 29 June, 1973. Au vaqaqa lo: ‘Na cava e biuti keitou kina e dua na turaga vinaka vaka oqo, e vu ni neitou marau? E vei beka sa tu kina? Ena rawa beka ni rogoci au keu vosa vua? Ena vakainaki beka noqu bula ni sa takali o Tata?’

Na Cakacaka e Sega ni Vakainaki

Ni sa via mamada na noqu lolosi, au a vulica na cakacaka ni ukutaki vale. Ia, au dau gone be, mani tini koso tu kina na noqu vuli. Keirau sa nanuma tale ga kei Nau me keirau sa tekivu veimaliwai mada vakalevu. Mani keirau dau lakova na nodra soqo lelevu na dauniveivakamarautaki. Levu na gauna e dau tinia o koya e veisureti ena nona kaya vaka oqo, “Rosalía, lagata mada e dua nomu sere.” Ra dau taleitaka na domoqu kei na kena dau vu sara ga mai lomaqu na noqu lagasere, ra kaya tale ga ni taledi oqo e dewa ga mai vei rau noqu itubutubu.

Ena dua gona na soqo vaka oqori, a rogoci au kina na dairekita kei na dauvola sere ni ilawalawa e vakatokai na “Arturo Castro and His Castros 76,” qai sureti au meu lewena tale ga na matasere oqori. Au a sega ni taleitaka. E dina niu dau taleitaka na ivakatagi kei na qiri qita, au dau vola sere tale ga niu se qai yabaki 14 ga, ia e sega ni lomaqu me noqu cakacaka tudei. O tinaqu ga a uqeti au, me bau rawa tale ga niu veivuke ena isau vakailavo ni ivakatagedegede ni bula keitou toka kina, au sa mani vakadonuya. Oqori na gauna au vakamacalataka tiko ena iucu ni noqu italanoa.

Levu na itavi ni veivakamarautaki e donui au mai na gauna ga au tekivu kina. Keitou wavokiti Mexico vakamatailawalawa, me keitou lagasere vakarua ena dua na bogi. Keitou lako tale ga i Guatemala, Venezuela, vaka kina e Niu Yoka, kei Las Vegas, e Mereke. Rua na yabaki na noqu tiko vata kei na matasere oqo. Oti au sa qai sureti meu dau vakaraitaki ena iyaloyalo yavala. Rua na iyaloyalo au ivukevuke ga kina, ia e dua au vakaraitaki sara ga kina, qai noqu kina e rua na icocovi levu.

Dua na siga ratou a qiriti au mai na kabani levu ni retioyaloyalo e Mexico. Ratou vinakata me keitou veidinadinati meu na cakacaka vakatabakidua vei ratou, oya meu vakaraitaki ena dua nodratou porokaramu ni iyaloyalo se soap opera, me na vakayacani vei au. Na veisureti tale ga oya e rawa ni tosoi au cake meu dua vei ira na kilai ena buturara ni veivakamarautaki. Au na rawata kina e levu na ilavo, keu vakalutu cakacaka mada ga. Niu nanuma ni sega ni ganiti au, au qai leqataka tale ga ni na yalana na noqu gauna galala, au mani vakasuka. Ia, au vakadonuya meu vakaitavi vakalailai ena porokaramu ni iyaloyalo oya, me rawa ga niu tomana kina na noqu vulica tiko na ka ni veivakamarautaki ena univesiti. Ia, au sega ga ni vakila na marau. Dua na ka na kena ca vei au niu raici ira e so na dauveivakamarautaki era sasaga tu ena vica vata na yabaki me rawa nira digitaki mera vakaraitaki ena dua na iyaloyalo, ia e qai dulaki vei au​​—baleta wale ga niu luve i Tin-Tán.

Oti au sa qai dewa ina katokatoni. Me kena imatai, na katoni ni ivakatagi ni soap opera, au tuva na qaqana kei na kena ivakatagi. E muri, au sa qai lai katokatoni ena dua na vale ni katokatoni kilai e Lodoni. Levu tale na ka au katona, au vakaitavi tale ena so na iyaloyalo yavala kei na soap opera. So na kequ italanoa era dau ulu ni itukutuku e tabaki ena niusiveva ena tabana ni veivakamarautaki, au rawa beka ni tukuna niu sa yacova toka e dua na ivakatagedegede vinaka. Ia, au vakila ni se yali tiko ga e dua na ka. Au dikeva ni levu vei ira na dauveivakamarautaki era tamata sega ni dau veinanumi, ra qai dau veisisivi, levu na itovo vakasisila era cakava, ra sega tale ga ni dau dina. Sa oti sara ga noqu veinuitaki.

Ena vulaibotabota ni 1980, au raici Momo Julio ena dua na neitou soqo vakavuvale. Sa vakatulewataka o koya me sa na vakacegu mai na nona daulagasere, e vakamacalataka tale ga vei au ni dua na parataisi e yalataka tu na Kalou. E kaya o Momo ni na vakaoti e vuravura na veivakalolomataki kei na rarawa, me na qai vakilai duadua ga na loloma. E kaya tale ga ni yaca ni Kalou dina o Jiova. E talei vakalevu vei au noqu rogoca nira na vakaturi tale na noda dau lomani ena Parataisi. Au marautaka niu na rawa ni raici Tata tale. Au sega ni guilecavi koya rawa, qai dua na ka noqu dau diva na nona veitokoni kei na nona loloma. Ena marautaki dina nona sa na lesu tale mai! Ia, e vaka ga me dredre vei au meu vakabauta ni na yaco na veika oqori. A solia vei au o Momo Julio e dua na iVolatabu qai sureti keirau vakaveitinani ina dua na nodra soqo ni tikina na iVakadinadina i Jiova ena caka tiko ni oti ga e vica tale na macawa. Keirau kaya vua ni keirau na rairai tiko kina.

Au Vakatulewataka Meu Veisautaka na Noqu Bula

Dua na bogi, au a kana tavako toka ena noqu loga, ia ena gauna vata oqori au a wilika tiko kina na iVolatabu e solia o Momo. Au raica rawa ena ka e tukuna na Vosa Vakaibalebale ni vakavuna na Kalou na rarama, kilaka, kei na bula, ia na butobuto, veilecayaki kei na mate e duatani na vanua e vure mai kina. Na bogi ga oqori au bokoca kina na iotioti ni kequ tavako meu sa kolotaka na kena vatu, au mai waraki tinaqu toka yani. Au kerea tagitagi vua me tokoni au ena so na vakatulewa bibi au sa na vakarau cakava. Oti au sa qai lako ina vale ni caka iyaloyalo, au vakatovotovotaka tiko kina na itavi i Cordelia ena dua na drama nei Shakespeare na King Lear. Au vakasuka na itavi oqori, au qai tagutuva noqu veikilai kei na noqu itau, e dua sara ga vei ira na vakaraitaki tiko ena drama oqori.

Ia, au se sega tale ga ni qaravi Kalou ena gauna oqori, sega gona ni dua meu na vakararavi vua. Tarai au na lomabibi levu. Au masulaka vua na Kalou ke rawa ni vukei au meu bau vakila mada niu ciqomi ena vuku ni ka au rawata, e sega ni baleta na nodrau taledi na noqu itubutubu se mai na noqu kilai. Au mani vakuai au mai vei ira na noqu ilawalawa, vaka kina mai na veika au a dau vakaitavi tu kina.

Na Sala Dina ni Rawaka

Na gauna sara ga au veilecayaki tu kina vaka oqori, au nanuma lesu na nona veisureti o Momo ina soqo ni tikina. Au qiriti koya, a qai mai kauti au ena rara e vakayacori tiko kina na soqo. E tarai au sara ga na ka au raica e kea, na nodra vakaitovo na lewenisoqo, ra sega ni vosa ca se kana tavako, se ra via veirawai. Na ka au rogoca mai na iVolatabu au lai nanuma lesu kina noqu a wilika e dua na ivola lailai, Is the Bible Really the Word of God?a au a kunea ena neitou vale ni leqa oti toka ga vakalailai o tamaqu.

Na gauna vata oqori au a sureti kina meu vakaraitaki ena dua tale na soap opera. Au taleitaka na itavi e soli vei au, baleta ni tokona vinaka na itovo vakalou au se qai vulica oti ga ena soqo ni tikina. Au mani vakadonuya sara na veisureti oqori. Ena yasana adua, e votu tiko ga mai ena noqu vakasama na tikinivolatabu oqo: “Ni kakua ni cakacaka vata kei ira na tawa vakabauta . . . E rau veitokani vakaevei na rarama kei butobuto?”​​—2 Korinica 6:14, VV.

Sa tubu tiko e lomaqu na noqu gadreva meu vakamarautaka na Kalou. Au mani via lakova e dua na soqoni ena Kingdom Hall vata kei rau o Momo kei Nei. E dina ni rauta ni dua na aua na levu ni gauna e taura meu biuta mai na neitou vale ina nodrau ivavakoso, ia au lako ena tolu na Sigatabu e veitaravi. Mani nanuma o Momo me kauti au ena dua na ivavakoso e tiko ga ena noqu yasayasa. Keirau yaco yani sa oti tiko na soqoni, keirau veikilai sara kei na dua na goneyalewa keirau itabavata, o Isabel. E yalomalua qai yalovinaka. Na gauna e vakaveikilaitaki keirau kina o Momo qai tukuna ni yacaqu o Rosalía Valdés, a sega ni bau via kauai vakalailai ena yaca oqori. Au taleitaka sara oya. E sureti au me keirau lai vuli iVolatabu sara ga ena neitou vale.

Keirau tekivu vuli ena ivola Na Ka Dina sa Basika ki na Bula Tawamudu.b E tu vakarau o Isabel me muria na noqu ituvatuva ni cakacaka. So na gauna e dau wawa sara tu me bogilevu, me oti noqu vakaitavi ena soap opera. Dua na ka na noqu marautaka niu vakila ni taleitaki au o Isabel ena vuku ga niu via vulica na ka dina vakaivolatabu! E dau vosa vakadodonu, dau dina, e itovo vakamarama, na ivakarau au dau nanuma ni na rawati ga ke vulici na filosofi kei na art. Keirau tuvanaka me vakabalavutaki na neirau vuli, so gona na gauna ena caka vaka vica vata ena dua na macawa.

Na gauna se qai tekivu kina na noqu vuli iVolatabu, e dau dredre meu biuta tani na noqu rai cala, ia na ka dina ga vakaivolatabu sa qai veisautaka tiko vakamalua. Au nanuma lesu na kena vakayaloqaqataki au nona yalataka na Kalou: “Malua mada vakalailai, ena qai takali na tamata ca; io, ko na vakananuma na nona yasana, ia sa na yali kina ko koya. Ia ko ira na yalomalumalumu era na taukena na vanua; ka na daumarau tiko e na veivakacegui vakaidina.” (Same 37:​10, 11) Ena gauna vata oqori sa vaka meu vakabauta dina kina na inuinui niu na rawa ni raici Tata tale ena Parataisi. Au dau vakasamataka vakalevu na vosa i Jisu: “Dou kakua ni kurabui e na ka oqo: ni sa lako mai na gauna era na rogoca kina na domona ko ira kecega e nai bulubulu, a ra na lako maikina; ko ira sai valavala vinaka, era na tu cake tale me ra bula.”​​—Joni 5:​28, 29.

Na gauna ga e oti kina noqu itavi ena soap opera, a levu tale na veisureti e yaco mai vei au meu vakaraitaki ena iyaloyalo. Dina niu na rawa ni rogo kina, ia ena okati e kea na noqu tokona na itovo vakasisila, sokaloutaki ni matakau, kei na so tale na ivakavuvuli lasu. Au sa vulica ni tiko dina o Setani, qai sega ni vinakata meda qaravi Jiova. Au vakasuka kece gona na veisureti oqori, au sa tekivu lakova tale ga na soqoni. Me vaka ga e namaki, erau sega ni taura rawa o tinaqu kei ganequ na vu ni noqu vakasuka na veisureti kece oya, ni dua na tama ni ilavo levu au na rawata kina. Ia, erau sa raica sara tale tiko ga ena gauna vata oqori na kena sa veisau na noqu bula. Au sa veisau mai na dua e dau rarawa qai yalolailai, ina dua e sa mamarau qai bulabula. Sa qai vakainaki dina tu na noqu bula!

Sa lomaqu meu wasea yani vei ira na tamata na veika au sa vulica tiko, au mani dua sara na dautukutuku ni Matanitu ni Kalou. So na gauna niu lai vunau, e dau dredre mera vakarorogo dei vei au na itaukeinivale nira kilai au ga niu dua na dauveivakamarautaki. Vica vata na gauna ni keirau yaco yani ena dua na vale kei na noqu itokani ni cakacaka vakavunau, e vakaraitaki sara tiko ga ena retioyaloyalo na soap opera au vakaraitaki kina. Ra dau sega ni vakabauta na itaukeinivale niu sa duri tu ena nodra matanikatuba!

Au a papitaiso ena 11 Sepiteba, 1982, meu vakaraitaka noqu yalayala vei Jiova. Sa qai vakainaki na noqu bula, e duatani tale ga na cakacaka sa tu e mataqu meu na cakava. E uqeti au na nona gugumatua o Isabel ena cakacaka vakavunau. A painia tudei, na yaca era vakatokai kina na iVakadinadina i Jiova era cakacaka vakaitalatala vakatabakidua. Sega ni dede au sa tomani koya ena caka vuli iVolatabu. Yaco o Isabel me noqu itokani voleka duadua.

Au sa biuta kece na noqu cakacaka ni dauveivakamarautaki, keirau sa bula rawarawa ga kei tinaqu. Ena gauna vata tale ga oqori au vola kina e so na sere me biu ena ikava ni noqu katokatoni, so vei ira e baleta tiko noqu bula kei na noqu vakabauta vou. Au vola e dua na sere me baleta na inuinui dei niu na raici tamaqu tale. Au vola me yaca ni sere oqori “Sa Volai​​—Niu na Raici Koya Tale.” E tarai tinaqu sara ga na noqu lagata vua ena imatai ni gauna. E vakila o koya niu vakabauta dina. Dua na ka noqu marau ni sa via vulica na iVolatabu. Ni oti tale e rua na yabaki, a papitaiso me dua na dauveiqaravi i Jiova. E gumatua tu ga ena cakacaka vakaitalatala me yacova mai nikua.

Ni toso na gauna, sa sega ni dredre vei au meu vakasuka e dua na veisureti ni cakacaka. Niu vakatovolei se temaki, na noqu raitayaloyalotaki Tata kei na neitou sa na tiko vata kece ena parataisi totoka, e dau vakadeitaka na yaloqu meu gumatua tiko ga na qaravi Jiova.

Dua na siga au a kerei meu vakaraitaki ena dua nodra porokaramu na gonelalai na Sesame Street, ena kena vakasipeni. Au nanuma niu na sega ni rawa ni vakaraitaki kina, au qai tukuna vei koya e vakarautaka na porokaramu oya niu na sega ni tokona na veiolodei kei na siganisucu ena caka tiko kina, baleta ni veisaqasaqa kei na ivakavuvuli vakaivolatabu. E mani kaya sara o koya keu ciqoma na nona veisureti, ena doka na noqu vakabauta, keirau na sainitaka tale ga kina e dua na veidinadinati me vakamatatataki kina na tikina oqori. Au mani ciqoma qai 200 taucoko na levu ni iyaloyalo ena porokaramu oya au vakaraitaki kina. Oqo tale ga sa iotioti tiko ni gauna au vakaraitaki kina ena iyaloyalo.

Ia, sa qai vo wale sara tiko ga e dua na veidinadinati kei na dua na kabani ni katokatoni; au katona kina e tini noqu sere, wili kina na kena au vola me baleti tamaqu vaka kina na veivakaturi. A rawa vei au meu lagata na sere oqo ena retioyaloyalo kei na gauna au dau vakaraitaki kina ena iyaloyalo, au dau tukuna tale ga kina na noqu vakabauta. Ia, eratou dau uqeti au na kabani ni katokatoni me bau veivagarogaroi toka na kequ irairai. E keri tale ga au sa solia kina na noqu ivola ni kere vakacegu.

Vakalougatataki ena Cakacaka ni Kalou

Au a gade kei Isabel ina itikotiko liu ni iVakadinadina i Jiova mai Brooklyn, e Niu Yoka, ena Tiseba 1983. Au sotava kina e dua na turaga, o Russell Phillips, a yaco me qai watiqu. Keirau veivolavolai tiko me rauta ni rua na yabaki. Au se nanuma vinaka tu ga oqo na siga au tekivu cakacaka kina vakapainia tudei​​—ni a vakau rosi mai vei au o Russell mai Niu Yoka!

Dua na yabaki neirau painia vata tiko kei Isabel. Sa qai sureti me lai veiqaravi ena valenivolavola ni tabana ni iVakadinadina i Jiova e Mexico. Ni dau wewenigusuna na veika e baleta nona ilesilesi vou, e uqeti au gona meu vakalevutaka noqu cakacaka vakaitalatala, ke inaki i Jiova, meu na veiqaravi tale ga e Peceli.

E dua tale na vu ni veivakalougatataki vei au o Russell. Ena vuku ni nona lomani Jiova kei na nona isoqosoqo, au sa mai vulica kina meu vakamareqeta na cakacaka vakatabakidua. E taleitaka na cakacaka e Peceli, ni tolu na yabaki nona a veiqaravi tu e Peceli, e Brooklyn. Ni keirau sa vakamau oti, keirau painia tudei ruarua sara e Colorado, e Mereke. E muri, keirau sureti ina tara ni valenivolavola ni tabana vovou e vanuatani. Keirau kurabui vakalevu ni keirau lesi sara ga i Mexico! Ena Epereli 1990, keirau marau ni ciqoma na veisureti me keirau sa lewenivuvale e Peceli e Mexico. E uqeti au vakalevu na ivakaraitaki i Russell. Au qoroya na yalo ni soli koya e tu vua, ni uqeti koya me biuta nona vanua kei na nona vuvale me mai veivuke ena kena tosoi na cakacaka ni Matanitu ni Kalou ena vanua oqo o Mexico.

Keirau marautaka vakalevu kei Russell neirau veiqaravi ena valenivolavola ni tabana e Mexico. Ia, e veisau vakasauri na ituvaki ena gauna au sa tikobibi kina. Keirau kurabuitaka ruarua. Ia, dua na ka na neirau dau qoroi ira na itubutubu era tuberi luvedra mera muria na sala ni ka dina, keirau mani ciqoma ni sa neirau ilesilesi vou oqo. A sucu o Evan ena Okotova 1993, qai sucu o Gianna ni oti tale e rua veimama na yabaki. Dina ni ka ni sasaga toka nodra tuberi na gone, ia keirau vakila ni sa yaga tiko na neirau sasaga ena veigauna kece erau vakamacalataka kina na gone na nodrau vakabauta ni rau vakaitavi ena cakacaka vakaitalatala. E dua sa yabaki 11, dua tale e yabaki 8.

Ena gauna oqo sa veiqaravi tiko o Russell ena Kingdom Hall Regional Building Committee, au se qai tomana wale ga oqo na noqu cakacaka vakaitalatala vakatabakidua se meu painia. Ena 20 na yabaki sa sivi, au sa bau vukei ratou e lewe 12 na wekaqu, vaka kina e lewe 8 tale mera vulica na ka dina mai na iVolatabu, mera mai qaravi Jiova tale ga.

Ni rau dau tarogi au na gone, “Na, a dredre vei iko mo biuta na nomu dauveivakamarautaki?” Au dau cavuqaqataka ga na vosa ni yapositolo o Paula: “Au sa okata me sega ni yaga na ka kece ga e na kena talei na kilai Karisito Jisu na noqu Turaga. Au sa biuta tani na ka kece ga e na vukuna; au sa okati ira kece ga me ra de ni manumanu, me noqu kina na Karisito.” (Filipai 3:8, VV) Au vakavinavinaka vakalevu ni a vakabulai au o Jiova mai na dua na bula tawayaga, e sega ni vakainaki, meu qai wili vata kei ira na nona matatamata mamarau! Au sega vakadua ni oca na vakavinavinakataka vua na levu ni veivakalougatataki e vakarautaka ena vuku i Luvena, o Jisu Karisito. Au dau marau ni lagata na sere au a vola me baleti Tata. Au nuidei niu na raici koya tale.

[iVakamacala e ra]

[iYaloyalo ena tabana e 26]

O rau na noqu itubutubu kei keirau na veiganeni, niu se qai yabaki dua

[iYaloyalo ena tabana e 28]

Au lagasere tiko kei Arturo Castro kei ratou na Castros 76

[Credit Line]

Angel Otero

[iYaloyalo ena tabana e 30]

O keitou vakaveiluveni, nikua

[iTaba ni Credit Line ena tabana e 26]

Activa, 1979