Era na Veivuke Vakacava na iTubutubu?

E UQETI ira na gonevuli ena sekeneri e dua na tabacakacaka ni vuli mai Mereke: “Tu vakarau mo solia nomu vinaka taucoko.” Nodra saga mera rawata nodra isausau, eso gona na gonevuli era cakava kina vakasivia na ka. E vola o Madeline Levine, sa vakamacalataki ena ulutaga sa oti: “Na vuli e kovuti kina e levu na lesoni, veika tale eso e caka ni oti na vuli, so tale na kalasi me vakarautaki ira ina sekeneri, eso na nodra dauniveivakavulici ena qito kei ira na qasenivuli era veivakavulici ni oti na vuli mera taura tale eso na kalasi, era tini osooso kina e levu na gonevuli qai rawa ni ririkotaki kina nodra bula.” E rawa sara ga ni vakaleqa na nona bula vakayago kei na lomana e dua na gonevuli.

Ke o dau leqataka na lomaocaoca i luvemu e koronivuli, mo gole sara ga i koronivuli. Veivosakitaka na ituvaki qo kei ira na qasenivuli, daunivakasala e koronivuli, kei ira na veiliutaki tiko. E tu vei iko na dodonu mo tukuna vei ira na ka o sa dikeva rawa.

E uqeti ira na itubutubu na iVolatabu mera vakaraica matua na nodra toso na luvedra nira sa tubu cake tiko. A tukuna o Mosese vei ira na itubutubu e Isireli: “Mo ni gumatua ni vakavulica [na lawa ni Kalou] vei ira na luvemuni, ka dauvosataka ni kemuni sa tiko e na nomuni vale, ni kemuni sa lako voli talega e na sala, ka ni kemuni sa koto sobu, ni kemuni sa duri cake talega.”​—Vakarua 6:7.

E sega ni kena ibalebale ni o sa siova tiko na ka e baleta na nona bula, ni o kauai vakalevu ga ena veika e vauca na vuli i luvemu. E vakaraitaka ga qori ni o tokoni koya tiko. Qori ena sega kina ni lomaocaoca vakasivia na luvemu e koronivuli.

[iYaloyalo ena tabana e 8, 9]

Veivosakitaka nona lomaocaocataka o luvemu na nona ka ni vuli vei nona qasenivuli, kei na daunivakasala e koronivuli